မပျက်ပြယ်သေးတဲ့ ကျောက်စိမ်းကျိန်စာ

ကချင်ပြည်နယ် ကျောက်စိမ်းတွင်းတွေမှာ မြေစာပုံပြိုလို့ လူတွေသေဆုံးကြရပြန်ပါပြီ။ နိုင်ငံပိုင် သယံဇာတ ယိုဖိတ်ဆုံးရှုံးမှုကြီးကို အစိုးရသစ်က မပိတ်ပင် မတားဆီးနိုင်သေးတဲ့အပြင် လူတွေအစုလိုက်အပြုံလိုက် မကြာခဏသေဆုံးနေရတာတွေကိုပါ ဒီအတိုင်း လက်ပိုက်ကြည့်နေကြရတော့မှာလား ဆိုတာ အမျိုးသားလွှတ်တော်ကိုယ်စားလှယ် ဦးခင်မောင်မြင့်၊ ဒေသခံဂျာနယ်လစ် ဦးဇော်မိုးထက်တို့နဲ့ ဦးကျော်ဇံသာက ဆွေးနွေးသုံးသပ်ထားပါတယ်။

ဦးကျော်ဇံသာ။ ။ အခု ဖားကန့်မှာ လူတွေသေကြပြန်ပြီပေါ့ခင်ဗျာ။ ပြည်သူလူထု ရွေးချယ်တင်မြှောက်တဲ့ အစိုးရ တက်လာပြီဆိုတော့ လူတိုင်းက အစစအရာရာ အဆင်ပြေလိမ့်မယ်လို့ မျှော်လင့်ခဲ့ကြပါတယ်။ ပြဿနာဟာ လုံးဝဥဿုံ ချက်ခြင်းပြီးပြတ်သွားခြင်းမရှိရင်တောင်မှ အခြေအနေ တိုးတက်ကောင်းမွန်လာလိမ့်မယ်ဆိုတဲ့ မျှော်လင့်ချက်တော့ လူတိုင်းမှာ ရှိခဲ့ကြပါတယ်။ အခု ဖားကန့်အခြေအနေနဲ့ပတ်သက်ပြီးတော့ ဘာတိုးတက်မှု တစုံတရာ မြင်ခဲ့ရပါလဲခင်ဗျ။ သတင်းသမားဖြစ်တဲ့ ကိုဇော်မျိုးထက် စပြောပါခင်ဗျ။

ကိုဇော်မျိုးထက်။ ။ အစိုးရသစ်တက်လာပြီးတဲ့နောက်ပိုင်းပေါ့နော်။ အားရလောက်တဲ့ အပြောင်းအလဲတွေ၊ တိုးတက်မှုတွေတော့ ကျနော်တို့ မတွေ့ရသေးဘူးဗျ။ လက်ရှိ ကျနော်တို့နေတဲ့ ဖားကန့်အနေအထားနဲ့ဆိုပေါ့နော်။ အထူးသဖြင့် ကျနော်တို့ပြောချင်တာက တရားဥပဒေစိုးမိုးမှုမရှိဘူး။ ဒီ ကျောက်စိမ်းတူးဖော်တဲ့ကုမ္ပဏီတွေရဲ့တရားဥပဒေလိုက်နာမှုက လုံးဝကိုအားနည်းတယ်ဗျ။ ပွင့်လင်းမြင်သာမှုတွေမရှိဘူး။ အန္တရာယ်ကင်းရှင်းနိုင်အောင် အုပ်ချုပ်ရေးပိုင်းတွေ၊ ဆိုင်ရာဝန်ကြီးဌာနပိုင်းတွေက စီမံကွပ်ကဲတာမျိုးတွေလည်း မရှိဘူးဆိုတော့ တော်တော်လေး စိတ်မကောင်းစရာပါဗျ။

ဦးကျော်ဇံသာ။ ။ ဟုတ်ကဲ့၊ အမျိုးသားလွှတ်တော်ကိုယ်စားလှယ် ဦးခင်မောင်မြင့်ခင်ဗျာ။ ဦးခင်မောင်မြင့်တို့ တက်လာပြီးတဲ့နောက်ပိုင်းမှာပေါ့ဗျာ။ တကယ်တော့ ပြည်သူတွေဟာ ဒီအခြေအနေတွေ တိုးတက်ကောင်းမွန်လာလိမ့်မယ်လို့ မျှော်လင့်ခဲ့ပါတယ်။ အခြေအနေ တိုးတက်မှု တစုံတရာတွေ့ရပါလားခင်ဗျ။

