တပ်မှူးတပ်သား ပြောစကား (၀၃၃)
ဒီကနေ့ ၂၀၁၀ နိုဝင်ဘာ(၇)ရက် ရွေးကောက်ပွဲနေ့မှာ တပ်မတော်သားတွေရဲ့ လွတ်လပ်စွာ မဲပေးနိုင်မှု အခြေ အနေနဲ့၊ ဒီကနေ့ ရွေးကောက်ပွဲရဲ့ ရလဒ်ကနေ ဖြစ်ပေါ်လာမယ့် အကျိုး ဆက်တွေကို၊ တပ်မတော်ရဲ့ တပ်မှူးဟောင်းတွေဖြစ်ကြတဲ့ အငြိမ်းစားဗိုလ်ချုပ်ကြီး သူရဦးတင်ဦး၊ အငြိမ်းစား ဗိုလ်ကြီး ဦးထွန်းစိန်၊ ဗိုလ်မှူးဟောင်း ဦးအောင်လင်း ထွဋ်တို့နဲ့ ဗီအိုအေနဲ့ ဆွေးနွေးထားပါတယ်။ ဒီဆွေးနွေးချက်တွေကို ဒီတပတ် “တပ်မှူးတပ်သား ပြောစကား” အပတ် စဉ် ကဏ္ဍမှာ “တပ်မတော်နဲ့ ပါတီစုံရွေးကောက်ပွဲများ အပိုင်း(၂)” ခေါင်းစဉ်နဲ့ ဦးရော်နီညိမ်း က စီစဉ်တင်ဆက်ထား ပါတယ်။
ဦးရော်နီညိမ်း။ ။ ဗိုလ်ချုပ်ကြီး တင်ဦး ခင်ဗျာ။
ဦးတင်ဦး။ ။ ကြားပါတယ်ခင်ဗျာ၊ ကျနော့်အသံက (၅) ပဲလား။
ဦးရော်နီညိမ်း။ ။ ဟုတ်ကဲ့၊ အန်ကယ့် အသံ (၅) ပါပဲ။ အသံ (၅) ပါ။
ဦးအောင်လင်းထွဋ်။ ။ ဗိုလ်ချုပ်ကြီး နေကောင်းတယ်နော်။ ကျနော် အောင်လင်းထွဋ် ပါ ခင်ဗျ။
ဦးတင်ဦး။ ။ ကိုအောင်လင်းထွဋ် ရေ၊ နေကောင်းကြရဲ့လား။ အားလုံး။
ဦးထွန်းစိန်။ ။ နေကောင်းပါတယ် ခင်ဗျ။
ဦးအောင်လင်းထွဋ်။ ။ နေကောင်းပါတယ် ဗိုလ်ချုပ်ကြီး ခင်ဗျ။
ဦးရော်နီညိမ်း။ ။ ဗိုလ်ချုပ်ကြီးလို့ မလုပ်ပါနဲ့၊ ဦးတင်ဦး ပါပဲဗျ။ ဦးတင်ဦး နေကောင်း နေပါတယ်။ ကျနော် နေ ကောင်းပါတယ်။ ခင်ဗျား အသံကြားရတာ ဝမ်းသာပါတယ်။ ကိုထွန်းစိန် ဆိုတာလည်း၊ အသံကြားရတာ ဝမ်းသာပါ တယ် ခင်ဗျ။
ဦးအောင်လင်းထွဋ်။ ။ ဟုတ်ကဲ့၊ အန်ကယ်လို့ပဲ ခေါ်တော့မယ် ခင်ဗျ။
ဦးရော်နီညိမ်း။ ။ ဒါ အခု တပ်မှူးဟောင်းတွေ ချည့်ပဲပေါ့ နော်၊ တပ်မှူးဟောင်းတွေ ကြီးသည်ဖြစ်စေ ငယ်သည် ဖြစ်စေ၊ ဆွေးနွေးကြတာပေါ့။ မြန်မာနိုင်ငံမှာ ပါတီစုံရွေးကောက် ပွဲလို့ ပြောလို့ရတဲ့ ရွေးကောက်ပွဲ (၅)ခု ကျင်းပခဲ့ပြီး ပါပြီ။ မြန်မာ့ဆိုရှယ်လစ်လမ်းစဉ်ပါတီခေတ်က