အစ္စလာမ်ဘာသာဝင်တွေရဲ့အထွဋ်အမြတ်ထားရာ ဘာသာရေးပွဲတော်ဖြစ်တဲ့ အိဒ်ပွဲတော်ကို မြန်မာအပါအဝင် ကမ္ဘာနိုင်ငံတဝှမ်းမှာရှိတဲ့ အစ္စလာမ်ဘာသာဝင် တွေ ဆင်နွဲနေကြပါတယ်။ မြန်မာနိုင်ငံက အစ္စလာမ်ဘာသာဝင်တွေလည်း အိဒ်ပွဲတော်ကို ၃ ရက်ကြာ ဆင်နွဲှနေကြပြီး မနက်ဖြန် တနင်္လာနေ့ကိုတော့ အိဒ်နေ့ အစိုးရရုံးပိတ်ရက်အဖြစ်နဲ့ သတ်မှတ်ပေးထားပါတယ်။
အိန္ဒိယနိုင်ငံ ကတ်ရှ်မီးယားဒေသက Srinagar မြို့နဲ့ တခြား နေရာအတော်များများမှာဆိုရင်လည်း အာဏာပိုင်တွေဘက်က အိဒ်ပွဲတော် မတိုင်ခင် တားမြစ်ကန့်သတ်ထားချက်တွေကို လျှော့ပေးခဲ့ပါတယ်။ ဒါ့အပြင် ဒေသတွင်းက အိမ်နီးချင်းနိုင်ငံတွေဖြစ်တဲ့ အင်ဒိုနီးရှား နဲ့ မလေးရှားနိုင်ငံတွေမှာလည်း ဒီကနေ့ ဝတ်ပြုဆုတောင်းပြီး၊ အိဒ်ပွဲတော်ကို ဆင်နွဲှနေကြသလို၊ အီဂျစ်၊ ဆီးရီးယား၊ နဲ့ အာဖဂန်နစ္စတန်နိုင်ငံတွေမှာလည်း အစ္စလာမ် ဘာသာဝင်တွေဟာ ဗလီတွေကို သွားရောက်ပြီး ဝတ်ပြုဆုတောင်းခဲ့ကြပါတယ်။
ဆော်ဒီအာရေဗျနိုင်ငံမှာတော့ Hajj ဘုရားဖူးပွဲတော်ကို ၅ ရက်ကြာကျင်းပနေပြီး၊ ကမ္ဘာတဝှမ်းက မွတ်စလင် ၂ သန်းကျော်ဟာ မက္ကာမြို့ကို သွားရောက်ပြီး သွားရောက် ဝတ်ပြု ဆုတောင်းခဲ့ကြပါတယ်။ အဲဒီနောက်တော့ ဘုရားဖူးတွေဟာ မကောင်းဆိုးဝါးတွေကို နှင်ထုတ်တဲ့အနေနဲ့ အဲဒီက မကောင်းဆိုးဝါးတွေကို ကိုယ်စားပြုတဲ့ တိုင်ကြီးတွေကို ကျောက်တုံးတွေနဲ့ ပစ်ပေါက်ခဲ့ကြပါတယ်။ မနေ့ စနေနေ့ညကတော့ အဲဒီမှာရှိတဲ့ အစ္စလာမ်ဘာသာဝင်တွေဟာ တမန်တော်မိုဟာမက် နောက်ဆုံးတရားဟောကြားသွားတဲ့နေရာမှာ သွားရောက်စုဝေးပြီး ဝတ်ပြုဆုတောင်းခဲ့ပါတယ်။
Your browser doesn’t support HTML5
ကမ္ဘာတဝှမ်း မွတ်ဆလင်တွေ အီဒ်ပွဲတော်ဆင်နွှဲ