ဦးခင်မောင်မြင့်။ ။ တိုးတက်လာအောင် ကျနော်တို့ကတော့ ကြိုးစားနေပါတယ်။ ကျနော်က သယံဇာတနဲ့သဘာဝပတ်ဝန်းကျင်မှာလည်း ပါတဲ့အတွက်ကြောင့် ကျနော် အများဆုံးကြိုးစားနေပါတယ်။ ပြောရမယ်ဆိုလို့ရှိရင် ဖားကန့်မှာက တရားဥပဒေစိုးမိုးမှုကို တပ်တို့၊ တပ်မ စကရ (၇) တို့၊ ရဲတပ်ရင်း လုံထိန်းတပ်ရင်း နှစ်ရင်းတော့ရှိတယ်။ အဲဒါမျိုးမကြုံအောင်သူတို့က လုပ်ရမယ့်အစား သူတို့ ဘယ်လိုနေရာများ၊ ဘာကြောင့်များ ဘယ်လိုဖြစ်နေတယ်ဆိုတာလည်း ကျနော်တို့မသိဘူး။ ကျနော်တို့က ဥပဒေနဲ့နည်းဥပဒေကို ရေးဆွဲဖို့ကျနော်တို့လွှတ်တော်မှာ အကြိတ်အနယ်ကြိုးစားနေပါတယ်။

ဦးကျော်ဇံသာ။ ။ ဥပဒေရေးဆွဲတယ်ဆိုတာကတော့ အချိန်လည်းယူရအုံးမယ်။ လောလောဆယ်မှာဖြစ်နေတဲ့ကိစ္စတွေ၊ သေနေကြတာနဲ့ပတ်သက်ပြီးတော့ တရားဥပဒေစိုးမိုးအောင် မလုပ်နိုင်ဘူးလားခင်ဗျာ။ ဒီအစိုးရတက်လာပြီးကတည်းက- မတက်လာခင်ကတည်းကလည်း အမျိုးသားဒီမိုကရေစီအဖွဲ့ချုပ်ခေါင်းဆောင်က တရားဥပဒေစိုးမိုးရေးဟာ သိပ်အရေးကြီးတယ်၊ ဒါကို အဓိကလုပ်မယ်ဆိုတာ ပြောနေတာ။ အခုထိ တရားဥပဒေစိုးမိုးရေးတိုးတက်မလာတာ ဘာကြောင့်လို့ ထင်မိပါသလဲ။ ကိုဇော်မျိုးထက်။

ကိုဇော်မျိုးထက်။ ။ ကျနော် ဥပမာလေးတခုနဲ့ပြောချင်တယ်ဗျ။ ကျနော်တို့ ကားအကောင်းစားကြီးတစီး ဝယ်ပေးထားလည်း မောင်းတတ်တဲ့သူတက်မောင်းမှ၊ ဂရုတစိုက်နဲ့မောင်းမှ တိုက်ခိုက်မှုဆိုတာမျိုး မဖြစ်ဘူးဗျာ။ နောက်ပြီးတော့ ဆိုးကျိုးတွေ မဖြစ်လာနိုင်တာပေါ့။ အခုလည်းဒီအတိုင်းပဲ၊ NLD အစိုးရက မဲအပြတ်အသတ နိုင်ပြီးတော့ အစိုးရတရပ်ဖြစ်လာတယ်ဆိုပေမယ့် အခုနပြောသလို သူတို့ ဥပဒေပဲပြုနေတယ်၊ ဥပဒေတွေက အကောင်းဆုံးတွေပြုနေတယ်၊ မှန်တယ်။ ဒါပေမယ့် အဲဒီဥပဒေတွေကို တကယ်လိုက်နာဆောင်ရွက်ရမယ့်ဟာ က နံပါတ် (၁) ပြည်ထဲရေးပေါ့နော်။ ပြည်ထဲရေးလက်အောက်ခံမှာရှိတဲ့ အဖွဲ့အစည်း ထွေ/အုပ်လို ဟာမျိုး ပေါ့ နော်။ … အများကြီးပေါ့နော်။ အစစ အဲလိုအဖွဲ့အစည်းမျိုးတွေက ကျနော်တို့ဖားကန့်မှာ တကယ်လိုက်ပြီး လုပ်တာ မရှိဘူး။ လောင်းကစား၊ မူးယစ်ဆေးဝါးပေါ့နော်- အစစ အရာရာ အကုန်လုံးတခုမှ စိုးမိုးမှု မရှိသေးဘူး။ လက်ရှိလည်းမရှိဘူး။ နောင်လည်း ရှိမယ့်အလားအလာမရှိဘူးလို့ပဲ ကျနော်ပြောချင်တယ်ဗျာ။ ဖားကန့်အနေအထားက။

