ဂျပန်မှာ ထိခိုက်ပျက်စီးနေတဲ့ ဖူကူရှီးမား (Fukushima) နျူကလီးယား ဓါတ်အားပေးစက်ရုံထဲက ဓါတ်ပေါင်းဖိုတွေရှိရာ အဆောက်အဦးတွေထဲမှာ ဓါတ်ရောင်ခြည်ပမာဏဟာ အတော်လေး အန္တရာယ်ရှိနေတဲ့အတွက် လူတွေ ဓါတ်ပေါင်းဖိုထဲဝင်ပြီး အချိန်ယူပြင်ဆင်ဖို့ မဖြစ်နိုင်ဘူးလို့ ဂျပန် နျူကလီးယားဆိုင်ရာ တာဝန်ရှိသူတွေက ပြောပါတယ်။
ဓါတ်ပေါင်းဖိုအမှတ် (၁) နဲ့ (၃) ရှိရာ အဆောက်အဦးတွေထဲကို စက်ရုပ်လွှတ်ပြီး တနင်္ဂနွေနေ့က တိုင်းတာ ခဲ့တာမှာ အလုပ်သမားတယောက်အနေနဲ့ ၄ နာရီခွဲအတွင်းမှာကို လူတယောက်လက်ခံသင့်တဲ့ အမြင့်ဆုံး ဓါတ်ရောင်ခြည်ပမာဏ သင့်နိုင်တာကို တိုင်းတာတွေ့ခဲ့ကြပါတယ်။ ဒီတိုင်းတာမှု ထွက်ပေါ်လာပြီးနောက် တာဝန်ရှိသူတွေက ခုလို ပြောကြားခဲ့တာ ဖြစ်ပါတယ်။
တိုင်းတာရရှိတဲ့ ဓါတ်ရောင်ခြည် ကိန်းဂဏန်းတွေကို လေ့လာပြီး စက်ရုံထဲမှာ ဘယ်လို ပြင်ဆင်မှုတွေလုပ်မလဲ ဆိုတာကို ဆုံးဖြတ်မယ်လို့ စက်ရုံပိုင် တိုကျို အီလက်ထရောနစ် (Tokyo Electric) ဓါတ်အားပေး ကုမ္ပဏီက ပြောပါတယ်။ ၆ လ ကနေ ၉ လအတွင်း စက်ရုံထဲက ဓါတ်ပေါင်းဖို ၆ ခုလုံးကို အန္တရာယ်ကင်းကင်းနဲ့ ပိတ်နိုင်အောင်ကြိုးစားမယ့် သူတို့ရဲ့ ရည်မှန်းချက်ကိုတော့ ထိခိုက်မှာ မဟုတ်ပါဘူးလို့ ကုမ္ပဏီကပြောပါတယ်။
ဓါတ်ပေါင်းဖိုတွေ ပိတ်နိုင်ဖို့အရေးကို အစိုးရကလဲ အတတ်နိုင်ဆုံး ကူညီသွားမယ်လို့ ဝန်ကြီးချုပ် နာအိုတိုခန်က ဒီကနေ့ လွှတ်တော်မှာ ပြောကြားခဲ့ပါတယ်။ အမေရိကန်ကပေးတဲ့ စက်ရုပ် ၂ ရုပ်ကို အဝေးထိန်းခလုပ်နဲ့ တနင်္ဂနွေနေ့က စက်ရုံထဲကို လွှတ်ပြီး စက်ရုံထဲကအပူချိန်၊ ဓါတ်ရောင်ခြည်ပမာဏနဲ့ အောက်စီဂျင် ပမာဏတွေကို တိုင်းတာခဲ့တာဖြစ်ပါတယ်။