၂၀၁၆ ခုနှစ် အမေရိကန် သမ္မတ ရွေးကောက်ပွဲနဲ့ ရုရှားရဲ့ ဝင်ရောက် စွက်ဖက်မှုတွေအကြောင်း စုံစမ်း ဖော်ထုတ်နေတဲ့ အထူး စုံစမ်း စစ်ဆေးရေးမှူး Robert Mueller နဲ့ တဦးချင်းထိုင်ပြီး လူတွေ့ မေးမြန်းခွင့် ပြုမှာမဟုတ်ဘူးလို့ သမ္မတ Donald Trump က ပြောပါတယ်။ အထူးစုံစမ်းရေးမှူးရဲ့ မေးခွန်းတွေကို စာနဲ့ရေးပြီး ဖြေကြားထားခြင်းဟာ သူ့ရဲ့ နောက်ဆုံး လုပ်ဆောင်ချက်ဖြစ်တယ်လို့ တနည်းအားဖြင့် သမ္မတ Trump က ပြောကြားလိုက်တာလည်း ဖြစ်ပါတယ်။
သူ့ကို မေးသင့်တဲ့ မေးခွန်းတွေကို အပြီးသတ် ဖြေကြားပေးပြီးဖြစ်တဲ့ကြောင်း၊ ဒါဟာ နောက်ဆုံး လုပ်ဆောင်ခြင်းဖြစ်ကြောင်း Fox သတင်းဌာနက Chris Wallace နဲ့ ပြုလုပ်တဲ့ တနင်္ဂနွေ မေးမြန်းခန်းအစီအစဉ်မှာ သမ္မတ Trump အဲဒီလို ပြောကြားလိုက်တာပါ။
သူ့ရဲ့ ရှေ့နေတွေက မစ္စတာ Mueller ရဲ့ ၂ ဒါဇင်လောက်ရှိတဲ့ မေးခွန်းတွေကို ဖြေဆို ပြန်ကြားနိုင်ဖို့ လုပ်ဆောင်နေကြပြီ ဖြစ်ကြောင်းနဲ့ ရှေ့နေတွေဟာ သူရေးခိုင်းတဲ့ အဖြေတွေကိုဘဲ ရေးနေကြခြင်းဖြစ်ပြီး ဖြေဆိုဖို့အတွက်လည်း သူ့အတွက် မခက်ခဲကြောင်း သောကြာနေ့က အိမ်ဖြူတော်မှာ မေးမြန်းပြီး တနင်္ဂနွေနေ့က အသံလွှင့်တဲ့ အဲဒီ မေးမြန်းခန်းမှာ သမ္မတ Trump က ဖြေကြားထားပါတယ်။
သမ္မတရဲ့ အဖြေတွေကို လာမယ့်ရက်ပိုင်းအတွင်း အကြောင်းပြန်ကြားနိုင်မယ်လို့ မျှော်လင့်ရပါတယ်။ ဒါပေမယ့် ရှေ့နေ Rudy Giuliani ကတော့ တချို့ မေးခွန်းတွေဟာ တခြား မေးခွန်းတွေထက် ဥပဒေကြောင်းအရ သူတို့အတွက် ပိုပြီး ခက်ခဲ ရှုပ်ထွေးစေတယ်လို့ ပြောပါတယ်။
အဲဒီ Fox သတင်းဌာနနဲ့ ပြုလုပ်တဲ့ မေးမြန်းခန်းအတွင်းမှာဘဲ ၁၈ လ ကြာလာပြီဖြစ်တဲ့ မစ္စတာ Mueller ရဲ့ စုံစမ်း စစ်ဆေးမှု လုပ်ငန်းတွေကို သမ္မတ Trump ထပ်မံ တိုက်ခိုက်ထားပါတယ်။
Your browser doesn’t support HTML5
ရုရှားအရေး လူတွေ့မေးမြန်းခွင့်မပြုဘူးလို့ သမ္မတ Trump ပြော