ဦးကျော်ဇံသာ။ ။ ဒီလို အခြေအနေဆိုးနေတာနဲ့ပတ်သက်ပြီးတော့ ဥပဒေပြုအဖွဲ့အစည်းဆိုတဲ့လွှတ်တော်။ ပြည်သူ့လွှတ်တော်၊ အမျိုးသားလွှတ်တော် - လွှတ်တော်နှစ်ရပ်လုံးဆိုပါတော့။ ဒီမှာ အာဏာပိုင်အဖွဲ့အစည်းပါပဲ၊ နိုင်ငံတော်မှာ အဆင့်အမြင့်ဆုံးအာဏာပိုင်အဖွဲ့အစည်းဟာ တကယ်တော့ လွှတ်တော်ပါ။ ဒီမိုကရေစီစနစ်အရ ပြောရမယ်ဆိုရင် - ဆိုတော့ ဦးခင်မောင်မြင့်တို့ ပြည်သူ့လွှတ်တော် ကိုယ်စားလှယ်တွေအနေနဲ့ ဥပဒေပြုရုံ ကလွဲလို့ ဒီဥပဒေကို အကောင်အထည်မဖော်တဲ့ကိစ္စကိုရော ထိထိရောက်ရောက်လက်ညှိုးထိုးပြီး မပြောနိုင်ဘူးလားခင်ဗျ။ ဘာဖြစ်လို့ လက်တွေ့အကောင်အထည်မဖော်နိုင်ဘူးလဲဆိုတာ။

ဦးခင်မောင်မြင့်။ ။ ဒီဥစ္စာလည်း ပြောရမယ်ဆိုလို့ရှိရင်ဗျာ။ ကျနော်တို့ အလုပ်တွေမှာတော့ ပူးပေါင်းလုပ်ရမှာပေါ့ ဗျာ။ အခုနက ကိုဇော်မျိုးထက်ပြောသလိုပေါ့ဗျာ။ အုပ်ချုပ်ရေးပိုင်းက ပြည်ထဲရေးတို့၊ အဓိက ကတော့ တပ်မတော်ပေါ့ဗျာ။ အမှန်မှာ သူတို့နိုင်ငံကောင်းဖို့ကတော့ ဗိုလ်ချုပ်အောင်ဆန်းတည်ထောင်ခဲ့တဲ့ တပ်မတော်ပဲဗျာ။ ဗိုလ်ချုပ်အောင်ဆန်းသမီးလက်ထက်မှာတော့ အားလုံးပူးပေါင်းပြီးမှလုပ်ရင်တော့ ပိုကောင်းမယ်လို့တော့ ကျနော်မြင်တယ်။ ကန့်လန့်ကန့်လန့်လုပ်နေမယ်ဆိုရင်တော့ ကျနော်တို့တိုင်းပြည်ကြီးက ဒိထက်မက ဆင်းရဲတွင်းနက်အုံးမှာပဲ။ အဓိက ကျနော်တို့တိုင်းသူပြည်သားတွေ ဒုက္ခရောက်မှာပေါ့ဗျာ။ အဲဒီ အခြေအနေမျိုးဆိုတော့ အားလုံးပူးပေါင်းပြီးမှလုပ်မယ်ဆိုရင်တော့ ပြည်သူပြည်သားတွေအတွက်လည်း ဝမ်းပမ်းတသာနဲ့ အကုန်လုံးကဖွံ့ဖြိုးတိုးတက်တဲ့နိုင်ငံတော်ကြီးဖြစ်မယ်လို့ပဲ ကျနော်မြင်ပါတယ်။

ဦးကျော်ဇံသာ။ ။ ဆိုတော့ အခုအခါမှာ တပ်မတော်က ပူးပေါင်းဆောင်ရွက်မှုမရှိဘူးဆိုတဲ့သဘောလားခင်ဗျာ။ ထိပ်ပိုင်းကမပူးပေါင်းတာလား။ ဒေသခံတပ်တွေက မပူးပေါင်းတာလား။ သူတို့ရဲ့အခွင့်အလမ်းတွေအတွက် ဒါဟာ တမင်တကာလျစ်လျှူရှုပြီးတော့ ဖွင့်ထားကြသလားဆိုတာလည်း ဆန်းစစ်ကြည့်ဖို့လိုတယ်ထင်ပါတယ်။ ကိုဇော်မိုးထက် ဘယ်လိုမြင်ပါသလဲ၊ အဲဒီကိစ္စကို။

