ကမ္ဘောဒီးယား ဒေသန္တရရွေးကောက်ပွဲ အတိုက်အခံပါတီ အလားအလာကောင်း

Cambodia နိုင်ငံမှာ တနင်္ဂနွေနေ့က ကျင်းပခဲ့တဲ့ ဒေသန္တရရွေးကောက်ပွဲမှာ အဓိက အတိုက်အခံပါတီက သိသိသာသာအနိုင်ရနေပုံရတာကြောင့် အာဏာချုပ်ကိုင်ထားတဲ့ ဝန်ကြီးချုပ် Hun Sen အတွက်စိုးရိမ်စရာဖြစ်နေပါတယ်။

အတိုက်အခံ Cambodia National Rescue ပါတီက လူထုမဲ ၄၆% လောက်ရနေတယ်လို့ ကနဦးမဲရလာဒ်တွေကို ပါတီပြောခွင့်ရသူက ကြေညာခဲ့ပါတယ်။ အစိုးရလိုလားတဲ့သတင်း Website တခုကတော့ ကနဦးမဲရလာဒ်တွေမှာ အတိုက်အခံက ၃ ပုံ ၁ ပုံကျော်ပဲနိုင်ထားတယ်လို့ ဖော်ပြခဲ့ပါတယ်။ တရားဝင်မဲရလာဒ်တွေကတော့ June လ ၂၅ ရက်နေ့မှာ ကြေညာမှာဖြစ်ပါတယ်။

ရှေ့နှစ်မှာကျင်းပမယ့် အထွေထွေရွေးကောက်ပွဲ မတိုင်ခင် ဒေသန္တရအစိုးရရာထူး ၁ သောင်း ၂ ထောင်ကျော်ကိုရွေးချယ်တဲ့ အခုရွေးကောက်ပွဲကို အဓိက ပါတီကြီး ၂ ခုကြားအားပြိုင်မှုအဖြစ် မြင်နိုင်ပါတယ်။

လူငယ်ပိုင်းမဲပေးသူများလာတာနဲ့ ပြည်သူတွေရဲ့ အမြင်တွေပြောင်းလဲနေချိန်မှာ အခုဒေသန္တရရွေးကောက်ပွဲဟာ သူတို့အပေါ် လူထုရဲ့အားပေးမှုဘယ်လောက်ရှိသလဲဆိုတာ စမ်းသပ်တဲ့ပွဲအဖြစ် ဝန်ကြီးချုပ် Hun Sen နဲ့ သူ့ရဲ့ CPP ကမ္ဘောဒီးယားအမျိုးသားပါတီတို့က မြင်နေပါတယ်။ အခုရွေးကောက်ပွဲမှာ ပါတီပေါင်း ၁၂ ခုက ပါဝင်ယှဉ်ပြိုင်ခဲ့ကြပါတယ်။

ကမ္ဘောဒီးယား ဒေသန္တရရွေးကောက်ပွဲ အတိုက်အခံပါတီ အလားအလာကောင်း