၂၀၂၀ ရွေးကောက်ပွဲမှာ Joe Biden နိုင်ငံအောင် မဲ မသမာလုပ်ခဲ့တယ်လို့ Donald Trump ရဲ့ ရှေ့နေဟောင်း Rudy Guiliani စွပ်စွဲပြောခဲ့လို့ ထိခိုက်ခဲ့သူ ၂ ဦးကို ဒေါ်လာ ၁၄၈ သန်းလျော်ကြေးပေးရမယ်လို့ တရားရုံးက အမိန့်ချလိုက်ပါတယ်။
Georgia ပြည်နယ် ရွေးကောက်ပွဲဝန်ထမ်း ၂ ဦးက Trump ရဲ့ ရှေ့နေဟောင်း Rudy Guiliani ရဲ့ လိမ်လည် ပြောဆိုမှုတွေကြောင့် သူတို့ရဲ့ ရုပ်ပိုင်းစိတ်ပိုင်း ထိခိုက်ရတဲ့အထိ၊ အသက်အန္တရာယ်ကို ခြိမ်းချောက်ခံရတာ၊ အသာရေဖျက်ခံရတာတွေကို Trump ထောက်ခံသူတွေက လုပ်ခဲ့တယ်လို့ဆိုပြီး တရားစွဲခဲ့တာပါ။
ဒီအမှုကို ဝါရှင်တန်မြို့တော်တရားရုံးမှာ ကြားနာခဲ့ပြီးနောက် ပြစ်မှုမြောက်၊ မမြောက် ဆုံးဖြတ်တဲ့ အဖွဲ့ဝင် ၈ ယောက်ပါ ဂျူရီအဖွဲ့က အသာရေးဖျက်ခံရမှုအတွက် ဒေါ်လာသန်း ၂၀၊ နစ်နာကြေးအတွက် ဒေါ်လာ ၇၅ သန်းအပါအဝင် စုစုပေါင်း ၁၄၈ သန်း လျော်ကြေးပေးရမယ်လို့ Rudy Guiliani ကို အမိန့်ချလိုက်တာဖြစ်ပါတယ်။
Wandrea “Shaye” Moss နဲ့ သူမရဲ့မိခင် Ruby Freeman တို့ ၂ ဦးက သူတို့ နေအိမ်ကနေပါ ပြောင်းပြေးရတဲ့အထိ နှောင့်ယှက်၊ ခြိမ်းခြောက်ခံရတာတွေကို တရားရုံးမှာ ထွက်ဆိုခဲ့ကြပါတယ်။ သူမအနေနဲ့ သူအရင်နေခဲ့အိမ်မှာ ပြန်နေလို့မရတော့သလို လူတွေနဲ့ ဆက်ဆံတဲ့နေရာမှာလည်း အရမ်းသတိထားပြီး သူနံမည်အရင်းတောင် ထုတ်ပြောဖို့ ဝန်လေးတဲ့အခြေအနေ ဖြစ်နေတာကြောင့် တရားရုံးက ဆုံးဖြတ်ပေးလိုက်တဲ့ ငွေပမာဏနဲ့ အရင်ဘဝကို ပြန်ရဖို့ ဘယ်လိုမှ မဖြစ်နိုင်တော့ကြောင်း Ruby Freeman က စီရင်ချက်ချအပြီး တရားရုံးအပြင်မှာ သတင်းထောက်တွေကို ပြောခဲ့ပါတယ်။
Rudy Guiliani ကတော့ သူ့ဘက်က ဘာအတွက်မှ နောင်တမရဘူးလို့ တုံ့ပြန်ခဲ့ပြီး ဆုံးဖြတ်ချက်အပေါ် အယူခံတင်မယ်လို့ ပြောကြားခဲ့ပါတယ်။