လွှတ်တော်ကိုယ်စားလှယ်တွေ အရည်သွေးပြည့်လာဖို့ NLDပါတီ စီစစ်ရေးအဖွဲ့ ဖွဲ့

အာဏာရ အမျိုးသားဒီမိုကရေစီအဖွဲ့ချုပ်အနေနဲ့ အစိုးရအဖွဲ့ဝင်များနှင့် လွှတ်တော်ကိုယ်စားလှယ်များ၏ လုပ်ငန်း စွမ်းဆောင်ရည် လေ့လာစီစစ်ရေး အဖွဲ့ဆိုပြီး ဖွဲ့စည်းခဲ့တာဟာ၊ ကိုယ်စားလှယ်တွေကို အပြစ်ရှာ ဖယ်ထုတ်ဖို့အဓိကမဟုတ်ပဲ အားနည်းချက်တွေရှိရင် ပါတီဖက်က ဖြည့်ဆည်း ပေးဖို့ဖြစ်တယ် လို့ အဲဒီအဖွဲ့ရဲ့ခေါင်းဆောင် NLD ဗဟိုအလုပ်အမှုဆောင်အဖွဲ့ဝင် ဦးဝင်းထိန်က ပြောပါတယ်။ NLD ခေါင်းဆောင် ဦးဝင်းထိန်ကို ဗွီအိုအေ သတင်းထောက် မမေခက တွေ့ဆုံမေးမြန်းစဉ် ဦးဝင်းထိန်က အခုလိုစဖြေပါတယ်။

ဦးဝင်းထိန်။ ။အဓိကတော့ အမျိုးသားဒီမိုကရေစီအဖွဲ့ချုပ် ၊ အဖွဲ့ဝင် လွှတ်တော်ကိုယ်စားလှယ်တွေအားလုံး သူတို့ရဲ့ လုပ်ငန်း ဆောင်ရွက်ချက်ကို သုံးသပ်ဖို့ ဘာကြောင့်သုံးသပ်ဖို့လိုသလဲဆိုတော့ အခုက လွှတ်တော်ကလည်း ၁ နှစ်ပြည့်ပြီ၊ အစိုးရအဖွဲ့ကလည်း ၁ နှစ်ပြည့်ခါနီးပြီ။ ပြည့်ခါနီးပြီ ဆိုတော့ ပြည်သူလူထုက တခဲနက်ထောက်ခံပြီးတော့ တက်လာတဲ့ အစိုးရအဖွဲ့၊ လွှတ်တော် နောက်ပြီးတော့ တိုင်းနဲ့ ပြည်နယ် ဒေသကြီးက ပုဂ္ဂိုလ်တွေ ရဲ့ ဆောင်ရွက်ချက် Performance က ဘယ်လိုရှိသလဲ၊ အဆင့်တန်း မြင့်မြင့်ရှိသလား၊ သာမန်လား၊ နိမ့်ကျသလား၊ အဲဒါတွေကို အဖွဲ့လိုက်လုပ်ပြီးတော့ စစ်ဆေးမှာပေါ့။ ဒေါ်အောင်ဆန်းစုကြည်ကို ထောက်ခံတဲ့ ပြည်သူလူထုရဲ့ မျက်နှာကို ကြည့်ပြီးတော့မှ အန်ကယ်တို့ သူတို့ရွေးလိုက်တဲ့ ပုဂ္ဂိုလ်တွေဟာ ပြည်သူလူထုဆန္ဒနဲ့ ဘယ်လောက်အထိ ကိုက်ညီအောင်လုပ်ပေး နိုင်သလဲဆိုတာကို အဓိကထားပြီးတော့ ဆန်းစစ် ဖော်ထုတ်တာပါ။ အဓိကတော့ ဒီအစိုးရတွေ၊ ဒီလွှတ်တော်တွေ အောင်မြင်မှုအတွက် ပဲ့ကိုင်နိုင်မယ့် လုပ်ရပ်လို့ အန်ကယ်ယူဆတယ်။

မမေခ။ ။ကျမ သိချင်တဲ့အပိုင်းက ခြေ မပေါ်တဲ့လူတွေ ရှိတယ် ဆိုပြီးတော့ တော်တော်လေးဝေဖန်နေကြတာ ရှိတယ်။ ဥပမာ- ဘယ်ဝန်ကြီးဌာန ကတော့ အလုပ်သိပ်မလုပ်ဘူး၊ မလုပ်နိုင်ဘူးဆိုတဲ့ဟာမျိုးတွေရှိတယ်။ အဲလိုလူတွေကရော ဒီအထဲမှာ အကျုံးဝင်ပြီး စစ်သွားမှာလား။

