ပြီးခဲ့တဲ့ သီတင်းပတ်ကုန်ပိုင်းအတွင်း ဒုံးကျည် စမ်းသပ် ပစ်လွတ်လိုက်ပြီးတဲ့နောက်မှာ မြောက်ကိုရီးယားနိုင်ငံဟာ ကြီးမားတဲ့ ပြဿနာတခုဖြစ်ကြောင်းနဲ့ မြောက်ကိုရီးယားကို ပြင်းထန်စွာ ကိုင်တွယ် ဖြေရှင်းသွားမယ့်အကြောင်း အမေရိကန်သမ္မတ Donald Trump ပြောကြားလိုက်ပါတယ်။
သမ္မတအိမ်ဖြူတော်မှာ ကနေဒါဝန်ကြီးချုပ် Justin Trudeau နဲ့ တနင်္လာနေ့က ပြုလုပ်တဲ့ ပူးတွဲ သတင်းစာရှင်းလင်းပွဲအတွင်း သမ္မတ Trump က အဲဒီလို ပြောကြားလိုက်တာပါ။ ဒါပေမယ့် အသေးစိတ်တော့ ထုတ်ဖော် ပြောဆိုခြင်း မရှိခဲ့ပါဘူး။
ပြီးခဲ့တဲ့ သီတင်းပတ်ကုန်ပိုင်းတုန်းက ဂျပန်ဝန်ကြီးချုပ် Shinzo Abe နဲ့ ဖလော်ရီဒါပြည်နယ်မှာ တွေ့ဆုံခဲ့တဲ့ကိစ္စကိုလည်း သမ္မတ Trump က ချီးမွမ်း ပြောကြားခဲ့ပါတယ်။ မြောက်ကိုရီးယားက တနင်္ဂနွေမှာ ဒုံးကျည် စမ်းသပ်ပစ်လွတ်တဲ့အချိန်က ခေါင်းဆောင် ၂ ဦး အတူ ရှိနေခဲ့ကြတာပါ။ မြောက်ကိုရီးယားက စမ်းသပ် ပစ်လွတ်လိုက်တဲ့ ဒုံးကျည်ဟာ ဂျပန်ပင်လယ်ထဲ ကျမသွားခင် ကီလိုမီတာ ၅၀၀ လောက် အကွာအဝေးကို ရောက်ခဲ့တယ်လို့ တောင်ကိုရီးယား စစ်ဖက် အရာရှိတွေက ပြောပါတယ်။
မြောက်ကိုရီးယားရဲ့ လုပ်ရပ်ဟာ လုံး၀ သည်းခံနိုင်စရာမရှိကြောင်း ဂျပန်ဝန်ကြီးချုပ် Shinzo Abe က ပြောပါတယ်။
အမေရိကန်ပြည်ထောင်စု၊ ဂျပန်နဲ့ တောင်ကိုရီးယားတို့ရဲ့ တောင်းဆိုချက်အရ ကုလသမဂ္ဂလုံခြုံရေးကောင်စီဟာလည်း တနင်္လာနေ့ နှောင်းပိုင်းမှာ အရေးပေါ်စည်းဝေးပွဲ ကျင်းပဖို့ ရှိနေပါတယ်။
Your browser doesn’t support HTML5
မြောက်ကိုရီးယား ပြသာနာကြီးမားမှု Trump ဝန်ခံ