တရုတ်နိုင်ငံရဲ့ ပြည်တွင်း အသားတင်ထုတ်ကုန်တန်ဖိုး GDP ဟာ ဒီနှစ် ပထမ ၃ လပတ်အတွင်း ၄.၅ % တိုးလာတယ်လို့ တရုတ်အစိုးရက ဒီကနေ့ ထုတ်ပြန်ပါတယ်။ ခုလို စီးပွားရေး အားကောင်းလာခဲ့တာဟာ COVID-19 ရောဂါ ထိန်းချုပ်ရာမှာ တင်းတင်းကျပ်ကျပ် ချမှတ် ကိုင်တွယ်ခဲ့တဲ့ “Zero-COVID” ကိုဗစ် လုံးဝကင်းစင်ရေးမူကို ပြန်လည် ရုပ်သိမ်းလိုက်ပြီးတဲ့နောက် ကုန်ပစ္စည်း ဝယ်ယူသုံးစွဲမှုအားနဲ့ လက်လီ ရောင်းအားတွေ တက်လာတာကြောင့် ဖြစ်တယ်လို့ ပြောပါတယ်။
ကမ္ဘာမှာ စီးပွားရေးဖွံ့ဖြိုးမှု ဒုတိယ အင်အားအကြီးဆုံး နိုင်ငံဖြစ်တဲ့ တရုတ် ရဲ့ ဒီနှစ် ဇန်နဝါရီလ ကနေ မတ်လအထိ စီးပွားရေး ဖွံ့ဖြိုးတိုးတက်မှုနှုန်းဟာ ပြီးခဲ့တဲ့ ၂၀၂၂ ခုနှစ် ခုလိုကာလနဲ့ နှိုင်းယှဉ်ရင် ၂.၉ % တိုးတက်ခဲ့တယ် လို့ ဒီကနေ့ ထုတ်ပြန်တဲ့ တရုတ်အစိုးရရဲ့ စာရင်း အချက်အလက်တွေမှာ ဖော်ပြထားပါတယ်။ ကိုဗစ်ကန့်သတ်ချက်တွေ ဖယ်ရှားခဲ့ပြီးတဲ့နောက် စားသောက်ဆိုင်တွေနဲ့ အရောင်းစင်တာကြီးတွေမှာ လူတွေ ပြန်လည် စည်ကားလာခဲ့ပြီး ဝယ်ယူ စားသုံးမှုအား ပြန်တက်လာခဲ့တာ ဖြစ်ပါတယ်။
ဒီနှစ် မတ်လအတွင်း ကုန်ပစ္စည်း လက်လီရောင်းအားဟာ အရင်နှစ် မတ်လနဲ့ နှိုှုင်းယှဉ်ရင် ၁၀.၆ % ပိုများပြီး ဒီနှစ် ပထမ ၂ လနဲ့ နှိုင်းယှဉ်ရင်လည်း ၇.၁ % ရောင်းအား တက်လာခဲ့တယ်လို့ ဖော်ပြပါတယ်။ သံသတ္ထုနဲ့ တခြား စက်မှုကုန်ပစ္စည်းတွေ ထုတ်လုပ်မှုပိုင်းကို ကြည့်ရင်လည်း ပြီးခဲ့တဲ့နှစ် မတ်လ အတွင်း ထုတ်လုပ်မှုထက် ဒီနှစ်မှာ ၃.၉ % တိုးလာပါတယ်။ အခြေခံ အဆောက်အအုံနဲ့ စီမံကိန်းဆိုင်ရာ ရင်းနှီးမြှုပ်နှံမှုပိုင်းမှာလည်း ပြီးခဲ့တဲ့နှစ် ပထမ ၃ လပတ်နဲ့ နှိုင်းယှဉ်ရင် ဒီနှစ် ပထမ ၃ လအတွင်း ၅.၁ % တိုးလာပါတယ်။
တရုတ်နိုင်ငံရဲ့ ဒီနှစ် စီးပွားရေး ၅ % အထိ တိုးလာဖို့ ရည်မှန်းထားတဲ့အကြောင်းကို တရုတ်အစိုးရက ဒီနှစ်အစောပိုင်းကတည်းက ပြောဆိုထားတာပါ။ ပြီးခဲ့တဲ့နှစ်တုန်းကတော့ ကိုဗစ်ကပ်ရောဂါ ထိန်းချုပ်တဲ့အနေနဲ့ အသွားအလာ ပိတ်ဆို့တာ၊ လူတွေ နေအိမ်တွေထဲမှာပဲ နေကြဖို့ ကန့်သတ်တာတွေကို တခါတရံ သီတင်းပတ်တွေနဲ့ချီ ချမှတ်ဆောင်ရွက်ခဲ့ရတာတွေကြောင့် တရုတ်ရဲ့ စီးပွားရေး ဖွံ့ဖြိုးတိုးတက်မှု ၃ % အထိ ကျဆင်းခဲ့ပါတယ်။
Your browser doesn’t support HTML5
စီးပွားရေး တိုးတက်လာကြောင်း တရုတ်အစိုးရ သတင်းထုတ်ပြန်