ဦးဝင်းထိန်။ ။ဒါကတော့ ပြည်ထောင်စုအဆင့်က ပုဂ္ဂိုလ်တွေ၊ ဒီ ပြည်ထောင်စုအဆင့်က ပုဂ္ဂိုလ်တွေကျတော့ ဒေါ်အောင်ဆန်းစုကြည်က ဦးစီးပြီးတော့ ဒီယန္တယားကြီးကို မောင်းနှင်နေတာပေါေ့နာ်။ အန်ကယ်တို့လည်း ကြားတာတွေရှိတယ်။ အန်ကယ်တို့တာဝန်က သူတို့အရည်အချင်းတွေ သူတို့လုပ်ငန်းဆောင်တာတွေကို သိတာတွေရှိတယ်။ မသိတာတွေကြတော့လည်း ဘယ်လောက်အထိ ခိုင်မာမှုရှိသလဲဆိုတာတွေကို လက်ခံပြီးတော့မှ ဒါတွေရတဲ့ဟာတွေက အန်ကယ်တို့အဖွဲ့က ဆုံးဖြတ်မှာမဟုတ်ဘူး၊ ဒေါ်အောင်ဆန်းစုကြည်ကို သတင်းပို့ရမယ် ဒါတပိုင်းပေါ့ ။ လွှတ်တော်ပိုင်းကျတဲ့အခါကျတော့ ပြည်သူ့လွှတ်တော်၊ အမျိုးသားလွှတ်တော်၊ အပြင် တိုင်းနဲ့ ဒေသကြီးအသီးသီးမှာရှိတဲ့ လွှတ်တော် ကိုယ်စားလှယ်တွေရဲ့ဆောင်ရွက်ချက်တွေဟာ တချို့က ရွေးကောက်ပွဲ ကြေညာစာတန်းမှာပါတဲ့အတိုင်း လိုက်မလုပ်နိုင်တဲ့ ၊ လိုက်မလုပ်တဲ့ ပုဂ္ဂိုလ်တွေကို အခုတွေ့နေရပြီ။ သူတို့ကိုတော့ သူတို့အနေအထားကို သုံးသပ်ပြီးတော့ Capacity building ပေါ့ သူတို့အရည်အချင်းမြှင့်တင်လာအောင် အန်ကယ်တို့ကနေ Guide Line ပေးမှာ။ ဒါပေမယ့် အဓိကတော့ သူတို့ကို အပစ်ရှာပြီးတော့ ဖယ်ထုတ်ဖို့မဟုတ်ဘူး။ သူတို့အားနည်းချက်တွေ့ရင် သူတို့ အားနည်းချက်ကို ဖြည့်ပြီးတော့မှ သူတို့အရည်အချင်းတိုးတက်လာအောင် လုပ်ဖို့ အဓိကရည်ရွယ်ချက်က အဲဒါပါပဲ။

မမေခ။ ။တကယ့် တကယ်တန်း အပြစ်တခုတခုရှိလာပြီဆိုရင် သိသလောက်က ဥပမာ-ငွေကြေးခဝါချတဲ့ ကိစ္စမျိုး ၊ လာဘ်ယူတယ်ဆိုရင် ဒါတွေက ဥပဒေအရ အရေးယူလို့ရတယ်။ ဆိုတော့ တခြားတခြားသော အလုပ်လုပ်တဲ့ ဟာမှာ မလုပ်နိုင်တာ၊ ကိုယ်မျှော်မှန်းထားသလောက် မလုပ်နိုင်တဲ့လူမျိုးတွေ ထွက်ပေါ်လာတယ်ဆိုရင် သူူတို့တွေကို ဘယ်လိုပုံစံမျိုးနဲ့ ဘဘတို့ care လုပ်သွားမှာလဲ။

