ပဉ္စမအကြိမ်မြောက် ကျင်းပတဲ့ ၂၀၁၇ ခုနှစ် လူ့အခွင့်အရေးနဲ့ လူ့ဂုဏ်သိက္ခာ နိုင်ငံတကာ ရုပ်ရှင်ပွဲတော်ကို ပြီးခဲ့တဲ့ ဗုဒ္ဓဟူးနေ့ကစလို့ ဒီကနေ့ နောက်ဆုံးနေ့အဖြစ် ကျမတို့ သတင်းကြေညာနေချိန်မှာပဲ ဆုပေးပွဲ အခမ်းအနား ကျင်းပနေပါတယ်။
မြန်မာနဲ့ နိုင်ငံတကာက ရိုက်ကူးတဲ့ မှတ်တမ်းရုပ်ရှင်၊ ဇာတ်လမ်းတို ၆၄ ကားထဲကနေ ဆု ၆ ဆု ရွေးချယ် ပေးအပ်တာဖြစ်ပြီး ဒီအထဲမှာ VOA အမေရိကန်အသံ ကလည်း ဗွီအိုအေ မှတ်တမ်းရုပ်ရှင်ဆု ချီးမြှင့်မှာ ဖြစ်ပါတယ်။ ဒေါ်အောင်ဆန်းစုကြည်ဆု (နိုင်ငံတကာမှတ်တမ်းရုပ်ရှင်ဆု) ၊ ဒေါ်အောင်ဆန်းစုကြည်ဆု (ပြည်တွင်းမှတ်တမ်း ရုပ်ရှင်ဆု)၊ မင်းကိုနိုင် ဆု၊ ကျားမ အခွင့်အရေးတန်းတူညီဆု၊ ဟံသာတဝတီ ဦးဝင်တင်ဆု တွေ ရွေးချယ် ပေးအပ်တာမှာ ဒေါ်အောင်ဆန်း စုကြည်ဆု (နိုင်ငံတကာမှတ်တမ်းရုပ်ရှင်ဆု) ကိုတော့ - “မရမ်းခြံ - Waves of Transition” လို့ နံမည်ပေးထားတဲ့ ဧရာဝတီမြစ်ကမ်းဘေးက လှေဆိပ်အလုပ်သမားတွေအကြောင်း ရိုက်ကူးထားတဲ့ မှတ်တမ်းရုပ်ရှင်က ရရှိသွားပါတယ်။ ဒီကားကိုတော့ ဆွစ်ဇာလန်နိုင်ငံကနေ ဝင်ပြိုင်တာ ဖြစ်ပြီး ရိုက်ကူးသူကတော့ Jonas Scheu ဖြစ်ပါတယ်။
ဒေါ်အောင်ဆန်းစုကြည်ဆု (ပြည်တွင်းမှတ်တမ်း ရုပ်ရှင်ဆု) ကိုတော့ “Non Fossils - အသွေးအသားဖြင့် တည်ဆောက်သည်” ဆိုတဲ့ မိုးသစ်ဆက်ထွန်း ရိုက်ကူးတဲ့ မှတ်တမ်းရုပ်ရှင်က ရရှိသွားပါတယ်။ အခမ်းအနားကျင်းပနေဆဲဖြစ်လို့ ဗွီအိုအေ ရဲ့ဆု အပါအဝင် ကျန်တဲ့ဆုတွေ ဘယ်သူရမလဲ မသိရသေးပါဘူး။
ဒီကနေ့ လူ့အခွင့်အရေးနဲ့ လူ့ဂုဏ်သိက္ခာ နိုင်ငံတကာ ရုပ်ရှင်ပွဲတော် ဆုပေးပွဲ အခမ်းအနားကို နော်ဝေသံအမတ်ကြီးနဲ့ British Council ကိုယ်စားလှယ်တွေ၊ ရန်ကုန်တိုင်းအစိုးရ တာဝန်ရှိသူတွေနဲ့ လွှတ်တော်အမတ်တချို့လည်း တက်ရောက်နေကြတာ ဖြစ်ပါတယ်။