ကိုဇော်မိုးထက်။ ။ အဓိက-ကတော့ တပ်ရဲ့သဘောတရားကတော့ ဒီထိပ်ပိုင်းကနေမှ အောက်ကိုဆင်းတာ ပေါ့ဗျာ။ သူတို့ အမိန့်အာဏာ Command တွေနဲ့သွားတာကိုးဗျ။ အဲဒီတော့ ကျနော်တို့ဖားကန့်မှာ ဘယ်လို အခြေအနေဖြစ်နေတုန်းဆိုတော့ ကုမ္ပဏီတွေမှာကျတော့ တပ်မတော် တပ်ရင်းတပ်စုတွေက ကုမ္ပဏီအတွင်းမှာ လုံခြုံရေးယူပေးတာမျိုးတွေရှိတယ်ပေါ့ဗျာ။ အထူးသဖြင့် ကျောက်စိမ်းလုပ်ကွက်တွေထဲမှာ ရေမဆေးတွေ ဝင်ရှာလို့ရှိရင် ဖမ်းတယ်၊ ဆီးတယ်၊ ရိုက်တယ်၊ နှက်တယ်၊ ပါတဲ့ပစ္စည်းတွေသိမ်းတယ်ပေါ့ဗျာ။ အဲဒီတော့ ကျနော်တို့ဖြစ်စေချင်တာက အခုဆိုလို့ရှိရင် ၂၃ ရက်နေ့က ရာအိမ်မှူး မနန္ဒာလှိုင်ပစ်သတ်ခံရတယ်။ လက်နက်နဲ့ ပစ်သတ်သွားတဲ့ကိစ္စပဲ။ အဲဒီတော့ ဒီဟာသည် ကျနော်တို့ဖားကန့်မှာဆိုလို့ရှိရင် အထူးသဖြင့် စစ်ဆင်ရေး နယ်မြေပဲ ပြောရမလား။ ဒီလို တပ်တွေအများကြီးရှိနေတဲ့အချိန်မှာ အစိုးရရဲ့ ဝန်ထမ်းတယောက်ကို ဒီလိုမျိုး ပစ်သတ်သွားခံရတဲ့ကိစ္စတွေပေါ့နော်- ဒါမျိုးကိစ္စတွေမှာ ကြည့်လိုက်တာနဲ့ ပြည်သူလူထုရဲ့ အသက်အိုးအိမ် လုံခြုံမှု ရှိလားမရှိလားဆိုတာက အများစဉ်းစားလို့ရတယ်။ တွေးစရာကိစ္စတခုပေါ့။ အဲဒီအတွက် တပ်က တရားဥပဒေစိုးမိုးမှုအပိုင်းတွေမှာ စစ်ဆင်ရေးနယ်မြေမို့ ပူးပေါင်းပါဝင်မှုမရှိဘူးဆိုလို့ရှိရင် ပြည်ထဲရေးလိုဟာမျိုးက ဘာဖြစ်လို့ ဒီကိစ္စတွေကို မဆောင်ရွက်တာလဲ။ ကျနော်တို့ မေးခွန်းထုတ်စရာဖြစ်လာပြီပေါ့နော်။

ဦးကျော်ဇံသာ။ ။ အဲဒီမေးခွန်းမျိုးကို လွှတ်တော်မှာမမေးဘူးလားခင်ဗျ။ ဦးခင်မောင်မြင့်။

ဦးခင်မောင်မြင့်။ ။ ကျနော်တို့လည်းဒီမှာ အားလုံးမေးကြတာပါပဲ။ တပ်နဲ့ဆိုင်တဲ့ဟာလည်း အကုန်လုံးမေးကြတာပါပဲ။ တပ်နဲ့အကောင်းဆုံးပူးပေါင်းဆောင်ရွက်ဖို့တော့ ကျနော်တို့လည်းလုပ်နေပါတယ်။ ဒါပေမယ့် ခက်တာဗျာ အကုန်လုံးက အချိန်လေးစောင့်စောင့်ပြီးမှ လုပ်နေရတဲ့အချိန်ကျတော့ ဖြစ်တဲ့ဥစ္စာက သိပ်ပြီးမှ မြန်ဆန်နေပြီးမှ ကျနော်တို့ဥပဒေပြုတာက နှေးနေတဲ့အတွက် အဲဒါကလည်းတမှောင့်ပဲဗျ။ အဲဒါကလည်း ပြောမယ်ဆိုရင် ကျနော်တို့လွှတ်တော်ဘက်က နည်းနည်းလိုအပ်တာပေါ့ဗျာ။

