အမေရိကန်သမ္မတ Donald Trump နဲ့ ဂျပန် ဝန်ကြီးချုပ် Shinzo Abe တို့ ၂ ဦးဟာ ရက်အတန်ကြာ တွေ့ဆုံပြီး အပန်းဖြေရင်း အလုပ်ကိစ္စတွေကို တွေ့ဆုံ ဆွေးနွေးနေကြပါတယ်။
အမေရိကန်နဲ့ ဂျပန် နှစ်နိုင်ငံ မဟာမိတ် ဆက်ဆံရေးဟာ အရှေ့အာရှဒေသ ငြိမ်းချမ်းရေးအတွက် အခြေခံ အုတ်မြစ်ဖြစ်ကြောင်း သမ္မတ Trump က အိမ်ဖြူတော်မှာ ပြောကြားလိုက်ပြီး နောက်တနေ့မှာ ပဲ ခေါင်းဆောင် ၂ ဦးဟာ ဖလော်ရီဒါပြည်နယ်၊ Palm Beach က သမ္မတ Trump ရဲ့ Mar-a-Lago ခြံဝင်းကြီးအနီးမှာရှိတဲ့ Trump National Golf ကွင်းမှာ စနေနေ့က ဂေါက်သီးရိုက်ခဲ့ကြပါတယ်။
Trump နဲ့ Abe တို့ ၂ ဦးဟာ ဖလော်ရီဒါပြည်နယ်အတွင်းက သမ္မတ Trump ပိုင်တဲ့အိမ်တွေမှာ တအိမ်ပြီး တအိမ် ကူးပြောင်းပြီး ဆွေးနွေးမှုတွေကို ဆက်လက် ပြုလုပ်ကြမှာ ဖြစ်ပါတယ်။
သမ္မတ စီးနင်းလိုက်ပါလာတဲ့ယာဉ်တန်း ဂေါက်ကွင်းကို မရောက်ခင် လမ်းဆုံတခုကို ရောက်တဲ့အခါ ဒါဇင်နဲ့ချီတဲ့ လူတချို့က - အမုန်းတရားတွေကို ရပ်တန့်ပါ၊ အာဏာဖီဆန်ကြလို့ အဓိပ္ပါယ်ရတဲ့ စာတန်းတွေကိုင်ပြီး ဆန္ဒပြခဲ့ကြပါတယ်။
သောကြာနေ့က ဖလော်ရီဒါပြည်နယ်ကို မထွက်ခွာခင် ခေါင်းဆောင် ၂ ဦးဟာ သမ္မတ အိမ်ဖြူတော်မှာ သောကြာနေ့ မနက်ပိုင်းမှာ တွေ့ဆုံပြီး နှစ်နိုင်ငံအကြား ကာလရှည်ကြာ တည်ရှိခဲ့တဲ့ လုံခြုံရေးဆိုင်ရာ သဘောတူညီချက် ထပ်လောင်း အတည်ပြုပြီး စီးပွားရေး ပူးပေါင်း ဆောင်ရွက်မှုတွေ တိုးမြင့် လုပ်ဆောင်ရေးအတွက် ဆွေးနွေးခွင့် ရခဲ့ကြပါတယ်။
Your browser doesn’t support HTML5
Trump နဲ့ Abe အပန်းဖြေရင်း ဆွေးနွေး