အမေရိကန်ပြည်နယ်တချို့ ကြိုတင်မဲပေး

အမေရိကန်သမ္မတရွေးကောက်ပွဲမှာ အကြိတ်အနယ် ယှဉ်ပြိုင်ရမယ်လို့ သတ်မှတ်ထားကြတဲ့ ပြည်နယ်တွေထဲမှာ ပါဝင်တဲ့ Florida နဲ့ Colorado ပြည်နယ်တွေအပါအဝင် ပြည်နယ်အတော်များများမှာ လူကိုယ်တိုင် ကြိုတင်မဲပေးမှုတွေကို စတင် လုပ်ဆောင်နေပြီ ဖြစ်ပါတယ်။

Florida ပြည်နယ်အတွင်းက အကြီးဆုံးမြို့နယ်တွေဖြစ်ကြတဲ့ Duval ၊ Hillsborough ၊ Miami-Dade ၊ Orange နဲ့ Palm Beach စတဲ့ ဒေသတွေအပြင် မြို့နယ်ပေါင်း ၅၀ မှာ တနင်္လာနေ့က မဲရုံတွေ ဖွင့်ထားပေးပါမယ်။ Colorado ပြည်နယ်မှာတော့ မြို့နယ်ပေါင်း ၆၄ ခုစလုံးမှာ မဲရုံတွေကို တနင်္လာနေ့က ဖွင့်ထားပေးပါတယ်။

ဒါ့အပြင် Alaska ၊ Arkansas ၊ Masachusetts နဲ့ Texas ပြည်နယ်တွေမှာလည်း တနင်္လာနေ့က ကြိုတင်မဲပေးဖို့အတွက် မဲရုံတွေကို ဖွင့်ပေးထားပါတယ်။

စာတိုက်ကတဆင့် ကြိုတင် မဲပေးတဲ့အစီအစဉ်တွေကိုတော့ ပြည်နယ် အတော်များများမှာ လွန်ခဲ့တဲ့ သီတင်းပတ် အတန်ကြာကတည်းက ခွင့်ပြုထားပေးပြီး ဖြစ်ပါတယ်။

ဒီအတောအတွင်း လူထုစစ်တမ်းတွေမှာ နောက်ကျကျန်နေတဲ့ ရီပတ်ဘလီကန်သမ္မတလောင်း Donald Trump က သူ့ကို ထောက်ခံသူတွေ ယုံကြည်မှုကျဆင်းအောင် လူထု စစ်တမ်းတွေမှာ ပြိုင်ဖက် ကိုယ်စားလှယ်လောင်း Hillary Clinton က အသာစီး ရနေတယ်ဆိုပြီး ဒီမိုကရက်ပါတီဝင်တွေက လူထုစစ်တမ်း အတုတွေ လုပ်နေကြတယ်လို့ စွပ်စွဲ ပြောကြားလိုက်ပါတယ်။

အစောပိုင်းတုန်းကတော့ သူ့အနေနဲ့ အနိုင်ရနေကြောင်း၊ အဲဒီကိစ္စကို သတင်းမီဒီယာတွေက ဖော်ပြဖို့ ငြင်းဆန်နေကြကြောင်း၊ သူတို့ရဲ့ လိမ်ညာမှုကို လက်မခံပဲ မဲပေးကြပါဆိုပြီး Twitter လူမှုကွန်ယက်ကတဆင့် ထောက်ခံသူတွေကို တိုက်တွန်း ပြောကြားခဲ့ပါတယ်။

အမေရိကန်ပြည်နယ်တချို့ ကြိုတင်မဲပေး