ဦးကျော်ဇံသာ။ ။ ဥပဒေပြုမှဖြစ်မှာလား။ အဲဒါမျိုးကိစ္စကျတော့ ဒါကို စုံစမ်းရေးကော်မရှင်လုပ်ပြီး ဘယ်လိုလုပ်ပေးပါ၊ ဘာညာလို့ လွှတ်တော်က တပ်ကို ပြောခွင့်မရှိဘူးလားခင်ဗျ။

ဦးခင်မောင်မြင့်။ ။ ရှိပါတယ်ခင်ဗျ။ ဒါပေမယ့်လည်း ကျနော်တို့လည်း ကြိုးစားတော့နေပါတယ်။ ဘာကြောင့်လဲဆိုတော့ ဒီမှာလည်း အခက်အခဲပေါင်းမြောက်များစွာဖြစ်နေတဲ့အချိန်ကျတော့ ပြောမယ်ဆိုလို့ရှိရင် - ဘယ်ဟာဦးစားပေးရမှန်းမသိဘူး၊ အကုန်လုံးက အရှုပ်ထုတ်ကြီးက ကျနော်တို့ဘက်မှာကျန်ခဲ့တယ်ဆိုတော့ အဲဒီအရှုပ်ထုတ်ကြီးကို ရှင်းနေရတာပေါ့ဗျာ။

ဦးကျော်ဇံသာ။ ။ ဟုတ်ကဲ့။ ဒါပေမယ့် အခုလောလောဆယ်မှာတော့ လူတွေသေနေရတဲ့ကိစ္စလေ- ဒီကိစ္စကတော့ ဦးစားပေးဖြစ်သင့်တယ်ပေါ့၊ မဟုတ်ဘူးလား။

ဦးခင်မောင်မြင့်။ ။ ဟုတ်ကဲ့ပါ။ ဖြစ်သင့်ပါတယ်။

ကိုဇော်မိုးထက်။ ။ ကျနော် နည်းနည်းလောက်ပြောချင်တယ် ရမလား။

ဦးကျော်ဇံသာ။ ။ ပြောပါ။

ကိုဇော်မိုးထက်။ ။ ဦးခင်မောင်မြင့်တို့ - ဒီ အမျိုးသားလွှတ်တော်၊ ပြည်သူ့လွှတ်တော်-စတဲ့ အလုပ်များတာတော့ မှန်တယ်။ ကျနော်တို့က ပထမဦးစားပေးရမယ့်အလုပ်ဆိုတာက ကျနော်တို့အကြံပြုချင်တာပေါ့နော်၊ ဖားကန့်မှာဆိုလို့ရှိရင် လူတွေသေလိုက်ပြီဆိုလို့ရှိရင် အစုလိုက်အပြုံလိုက်သေတယ်ပေါ့နော်၊ အဲဒီတော့ လူသေဆုံးမှုတွေ အရမ်းမြင့်တက်နေတယ်။ ဒီမြင့်တက်နေတာနဲ့ပတ်သက်ပြီးတော့ ကျောက်စိမ်းတူးဖော်ရေး ယန္တရားတွေနဲ့ လုပ်တဲ့ကိစ္စမှာ ဥပဒေနဲ့မညီညွတ်ဘူး။ ကျနော်တို့လည်း သိနေတာပဲ။ ဦးခင်မောင်မြင့်တို့ကိုယ်တိုင်လည်း ကွင်းဆင်းစစ်ဆေးကြည့်တယ်၊ အမြင်အားဖြင့်လည်း ဒါတွေဟာ မညီညွတ်နိုင်ဘူး။ မညီညွတ်နိုင်ဘူးဆိုတော့ ဒီလိုကုမ္ပဏီမျိုးတွေကို တရားဥပဒေနဲ့အညီ တူးဖော်ဖို့ စက်ယန္တရားက တဧကဆိုဘယ်လောက်တူးဖော်ရမယ်၊ ဘယ်လောက်လုပ်ရမယ်ဆိုတဲ့ဟာမျိုးတွေကို ကြပ်ကြပ်မတ်မတ်ထိန်းကွပ်မယ့်အဖွဲ့အစည်းတခုကို အရင်ဦးစွာ ဖွဲ့ပြီးမှ ဒီကုမ္ပဏီတွေရဲ့လုပ်ဆောင်ချက်နဲ့ ပတ်သက်ပြီးတော့ ငွေကြေးစီးဆင်းမှုတွေကအစ၊ ကျောက်စိမ်းတူးဖော်ရရှိတာတွေကို နိုင်ငံတော်နဲ့ ဘယ်လိုအဖွဲ့အစည်းတွေနဲ့ ဘယ်လိုချိတ်ဆက်ပြီးတော့ နိုင်ငံတော်ကို ဘယ်လိုအပ်တယ်ဆိုတဲ့ဟာမျိုးတွေက အစ NLD ပါတီအနေနဲ့ ချုပ်ကိုင်တာကိုအရင်လုပ်မယ်ဆိုလို့ရှိရင် ဖားကန့်ရဲ့လက်ရှိအနေအထားဟာ…..