ရွေးကောက်ပွဲကိုတော့ ကျနော်တို့ ထည့်မပြောတော့ဘူးပေါ့ နော်။ အဲဒီအခါကျတော့၊ ၁၉၄၇ ရှိတယ်၊ ၁၉၅၂ ရှိတယ်၊ ၁၉၅၆ ရှိတယ်၊ ၁၉၆၀ ရှိတယ်၊ ၁၉၉၀ ပါ ခင်ဗျ။ ဆိုတော့ အဲဒီ ရွေးကောက်ပွဲတွေနဲ့ ပတ်သက်ပြီးတော့ တပ်မှူးတွေက တပ်တွင်းမှာပဲ ဖြစ်စေ၊ တပ်ပြင် မှာပဲ ဖြစ်စေ၊ ကိုယ်ဖြတ်သန်းလာခဲ့ရတဲ့ အတွေ့အကြုံပေါ်မှာ သင်ခန်းစာယူစရာတွေကို နောင်လာနောင်သားတွေကို သမိုင်းအမွေအနှစ် အနေနဲ့ ပေးနိုင်ဖို့အတွက် ကျနော်က မေတ္တာ ရပ်ခံပြီးတော့ ဆွေးနွေးသွားမှာ ဖြစ်ပါတယ်။ ဗိုလ်မှူးအောင်လင်းထွဋ်တို့ အန်ကယ်ဦးတင်ဦးတို့ကတော့ ကြိမ်ဖန်များစွာ ရေဒီယိုတွေနဲ့ ထိတွေ့ပြီးသားဆိုတော့ တော်တော်များများ သိ နေပြီးသား ဖြစ်နေတော့၊ အန်ကယ်ဦးထွန်းစိန်က စိတ်ဝင်စားဖို့ ကောင်းပါတယ်။ AFP သတင်းဌာနက ဒေါ်လှလှဌေး ရဲ့ သတင်းဆောင်းပါးကို ဖတ်ရလို့ ကျနော်တို့ အန်ကယ့်ကို စတင် သိရှိရတာပါ။ အဲဒီတော့ အန်ကယ်က အခု အသက် (၈၇) နှစ်ရှိပြီ၊ ဘီအိုင်အေ ဘီဒီအေ ခေတ်ကတည်းကပေါ့နော်၊ အန်ကယ် ခု နောက်ဆုံး ၁၉၈၄ ခုနှစ်အထိကို တပ်ထဲမှာ တာဝန်ထမ်းဆောင်သွားတယ်လို့ သိရှိရပါတယ်။ အဲဒီတော့ အန်ကယ် အကျဉ်းချုံးပြီးတော့ နည်းနည်း မိတ်ဆက်ပြီး ပြောပြပေးပါလား ခင်ဗျာ။
ဦးထွန်းစိန်။ ။ ကျနော်က ၁၉၄၂ခုနှစ် ဖေဖော်ဝါရီလ(၂) ရက်နေ့မှာ ဘီအိုင်အေတပ်ထဲကို ကျိုက္ခမီကနေ ကျနော် ဝင်ရောက်လာခဲ့ပါတယ် ခင်ဗျ။ ဘီဒီအေ ကျတော့ သေနတ် ကိုင်တပ်ရင်း (၄)မှာပဲ ကျနော် နေရပါတယ်ခင်ဗျ။ နောက် ဘီဒီအေကနေ ကျနော် တတိယပတ် ဂျပန်ခေတ် စစ်တက္ကသိုလ် မင်္ဂလာဒုံမှာ ကျနော်တက်ပါတယ်။ ၁၉၄၄ ခုနှစ်ကျတော့ ကျနော် ကျောင်းဆင်းလာပါတယ်။
ဦးရော်နီညိမ်း။ ။ သြော် ဗိုလ်သင်တန်း ဆို၊ အန်ကယ် ဗိုလ်ချုပ်ကြီးတင်ဦးလည်းပဲ ကျနော်မှတ်မိသလောက်ကတော့ ဂျပန်ခေတ် စစ်တက္ကသိုလ် အပတ်စဉ် (၃) ပဲနဲ့ တူတယ်။
ဦးတင်ဦး။ ။ ဟုတ်ပါတယ်။
ဦးထွန်းစိန်။ ။ ