ကန်ဒီမိုကရက်ပါတီ သမ္မတလောင်း စကားစစ်ထိုးပွဲ ဒုတိယနေ့

ကြာသပတေးနေ့ညက ပြုလုပ်ခဲ့တဲ့ ဒီမိုကရက်ပါတီ သမ္မတလောင်းတွေရဲ့ ဒုတိယအသုတ် စကားစစ်ထိုးပွဲအတွင်း အမေရိကန်ဒုသမ္မတ Joe Biden ဟာ အဓိကပုဂ္ဂိုလ်အဖြစ် ရှိနေခဲ့ပါတယ်။ ဒါပေမယ့် ပြိုင်ဘက် ကိုယ်စားလှယ်လောင်း တဦးဖြစ်တဲ့ အထက်လွှတ်တော်အမတ် Kamala Harris က လွန်ခဲ့တဲ့ နှစ်ပေါင်း ၄၀ လောက်က လူဖြူမဟုတ်တဲ့ ကလေးငယ် ကျောင်းသားတွေကို ဘတ်စကားနဲ့ ကျောင်းကြို၊ ကျောင်းပို့ လုပ်ခဲ့တဲ့ကိစ္စကို ဥပမာပေးပြီး လူမျိုးရေးခွဲခြားဆက်ဆံတဲ့ လွှတ်တော်အမတ်တွေနဲ့ လက်တွဲ လုပ်ဆောင်ခဲ့တဲ့ကိစ္စအပေါ် ပြင်းထန်စွာ ဝေဖန် ပြောဆိုခဲ့ပါတယ်။

ကာလီဖိုးနီးယားပြည်နယ် ကိုယ်စားပြု အထက်လွှတ်တော်အမတ်လည်းဖြစ်၊ အစိုးရ ရှေ့နေဟောင်းလည်းဖြစ်တဲ့ Harris က အဲဒီလို လူမျိုးရေး ခွဲခြားဆက်ဆံံပြီး ပြေးဆွဲခဲ့တဲ့ ကျောင်းကားကို သူကိုယ်တိုင် စီးခဲ့ရတဲ့ အတွေ့အကြုံကို ဥပမာပေးပြီး ဒုသမ္မတဟောင်း Biden ကို ထိုးနှက် တိုက်ခိုက်ခဲ့တာပါ။

ဒါပေမယ့် သူ့အနေနဲ့ လူမျိုးရေးခွဲခြားဆက်ဆံမှုကို ထောက်ခံအားပေးခြင်း မရှိခဲ့ကြောင်းနဲ့ အဲဒီလို သူ့ကို စွပ်စွဲ ပြောဆိုတာဟာ မှားယွင်းကြောင်း Joe Biden က ပြန်လည် တုံ့ပြန်ခဲ့ပါတယ်။

၂၀၂၀ သမ္မတရွေးကောက်ပွဲမှာ ပါတီကို ကိုယ်စားပြုယှဉ်ပြိုင်နိုင်ရေး ကြိုးစားနေကြတဲ့ ဒီမိုကရက်ကိုယ်စားလှယ်လောင်း ၂၀ ရှိတဲ့အထဲ ဒုသမ္မတဟောင်း Joe Biden က ထိပ်ကနေ ဦးဆောင်နေတာကြောင့် သူ့ကို အများစုက ပစ်မှတ်ထား တိုက်ခိုက်နေကြတာလည်း ဖြစ်ပါတယ်။

လူထုစစ်တမ်းတွေမှာ Biden နောက်က ကပ်လိုက်နေတဲ့ တခြားကိုယ်စားလှယ်လောင်းတဦးဖြစ်သူ Bernie Sanders ကတော့ သမ္မတ Trump ဟာ လူလိမ်၊ လူညာ၊ လူမျိုးရေးခွဲခြား ဆက်ဆံသူလို့ ထိုးနှက် တိုက်ခိုက်ခဲ့ပါတယ်။

ဂျပန်နိုင်ငံ၊ Osaka မြို့မှာ G-20 ထိပ်သီးစည်းဝေးပွဲ တက်ရင်းက ဒီမိုကရက်တွေရဲ့ စကားစစ်ထိုးပွဲကို စောင့်ကြည့်နေတဲ့ သမ္မတ Trump ကတော့ ဒီမိုကရက်တွေ အားလုံးက သန်းနဲ့ချီတဲ့ တရားမဝင် ရွှေ့ပြောင်းနေထိုင်နေသူတွေကို အခမဲ့ ကျန်းမာရေးစောင့်ရှောက်မှု ပေးချင်နေကြတာလို့ ပြောပါတယ်။

ဒီမိုကရက်တွေနဲ့ သမ္မတ Trump အကြား ကျန်းမာရေးစောင့်ရှောက်မှုနဲ့ တရားမဝင် ရွှေ့ပြောင်း နေထိုင်သူတွေအရေးတို့ဟာ အကြီးမားဆုံး သဘောထားကွဲပြားနေတဲ့ အကြောင်းအရာတွေ ဖြစ်ပါတယ်။

ကန်ဒီမိုကရက်ပါတီ သမ္မတလောင်း စကားစစ်ထိုးပွဲ ဒုတိယနေ့