ဂျပန်၊ တရုတ်နဲ့ တောင်ကိုရီးယားနိုင်ငံတို့ကြား ၄ နှစ်ကြာ ရပ်ဆိုင်းထားတဲ့ ထိပ်သီးဆွေးနွေးပွဲ ပြန်စနိုင်ရေး ၃ နိုင်ငံက ထိပ်တန်းသံတမန်တွေ တောင်ကိုရီးယားနိုင်ငံ Busan မြို့မှာ ဒီကနေ့ တွေ့ဆုံဆွေးနွေးကြပါတယ်။ ၃ နိုင်ငံ ထိပ်သီးဆွေးနွေးပွဲ ပြန်လည်စတင်နိုင်ရေး၊ ပူးပေါင်းဆောင်ရွက်မှုတွေ တိုးမြှင့်နိုင်ရေးတို့အပြင် တခြားဒေသတွင်းနဲ့ နိုင်ငံတကာ ကိစ္စတွေမှာ သဘောထားအမြင်ချင်း ဖလှယ်ဖို့ ရည်ရွယ်တဲ့အနေနဲ့ တွေ့ဆုံတာလို့လည်း တောင်ကိုရီးယားနိုင်ငံက ပြောထားတာပါ။ ၃ နိုင်ငံ ထိပ်သီးဆွေးနွေးပွဲတွေကိုတော့ ၂၀၁၉ ခုနှစ် ကတည်းက ရပ်ဆိုင်းထားတာ ဖြစ်ပါတယ်။ စီးပွားရေးနဲ့ ယဉ်ကျေးမှုချင်း ဆက်နွယ်နေတဲ့ အာရှ ၃ နိုင်ငံပေါင်းရင် ကမ္ဘာကုန်ထုတ်လုပ်မှုရဲ့ ၂၅ ရာခိုင်နှုန်းရှိပါတယ်။
ဒါပေမဲ့လဲ စစ်ကာလ ဂျပန်နိုင်ငံက ကျုးလွန်ခဲ့တဲ့ကိစ္စတွေ၊ တရုတ်နဲ့ အမေရိကန်ကြား မဟာဗျုဟာမြောက် ယှဉ်ပြိုင်မှုတွေကြောင့် ၃ နိုင်ငံကြား ပူးပေါင်းဆောင်ရွက်မှုတွေမှာ အဟန့်အတားတွေ ကြုံနေရတာပါ။ ၃ နိုင်ငံကြား ကြီးမားတဲ့ ပူးပေါင်းဆောင်ရွက်မှု အလားအလာတွေ ရှိနေကြောင်းနဲ့ အိမ်နီးချင်း ၃ နိုင်ငံကြား ခွဲခြားလို့ မရနိုင်ကြောင်း ဒီကနေ့ အစည်းအဝေးပွဲ အစမှာပဲ တောင်ကိုရီးယား နိုင်ငံခြားရေးဝန်ကြီး Park Jin က ပြောဆိုခဲ့ပါတယ်။ ၃ နိုင်ငံ ထိပ်သီးဆွေးနွေးပွဲကိုလည်း အမြန်ဆုံးကျင်းပနိုင်ဖို့ မျှော်လင့်ကြောင်းလည်း ပြောဆိုခဲ့ပါတယ်။