"ကန်စစ်ရေးအကူအညီမရရင် ရုရုားကိုစစ်ရှုံးနိုင်" ယူကရိန်းသမ္မတ

အမေရိကန် ကွန်ဂရက်လွှတ်တော်က ယူကရိန်းအတွက်စစ်ရေးအကူအညီပေးရေး သဘောမတူဘူးဆိုရင်တော့ ရုရှားကို စစ်ရှုံးလိမ့်မယ်လို့ ယူကရိန်းသမ္မတ Volodymyr Zelensky က တနင်္ဂနွေနေ့မှာ ပြောပါတယ်။ ရုရှားရဲ့ကျူးကျော်စစ်နဲ့ရင်ဆိုင်နေရတဲ့ယူကရိန်းနိုင်ငံ အတွက် ပေးမယ့် ဒေါ်လာဘီလီယံနဲ့ချီတဲ့စစ်ရေးအကူအညီတွေကို အမေရိကန် ရီပတ်ဘလစ်ကန်အမတ်တွေက လနဲ့ချီ ကန့်ကွက်ထားကြတာပါ။ ယူကရိန်းကို မကူညီရင် ဒီစစ်ပွဲမှာ ယူကရိန်းရှုံးနိမ့်ပါလိမ့်မယ်လို့ သမ္မတ Zelenskyy က Kyiv က စီစဥ်တဲ့ ရံပုံငွေရှာဖွေရေး United24 အစီအစဥ်မှာ အမေရိကန် ကွန်ဂရက်လွှတ်တော်ကို ဗွီဒီယိုမိန့်ခွန်းမှာ ရည်ရွယ်ပြောဆိုသွားပါတယ်။

အကူအညီတွေမရရင်တော့ ယူကရိန်းဆက်လက်ရပ်တည်ဖို့ ခက်ခဲသွားမှာဖြစ်ပြီး ယူကရိန်းသာ စစ်ရှုံးခဲ့ရင် အခြားတိုင်းပြည်တွေပါ အတိုက်ခိုက်ခံရလိမ့်မယ်လို့လည်း ပြောပါတယ်။ ယူကရိန်းကို ရုရှားတို့ကျူးကျော်တိုက်ခိုက်နေတာ ၂ နှစ်ကျော်ထဲရောက်လာပါပြီ။ နိုင်ငံတောင်ပိုင်း Zaporizhzhia ဒေသအတွင်း ရုရှားရဲ့ တိုက်ခိုက်မှုကြောင့် ဂိုလေယိုင်ပိုလေး Gulyaipole မြို့ကလူ ၃ ဦးသေဆုံးခဲ့တယ်လို့ ယူကရိန်းတာဝန်ရှိသူတွေက တနင်္ဂနွေနေ့မှာပြောပါတယ်။ နိုင်ငံအရှေ့မြောက်ပိုင်းမှာလည်း လတ်တလော လတွေအတွင်း ရုရှား ရဲ့တိုက်ခိုက်မှုတွေတိုးလာတယ်လို့လည်းဆိုပါတယ်။

တနင်္ဂနွေနေ့တုန်းကလည်း ရုရှားရဲ့တိုက်ခိုက်မှုကြောင့် Kharkiv မြို့ကအရပ်သား ၅ ဦးထိခိုက်ဒဏ်ရာရခဲ့တယ်လို့ ယူကရိန်းအာဏာပိုင်တို့က ပြောပါတယ်။ တချိန်ထဲမှာပဲ ရုရှားကလည်း Belgorod နဲ့ Bryansk နယ်စပ်မှာ ယူကရိန်းရဲ့ ဒရုန်းယာဥ် ၁၅ စင်းကို ပစ်ချခဲ့တယ်လို့ ပြောပါတယ်။ ယူကရိန်းရဲ့ ဒရုန်းယာဥ်က ကျည်ထိမှန်ပြီး အမျိုးသမီးတဦးသေဆုံးခဲ့တယ်လို့လည်း Belgorod ဒေသအုပ်ချုပ်ရေးမှုးက ပြောပါတယ်။

"ကန်စစ်ရေးအကူအညီမရရင် ရုရုားကိုစစ်ရှုံးနိုင်" ယူကရိန်းသမ္မတ