ဦးခင်မောင်မြင့်။ ။ အဲဒါ ကျနော်တို့လုပ်နေပါတယ်။ ကျနော်တို့အကုန်လုံး တိုင်ပင်ဆွေးနွေးနေပါတယ်။ ဘာကြောင့်လဲဆိုလို့ရှိရင် ကျနော်တို့လည်း နေ့စဉ်ဆွေးနွေးပြီးမှ လုပ်နေတယ်။ ခက်တာက ကျနော်လည်း လွှတ်တော်မှာလည်း မေးခွန်းမေးပြီးပြီ။ ကျနော်တို့ဆီမှာလည်း ဘယ်လိုခေါ်မလဲဆိုတော့ ဟိုနေ့လုပ်မယ်၊ ဒီနေ့လုပ်မယ်နဲ့တချို့ဟာတွေကျ သယံဇာတနဲ့ ပတ်ဝန်းကျင်ကော်မတီ- ကလည်း နည်းနည်းနည်းနည်း တချို့ရွှေ့ဆိုင်းနေတာလေးတွေရှိတယ်။ ကျနော်တို့လည်း ဒါကို အမြန်ဆုံးတော့ ဖြစ်အောင် ကျနော်တို့ လုပ်နေပါတယ်။ ပြောမယ်ဆိုလို့ရှိရင် ဒီဥစ္စာကြီးက ကျနော်တို့ဖားကန့်ကြီးမှာ ကမ္ဘာပျက်သလို ဖြစ်နေတယ်။ ကျနော်လည်း အဲဒီမှာတော့ ပြောနေတာပဲ။ အားလုံးအဆင်ပြေလာမယ်လို့တော့ ထင်တာပဲ။ လောလောဆယ် ကတော့ သူတို့ကလည်း ဒီလုံခြုံရေးအကြောင်းပြပြီးတော့မှ ကျနော်တို့ကို သွားတဲ့လာတဲ့နေရာမှာလည်း တပ်ကနေပြီးတော့မှ ဘယ်လိုခေါ်မလဲဆိုတော့ ဝန်ကြီးသွားတာတောင်မှ လုံခြုံရေးမပေးနိုင်ဘူး-ဆိုပြီးပြန်ခဲ့ရတော့ ကျနော်တို့က အဲဒီအချက်ကို စဉ်းစားနေတယ်။ ကောင်းမယ်ဆိုလို့ရှိရင် ဒီဥစ္စာတွေကတော့ လုံခြုံရေးအပြည့်အဝပေးပြီးမှ ကျနော်တို့ချက်ခြင်းသွားဖို့ ကောင်းပါတယ်။

ဦးကျော်ဇံသာ။ ။ ဟုတ်ကဲ့။ ဆိုတော့ တကယ်ပဲလုံခြုံရေးအခြေအနေသိပ်ဆိုးနေသလား၊ တပ်ကတောင်မှ လုံခြုံရေးမပေးနိုင်လောက်အောင် ဆိုးနေပါသလား။ အဲဒီကအခြေအနေဟာ။

ဦးခင်မောင်မြင့်။ ။ အဲလိုဖြစ်နေတယ်။ ဘာဖြစ်လို့လဲဆိုတော့ ဝန်ကြီးသွားတာတောင်မှ မော်ဟန်၊ နမ့်ချီကိုသွားမယ့်အချိန်မှာ မြောက်ပိုင်းတိုင်းက သူတို့လုံခြုံရေးမပေးနိုင်ပါဘူးဆို စာထွက်လာပြီးတော့မှ ဝန်ကြီးတောင် မသွားလိုက်ရတဲ့ကိစ္စဖြစ်နေတော့ ကျနော်တို့လည်း စဉ်းစားရခက်နေပါတယ်။

