အမေရိကန် ဗီဇာကံစမ်းမဲ အစီအစဉ်စပြီ

၂၀၂၀ ပြည့်နှစ် အမေရိကန် ပြည်ဝင်ခွင့်ဗီဇာ ကံစမ်းမဲအစီအစဉ်အတွက် လျှောက်လွှာတွေ စတင်လက်ခံနေပြီဖြစ်ပြီး အောက်တိုဘာလ ၃ ရက်နေ့ကနေ နိုဝင်ဘာလ ၆ ရက်နေ့အတွင်း တင်သွင်းကြရမှာဖြစ်ပါတယ်။

လျှောက်လွှာတွေကို အွန်လိုင်းကနေပဲ ဖြည့်စွက်တင်သွင်းကြရမှာပါ။ သီးခြားစာရွက်နဲ့ဖြည့်ပြီး တခြားတနည်းနည်းနဲ့ တင်သွင်းလို့ မရသလို လျှောက်လွှာတင်သွင်းဖို့ အခကြေးငွေ လုံးဝပေးစရာမလိုပါဘူး။

၂၀၂၀ ပြည့်နှစ်အတွက် ဗီဇာကံစမ်းမဲအရေအတွက် ၅၀,၀၀၀ ဖွင့်မှာဖြစ်ပြီး တင်သွင်းတဲ့လျှောက်လွှာတွေထဲကနေ ကျပန်း ရွေးချယ်မှာပါ။ လျှောက်ထားခွင့်ရှိတဲ့ နိုင်ငံတွေထဲက ဘယ်နိုင်ငံမှတော့ ၇% ထက်ကျော်လွန်တဲ့ ဗီဇာကံစမ်းမဲပေါက်သူ အရေအတွက် ရမှာမဟုတ်ပါဘူး။

လျှောက်လွှာဖြည့်ပြီး တင်သွင်းရမယ့် ဝက်ဘ်ဆိုက် လိပ်စာကတော့ https://www.dvlottery.state.gov ဖြစ်ပြီး အဲဒီမှာ ညွှန်ကြားချက်တွေ အပြည့်အစုံရှိပါတယ်။

ဒီကံစမ်းမဲအစီအစဉ်ကို အသုံးချပြီး လိမ်လည်လှည့်ဖျားဖို့ ကြိုးစားတဲ့ တခြားဝက်ဘ်ဆိုက်တွေ အများအပြားရှိတာကြောင့် လျှောက်ထားသူတွေအနေနဲ့ https://www.dvlottery.state.gov ဝက်ဘ်ဆိုက်မှာပဲ အချက်အလက်တွေကို ဖတ်ရှုပြီး လျှောက်လွှာဖြည့် တင်သွင်းကြဖို့ အမေရိကန်နိုင်ငံခြားရေးဌာနက အထူးသတိပေးထားပါတယ်။

ရန်ကုန်မြို့၊ အမေရိကန်သံရုံးရဲ့ ဖေ့စ်ဘုတ်စာမျက်နှာဖြစ်တဲ့ U.S. Embassy Rangoon မှာလည်း ဒီအစီအစဉ်နဲ့ပတ်သက်ပြီး အသိပေးပြောဆိုထားတဲ့ ဗွီဒီယိုတခုတင်ထားပြီး “လျှောက်လွှာအတုအယောင်တွေနဲ့ ငွေယူလှည့်ဖြားသူတွေရဲ့သားကောင် မဖြစ်ပါစေနဲ့” လို့ သတိပေးထားပါတယ်။

အမေရိကန် ဗီဇာကံစမ်းမဲ အစီအစဉ်စပြီ