ရိုဟင်ဂျာပြဿနာ ပြည်တွင်းရေးသက်သက်မဟုတ်ကြောင်း မလေးရှားပြော

ပြည်ပကို ထွက်ပြေးကြတဲ့ ရိုဟင်ဂျာတွေ မလေးရှားကိုပါ ရောက်လာနေတာမို့ ရိုဟင်ဂျာပြဿနာကို မြန်မာအစိုးရက ပြည်တွင်းရေးပြဿနာ သက်သက်အဖြစ် ပြောလို့ မဖြစ်နိုင်ဘူးလို့ ၁၂ ကြိမ်မြောက် အာဆီယံ ကာကွယ်ရေးဝန်ကြီးများ အစည်းအဝေးမှာ မလေးရှား ကာကွယ်ရေးဝန်ကြီး Mohamad Sabu က ပြောပါတယ်။

လက်ရှိမှာ မလေးရှားနိုင်ငံမှာ ရိုဟင်ဂျာ ၁ သိန်းကျော် ရှိနေပြီး သူတို့တွေဟာ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR မှာ မှတ်ပုံတင်ထား သူတွေချည်း မဟုတ်ကြကြောင်းနဲ့ ဒုက္ခသည် အများအပြားရဲ့ ဒဏ်ကို မလေးရှားက မခံနိုင်ဘူးလို့ ဝန်ကြီး Mohamad Sabu က ပြောကြားကြောင်း မလေးရှားအစိုးရအာဘော် Bernama သတင်းမှာ ဖော်ပြထားပါတယ်။

အောက်တိုဘာလ ၁၈ ရက်ကနေ ၂၀ ရက်နေ့အထိ စင်္ကာပူမှာ ကျင်းပတဲ့ ၁၂ ကြိမ်မြောက် အာဆီယံကာကွယ်ရေးဝန်ကြီးများ အစည်းအဝေး ADMM နဲ့ ၅ ကြိမ်မြောက် ADMM-Plus အစည်းအဝေးတွေကို မလေးရှားနဲ့အတူ မြန်မာလည်း တက်ရောက်နေတာ ဖြစ်ပြီး ရိုဟင်ဂျာတွေ နေရပ်ပြန်နိုင်အောင် မြန်မာဘက်က လုပ်ဖို့လိုအပ်ကြောင်း မလေးရှားကာကွယ်ရေးဝန်ကြီးက အစည်းအဝေးမှာပြောပါတယ်။

ဒါ့အပြင် သူတို့ လုံခြုံစိတ်ချစွာ နေရပ်ပြန်နိုင်အောင် မြန်မာသံရုံးက နည်းလမ်းတွေ ရှာဖို့ လည်း တိုက်တွန်းခဲ့ပါတယ်။

ဘင်္ဂလားဒေ့ရှ်မှာ ရှိနေတဲ့ ရိုဟင်ဂျာတွေ အတွက် လွန်ခဲ့တဲ့ ၂ နှစ်ကတည်းက Cox’s Bazar မှာ မလေးရှားက ဆေးခန်းဖွင့်ပေးပြီး ဘင်္ဂလားဒေ့ရှ်ကို အကူအညီပေးနေကြောင်းနဲ့ မလေးရှားကိုလည်း ဆော်ဒီအာရေဗျ၊ အာရပ်စော်ဘွားများနိုင်ငံ UAE နဲ့ ဘရူနိုင်းအပါအဝင် နိုင်ငံအများအပြားက အကူအညီတွေ ပေးနေတယ်လို့ပြောပါတယ်။

ဒါ့အပြင် ရိုဟင်ဂျာတွေ နေရပ်ပြန်ရေး ညှိနှိုင်းမှုတွေနဲ့ ပတ်သက်ပြီး အကူအညီပေးဖို့ တခြားနိုင်ငံအများအပြားကလည်း လိုလားနေတယ် လို့ပြောပါတယ်။

ရိုဟင်ဂျာပြဿနာ ပြည်တွင်းရေးသက်သက်မဟုတ်ကြောင်း မလေးရှားပြော