ဦးကျော်ဇံသာ။ ။ ဟုတ်ကဲ့၊ ကိုဇော်မိုးထက်၊ အဲဒီတော့ အခြေအနေက တကယ်ဆိုးသလား အဲဒီမှာ။ မသွားနိုင် လောက်အောင် သူတို့က အကြောင်းပြတာလား။ အမှန်တကယ်ပဲ တိုက်ပွဲတွေဖြစ်နေလား၊ အခြေအနေဆိုး နေသလား၊ အဲဒါသိချင်ပါတယ်။ လုံခြုံရေးအနေအထားကတော့ ကျနော်တို့ ဒီလောက်ကြီးမဆိုးပါဘူးဗျ။ ဖားကန့်မှော် ဧရိယာမှာက သွားလာနေတာပဲ။ အများကြီးလည်း ဝေးဝေးလံလံသွားစရာမဟုတ်ပါဘူး။ အလွန်ဆုံး ရှိရင် ဝေခါလိုဟာမျိုးတောင် သွားလို့ရတယ်ဗျာ။ ကျန်တဲ့နေရာက ဘာမှ ပြဿနာမရှိဘူး။ လုံခြုံရေးပေးလို့ရတယ်။ သွားလို့ရတယ်။ စစ်တပ်ကအကြီးအကဲတွေသွားရင်တောင်မှ ဘာပဲပြောပြောဗျာ၊ လုံခြုံရေးနဲ့သွားရတာပဲ။ ဒါက တကယ်ကို နိုင်ငံတိုးတက်စေချင်တယ်ဆိုရင် ပြည်သူလူထု ရွေးချယ်တင်မြှောက်ထားတဲ့ ကိုယ်စားလှယ်တွေ တကယ်ကွင်းဆင်းစစ်ဆေးဆိုလို့ရှိရင် ဘာပဲပြောပြော စစ်တပ်အနေနဲ့ကတော့ ဖြစ်သင့်တယ်လို့ပဲ ကျနော်တို့ကမြင်တယ်ဗျ။

ဦးကျော်ဇံသာ။ ။ ဟုတ်ကဲ့။ ကျနော် နောက်ဆုံးမေးခွန်းတခုစီမေးချင်ပါတယ်။ အဲဒီတော အခု ကိုဇော်မိုးထက်က ပြောပါတယ်၊ ဦးခင်မောင်မြင့်၊ လုံခြုံရေးပေးလို့ရပါတယ်၊ ဘာကြောင့်မပေးနိုင်လဲဆိုတော့ ဒီစစ်တပ်က အခုလိုလုပ်နေတာ ၊ နောက် စစ်တပ်ရဲ့လက်အောက်မှာရှိနေတဲ့ပြည်ထဲရေးတို့ ရဲတို့က ဒီကိစ္စကို မဟန့်တားနိုင်တာဟာ သူတို့ရဲ့ ငွေရေးကြေးရေး အကျိုးစီးပွား အကျိုးအမြတ်အတွက် လုပ်နေတာလား။ အောက်ခြေကတပ်ဖွဲ့တွေပဲလား၊ ဟိုးထိပ်ပိုင်းက ညွှန်ကြားချက်ဆိုတော့ ထိပ်ပိုင်းအထိ သူတို့အရပ်စကားနဲ့များ ခွံ့ထားလို့များ တမင် မျက်ကွယ်ပြုနေကြသလားဆိုတဲ့မေးခွန်းကိုပဲ ကျနော်မေးချင်ပါတယ်။ ဦးခင်မောင်မြင့်ရဲ့သဘောထားကိုပြောပါ။ နောက်ဆုံးအနေနဲ့။

ဦးခင်မောင်မြင့်။ ။ ဒီမှာတော့ အချက်အလက်ပေါင်းစုံ ပါမှာပေါ့ဗျာ။ ဘာလဲဆိုလို့ရှိရင် သူတို့ရတဲ့အပိုင်းလည်း ရှိမှာပေါ့ဗျာ။ အပေါ်ကညွှန်ကြားတဲ့အပိုင်းလည်းရှိမယ်။ ကျနော်တို့က သေချာတော့မသိဘူး။ ဒါပေမယ့် တခုရှိတာတော့ သူတို့လည်း အဲဒီမှာနေတယ်ဆိုတော့ လမ်းကြောင်းတခုခုကတော့ သူတို့ကိုတော့ ပိတ်ဆို့တဲ့လမ်းကြောင်းတော့ရှိမှာပေါ့ဗျာ။ ဒီလို ဒီလိုလုပ်၊ ဒီလို ဒီလိုလုပ်-ဆိုတာ၊ ဘာညာ ကွိကွ…ဒါ လောပန်းတွေနဲ့ လုပ်ငန်းရှင်တွေနဲ့ဆိုတာ။ လုပ်ငန်းရှင်တွေကလည်း သူတို့ရဲ့လုပ်ငန်းကို မတွေ့ရအောင် အမျိုးမျိုးဖန်တီးမှာပဲလေ။ အဲဒါတွေကတော့ ဂယက်ရိုက်မှုဟာ နောက်ဆုံးကျတော့ သူတို့က လုံခြုံရေးမပေးနိုင်ဘူးဆိုတာ ဖြစ်လာတာ။ ဒါပါပဲ။

