ဩစတြေးလျနဲ့ နယူးလန်နိုင်ငံတို့က ပူးတွဲအိမ်ရှင်အဖြစ် ကျင်းပနေတဲ့ ၂၀၂၃ ခုနှစ်၊ အမျိုးသမီးကမ္ဘာ့ဖလား ဘောလုံးပြိုင်ပွဲ အုပ်စု (F) နဲ့ အုပ်စု (G) ပွဲစဉ်တွေကို ဇူလိုင် ၂၉ ရက် စနေနေ့ ကစားကြတာမှာ ပထမပွဲစဉ်ဖြစ်တဲ့ အုပ်စု (G) က ဆွီဒင်နဲ့ အီတလီအသင်းတို့ ကစားကြတာမှာ ဆွီဒင်က ၅ ဂိုး၊ ဂိုးမရှိနဲ့ အနိုင်ရသွားပါတယ်။
အုပ်စု (G) ကအသင်းတွေ ၂ ပွဲစီ ကစားထားကြတာမှာ ဆွီဒင်က ၂ ပွဲစလုံးနိုင်ထားတဲ့အတွက် ၆ မှတ်နဲ့ ဦးဆောင်နေပြီး အီတလီအသင်းက တပွဲနိုင်၊ တပွဲရှုံးနဲ့ ၃ မှတ်ရထားပါတယ်။
စနေနေ့အတွက် ဒုတိယပွဲစဉ်ဖြစ်တဲ့ အုပ်စု (F) က ပြင်သစ်နဲ့ ဘရာဇီးအင်းတို့ပွဲမှာတော့ ပြင်သစ်အသင်းက ၂ ဂိုး၊ ၁ ဂိုးနဲ့ နိုင်သွားပါတယ်။ လက်ရှိမှာ ပြင်သစ်အသင်းက တပွဲနိုင်၊ တပွဲသရေနဲ့ အုပ်စု (F) မှာ ၄ မှတ်နဲ့ ဦးဆောင်နေပြီး ဘရာဇီးအသင်းကတော့ တပွဲနိုင်၊ တပွဲရှုံး ၃ မှတ်နဲ့ ဒုတိယနေရာမှာ ရှိနေပါတယ်။
ဒီကနေ့အတွက် နောက်ဆုံးပွဲစဉ်အဖြစ်နဲ့ အုပ်စု (F) က ဂျမေကာနဲ့ ပနားမားအသင်းတို့ ကစားကြတာမှာတော့ ဂျမေကာအသင်းက ၁ ဂိုး ဂိုးမရှိနဲ့ နိုင်သွားပါတယ်။ ဂျမေကာအသင်းအတွက် ကမ္ဘာ့ဖလားဗိုလ်လုပွဲစဉ်တွေမှာ ပထမဆုံးအကြိမ် အနိုင်ရတာ ဖြစ်ပါတယ်။
မနက်ဖြန် တနင်္ဂနွေနေ့ကျရင်တော့ အုပ်စု (H) က ၄ သင်း ဒုတိယပွဲစဉ်တွေ ကန်ကြရမှာ ဖြစ်သလို အုပ်စု (A) က ၄ သင်းရဲ့ အုပ်စုပတ်လည် နောက်ဆုံးပွဲစဉ်တွေကို ကစားကြမှာ ဖြစ်ပါတယ်။