အရှေ့တောင်အာရှနိုင်ငံများအသင်း အာဆီယံ အစည်းအဝေး စတင်ကျင်းပနေတဲ့ လာအိုနိုင်ငံ ဗီယမ်ကျန်းမြို့တော် ကို မြန်မာနိုင်ငံရဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် ဒေသတွင်းနဲ့ နိုင်ငံတကာခေါင်းဆောင်တွေ ရောက်ရှိနေကြပြီး ဖွင့်ပွဲအခမ်းအနားကို တက်ရောက်နေကြပါတယ်။
ဒီကနေ့ အင်္ဂါနေ့မှာစတင်ဖွင့်လှစ်တဲ့ ၂၀၁၆ အာဆီယံညီလာခံ အခမ်းအနားကို တက်ရောက်လာကြတဲ့ နိုင်ငံအသီးအသီးကခေါင်းဆောင်တွေကို အာဆီယံရဲ့ အလှည့်ကျဥက္ကဌအဖြစ်တာဝန်ယူနေတဲ့ လာအိုနိုင်ငံ ဝန်ကြီးချုပ် Thongloun Sisoulith- က ကြိုဆိုနှုတ်ဆက်ခဲ့ကြပါတယ်။
အမေရိကန်၊ ရုရှား၊ အိန္ဒိယ၊ သြစတြေးလျ၊ နယူးဇီလန်၊ တောင်ကိုရီးယား၊ ဂျပန်နဲ့ တရုတ်နိုင်ငံက ခေါင်းဆောင်တွေနဲ့မတွေ့ဆုံခင် အာဆီယံ အဖွဲ့ဝင် ၁၀ နိုင်ငံက ခေါင်းဆောင်တွေသာ ပါဝင်တဲ့ ၁ ရက်တာ ဒေသတွင်းအစည်းအဝေးကို အရင်ဆုံးပြုလုပ်ကြမှာဖြစ်ပါတယ်။
ဒီညီလာခံဟာ မြန်မာနိုင်ငံရဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ဖိလစ်ပိုင်သမ္မတသစ် Rodrigo Duterte တို့ပထမဦးဆုံးအကြိမ် တက်ရောက်တဲ့ ညီလာခံဖြစ်ပါတယ်။ ညီလာခံအတွင်း အရှေ့တရုတ်ပင်လယ်ပြင် နယ်မြေပိုင်ဆိုင်မှုပြဿနာ၊ အကြမ်းဖက်မှုဝါဒတိုက်ဖျက်ရေး၊ ကုန်သွယ်ရေးနဲ့ လူ့အခွင့်အရေးနဲ့ဆိုင်တဲ့အကြောင်းအရာတွေကို ခေါင်းဆောင်တွေအနေနဲ့ ဆွေးနွေးသွားကြဖို့ရှိပါတယ်။