မလေးရှားနိုင်ငံ Kuala Lumpur မြို့မှာကျင်းပနေတဲ့ ၂၉ ကြိမ်မြောက် အရှေ့တောင်အာရှအားကစားပြိုင်ပွဲမှာ အမျိုးသမီးဘောလုံးပွဲစဉ်တွေကို ဒီကနေ့ August လ ၁၅ ရက်မှာ စတင်မှာဖြစ်ပါတယ်။ အင်္ဂါနေ့ပထမပွဲစဉ်အဖြစ် မြန်မာအမျိုးသမီးအသင်းနဲ့ ထိုင်းအသင်းတို့ ဒေသစံတော်ချိန် ညနေ ၄ နာရီမှာ ကန်ကြမှာပါ။
ည ၈ နာရီ ၄၅ မှာစမယ့် ဒုတိယပွဲစဉ်မှာတော့ အိမ်ရှင်မလေးရှားနဲ့ ဖိလစ်ပိုင်အသင်းတို့ကစားကြမှာပါ။ တနင်္လာနေ့က ကစားခဲ့ကြတဲ့ အမျိုးသားပွဲစဉ်တွေမှာတော့ မြန်မာ ယူ-၂၂ ဘောလုံးအသင်းက ပွဲဦးထွက်မှာ စင်ကာပူကို အနိုင်ရသွားပါတယ်။ ၂ ဂိုး ဂိုးမရှိ နဲ့ နိုင်ခဲ့တာမှာ ၂ ဂိုးလုံးကို တိုက်စစ်မှူးအောင်သူက သွင်းခဲ့တာဖြစ်ပါတယ်။ ပထမဆုံးပွဲမှာ အနိုင်ရလိုက်တဲ့အတွက် ကျန်တဲ့ပွဲစဉ်တွေအတွက် မြန်မာအသင်းအနေနဲ့ ယုံကြည်မှု ပိုရသွားစေခဲ့တယ်လို့ အသင်းနည်းပြ ဂတ်ဇီဆီက ပြောကြားခဲ့ပါတယ်။ မြန်မာအသင်းဟာ အုပ်စု A မှာ အိမ်ရှင်မလေးရှား၊ စင်ကာပူ၊ လာအို၊ ဘရူနိုင်းတို့နဲ့ တအုပ်စုတည်းကြပါတယ်။
တဘက်အုပ်စု (B) မှာတော့ လက်ရှိချန်ပီယံ ထိုင်း၊ ဗီယက်နမ်၊ အင်ဒိုနီးရှား၊ ဖိလစ်ပိုင်၊ ကမ္ဘောဒီးယား နဲ့ Timor Leste အသင်းတို့ ပါဝင်ပါတယ်။ တနင်္လာနေ့ကပဲ မလေးရှားနဲ့ ဘရူနိုင်းတို့ အုပ်စု A ရဲ့နောက်ပွဲစဉ်မှာကစားခဲ့ကြတာမှာ အိမ်ရှင်မလေးရှားက ၂ ဂိုး ဘရူနိုင်းက ၁ ဂိုးနဲ့ မလေးရှားအသင်းနိုင်ခဲ့ပါတယ်။ သြဂုတ်လ ၁၆ ဗုဒ္ဓဟူးနေ့ကျရင်တော့ မြန်မာအမျိုးသားဘောလုံးအသင်းနဲ့ Laos အသင်းတို့ ကန်ကြမှာဖြစ်ပါတယ်။
၂၀၁၅ ခုနှစ်က စင်ကာပူမှာ ကျင်းပတဲ့ ၂၈ ကြိမ်မြောက် အရှေ့တောင်အာရှအားကစားပြိုင်ပွဲမှာတော့ မြန်မာအမျိုးသားဘောလုံးအသင်းဟာ နောက်ဆုံးဗိုလ်လုပွဲအထိ တက်ခဲ့ပေမဲ့ ဗိုလ်လုပွဲမှာ ထိုင်းအသင်းကို ရှုံးပြီး ဒုတိယငွေတံဆိပ်ရခဲ့ပါတယ်။
Your browser doesn’t support HTML5
SEA Gamesဘောလုံး မြန်မာအမျိုးသမီးအသင်း ထိုင်း နဲ့ ကန် မည်