ဦးကျော်ဇံသာ။ ။ ဟုတ်ကဲ့။ ဆိုတော့ လောပန်းတွေက ဟိုးထိပ်ပိုင်းအထိ ခွံ့သလားသူတို့က။

ဦးခင်မောင်မြင့်။ ။ အာ-သူတို့က အကုန်လုံးပိုင်တဲ့သူတွေချည့်ပဲ။ အဲဒီမှာ မပိုင်တဲ့လူဆိုတာ မရှိဘူး။ အဲဒီမှာလုပ်နေတဲ့ကုမ္ပဏီပိုင်ရှင်တိုင်းဟာ အကုန်လုံး ထိပ်ဆုံးအထိ ပိုင်တဲ့လူတွေချည့်ပဲ။ ထိပ်ဆုံးအထိ မပိုင်တဲ့လူဆိုတာမရှိဘူး။

ဦးကျော်ဇံသာ။ ။ ကိုဇော်မိုးထက်ရေ၊ အဲဒီကိစ္စနဲ့ပတ်သက်ပြီး နောက်ဆုံးမှတ်ချက်လေး ကြားချင်ပါတယ်။

ကိုဇော်မိုးထက်။ ။ ဖားကန့်မှာရှိတဲ့ ကျောက်စိမ်းတူးဖော်ရေးကုမ္ပဏီတွေက ဖားကန့်ဒေသမှာအုပ်ချုပ်နေတဲ့ ငရကလိုမျိုး ပြည်ထဲရေးအဆင့် ရဲစခန်းလိုဟာမျိုးလောက်ကတော့ ကုမ္ပဏီထဲကို ဝင်ဖို့ တော်တော်ခက်ပါတယ်။ ဘာလို့ခက်နေရသလဲဆိုလို့ရှိရင် ဒီလိုကုမ္ပဏီပိုင်ရှင်တွေက အရင်တုန်းက နိုင်ငံတော်အဆင့်ရှိတဲ့ပုဂ္ဂိုလ်တွေရဲ့ အကျိုးအမြတ်ရှယ်ယာတွေ ဒီကုမ္ပဏီတွေထဲမှာပါနေတယ်။ ဒါကြောင့်လည်း ကျနော်တို့ထင်တာ တရားဥပဒေစိုးမိုးမှုမရှိဘဲနဲ့ ကျောက်တွေဟာ တရုတ်ပြည်ထဲကို မှောင်ခိုလမ်းကနေ ဒါရိုက် ခိုးထွက်ခွင့်ပြုနေတယ်။ အခုလည်း ထွက်နေတုန်းပဲ။ ပြီးခဲ့တဲ့တရက်နှစ်ရက်ကတောင်မှ ကျောက်ကားတွေ အများကြီးထွက်သွားတယ်။ အဲဒီတော့ ဒါတွေကိုကြည့်ခြင်းအားဖြင့် ပြည်ထဲရေးလိုဌာနမျိုးက ဒီကိစ္စတွေကို ဘာဖြစ်လို့ ကြပ်ကြပ်မတ်မတ် မကိုင်တွယ်နိုင်တာလဲဆိုတာ လက်ရှိအားဖြင့် အပေါ်ကညွှန်ကြားတာမျိုးရှိမယ်။ အောက်ကနေပြီးတော့လည်း သူ့ဟာနဲ့သူ အဆင်ပြေသလိုပေါ့နော်၊ ကြည့်ပေး၊ ကြည့်သွားတာမျိုးတွေလည်း ရှိမယ်။ အဲဒီအတွက် တရားဥပဒေစိုးမိုးမှုက အလွန်အားနည်းနေတယ်။ အဲဒီအတွက် နောက်လည်း အားနည်းနေအုံးမယ်လို့တော့ ကျနော်က ပြောချင်တယ်ဗျ။