တရုတ်နဲ့ အိန္ဒိယ ၂ နိုင်ငံဆက်ဆံရေး တည်ငြိမ်အောင်လုပ်ဖို့ လိုအပ်တယ်လို့ တရုတ်အစိုးရ အကြီးတန်းတာဝန်ရှိသူ Wang Yi က အိန္ဒိယနိုင်ငံခြားရေးဝန်ကြီးနဲ့ တွေ့ဆုံစဉ် ပြောကြားခဲ့ပါတယ်။ တရုတ်နဲ့ အိန္ဒိယထိပ်တန်း သံတမန်တွေ အင်ဒိုနီးရှားနိုင်ငံမှာ ကျင်းပတဲ့ အာဆီယံဆွေးနွေးပွဲ ဘေးပန်းမှာ သောကြာနေ့က သီးသန့်တွေ့ဆုံခဲ့ကြတာပါ။ ၂ နိုင်ငံကြား ရှည်လျားတဲ့ နယ်နိမိတ် ထိဆက်နေသလို၊ ပိုင်နက်အငြင်းပွားမှုတွေလည်း ရှိနေပြီး စစ်ပွဲတွေလည်း ဖြစ်ခဲ့ဖူးပါတယ်။
၂ နိုင်ငံကြားမှာ သံသယတွေဖြစ်မယ့်အစား အပြန်အလှန် ပံ့ပိုးကူညီဖို့ လိုအပ်တယ်လို့ နိုင်ငံခြားမူဝါဒရေးရာတာဝန်ရှိသူ Wang Yi က အိန္ဒိယနိုင်ငံခြားရေးဝန်ကြီး Subrahmanyam Jaishankar ကို ပြောကြားခဲ့ကြောင်း တရုတ်နိုင်ငံခြားရေးဌာနက သတင်းထုတ်ပြန်ပါတယ်။
နယ်နိမိတ်ပြဿနာနဲ့ ပတ်သက်လို့ ၂ ဖက်လုံးက လက်ခံနိုင်တဲ့ အဖြေရအောင် ကြိုးစားသွားဖို့လိုတယ်လို့ Wang Yi က Jaishankar ကို ပြောကြားခဲ့ပါတယ်။ နယ်စပ်ကိစ္စနဲ့ ပတ်သက်လို့ စစ်တပ်အကြီးအကဲအဆင့် ဆွေးနွေးပွဲတွေ နောက်တကြိမ်လုပ်ဖို့ ၂ ဘက်လုံးသဘောတူခဲ့တယ်လို့လည်း တရုတ်နိုင်ငံခြားရေးဝန်ကြီးဌာနဘက်က ပြောပါတယ်။ ၂၀၂၀ ခုနှစ်မှာ ၂ ဘက် စစ်တပ်ကြားတိုက်ပွဲတွေ ဖြစ်ပွားခဲ့လို့ အိန္ဒိယစစ်သား ၂၀ နဲ့ တရုတ်စစ်သား ၄ ယောက်သေဆုံးခဲ့ပါတယ်။
အဲဒီနောက်ပိုင်း ၂ နိုင်ငံကြား သံတမန်တွေနဲ့ စစ်တပ်တာဝန်ရှိသူတွေ အကြိမ်ကြိမ် ဆွေးနွေးခဲ့ကြတဲ့အတွက် တင်းမာမှုတွေ ပြေလျော့ခဲ့ပေမဲ့ နယ်စပ်ကိစ္စက အတိမ်းအစောင်း မခံနိုင်သလို အန္တရာယ်များတယ်လို့ အိန္ဒိယအစိုးရက ဖော်ပြပြောဆိုထားပါတယ်။ ဒါပေမဲ့ အိန္ဒိယနိုင်ငံဟာ လက်ရှိမှာ တရုတ်ရဲ့ ဒုတိယအကြီးဆုံး ကုန်သွယ်ဘက်နိုင်ငံ ဖြစ်ပါတယ်။