ဦးဝင်းထိန်။ ။တရားဥပဒေနဲ့ ငြိပြီဆိုရင်တော့ ဒါ ငြိသလို ဆက်လုပ်သွားမှာပါ။ နောက်တခုက အခုလူမှုရေးကိစ္စနဲ့ ပတ်သက်ပြီး အသံတွေထွက်နေတာရှိတယ်၊ နောက်တခုက အဂတိနဲ့ ပတ်သက်လို့ အသံတွေထွက်နေတာရှိတယ်။ အဂတိနဲ့ ထွက်တာတွေကိုတော့ အမှန်အတိုင်းဖော်ထုတ်ပြီးတော့မှ တိတိကျကျ အရေးယူရမယ်။ အဲလို ယူတဲ့အခါမှာ ဒီလူတွေဟာ လွှတ်တော်ကိုယ်စားလှယ်တွေ ဖြစ်တဲ့အတွက်ကြောင့်မို့လို့ လွှတ်တော်ကိုယ်စားလှယ် အဖြစ်ကနေ အရည်အချင်း ပျက်ယွင်းတဲ့အထိတော့ လုပ်ဖို့က တော်တော်ခဲယှဉ်းတယ်။ ဒါပေမယ့် အဲဒီလွှတ်တော်ကိုယ်စားလှယ် ဆောင်ရွက်ခဲ့တဲ့ ဆောင်ရွက်ချက်အမှားကို အမှန်လမ်းကြောင်းရောက်အောင်ဆိုတာ အန်ကယ်တို့အဖွဲ့ရဲ့ အဓိက ရည်မှန်းချက်ပဲ။

မမေခ။ ။ဘဘ တို့အနေနဲ့ Rights To Recall လုပ်နိုင်ရဲ့သားနဲ့ ဘာဖြစ်လို့ ဒီလိုသီးသန့်လုပ်တာလဲ၊ အဲလို လုပ်တဲ့ အကြောင်းပြချက်လေးရော ရှင်းပြပေးလို့ရမလား။

ဦးဝင်းထိန်။ ။ Rights To Recall က အရင်လွှတ်တော်ကတည်းက Controversy ဖြစ်နေတဲ့ အငြင်းပွားနေတဲ့ ဥပဒေပေ့ါ ။ မူလဥပဒေမှာ ၁ ရာခိုင်နှုန်း၊ အဲဒီ ၁ ရာခိုင်နှုန်းက အငြင်းပွားနေကြတာ။ အခုဒီမှာကျတော့လည်း အန်ကယ်တို့က အစိုးရ စဖွဲ့တဲ့အချိန်ကစပြီး Rights To Recall ကို ဦးစားမပေးနိုင်ဘူး။ ပြန်ခေါ်ခွင့်ဟာ ၁ ရာခိုင်နှုန်း ဖြစ်သင့်သလား ၊ ၅ ရာခိုင်နှုန်း ၊ ၁၀ ရာခိုင်နှုန်း ဖြစ်သင့်သလားဆိုတာကို လွှတ်တော်မှာ အကြိတ်အနယ်ငြင်းရမယ်။ လွှတ်တော်မရောက်ခင်မှာ ဒီဥပဒေကြမ်းကော်မတီတွေမှာလည်း အကြိတ်အနယ်ငြင်းရမယ် ဆိုတာကို လနဲ့ချီကြာမယ်၊ အခုဟာက အန်ကယ်တို့ ပါတီအနေနဲ့ ကိုယ့်လွှတ်တော်ကိုယ်စားလှယ်တွေ ၊ ကိုယ့်အစိုးရတွေဟာ ပြည်သူလူထုဆန္ဒနဲ့ ကိုက်ညီတဲ့ အလုပ်လုပ်နိုင်မလား မလုပ်နိုင်ဘူးလားဆိုတာက ဆန်းစစ်ဖို့ဆိုတာ Rights To Recall လောက်ကတော့ ထိရောက်မှာ မဟုတ်သော်လည်း NLD ကိုယ်စားလှယ်တွေရဲ့ အရည်အချင်းက တက်လာဖို့တော့ သေချာပေါက် ပြောလို့ရတယ်။”

NLD ခေါင်းဆောင် ဦးဝင်းထိန်ကို ဗွီအိုအေ သတင်းထောက် မမေခက တွေ့ဆုံမေးမြန်း ထားတာပါ။

လွှတ်တော်ကိုယ်စားလှယ်တွေ အရည်သွေးပြည့်လာဖို့ NLD ပါတီ စီစစ်ရေးအဖွဲ့ ဖွဲ့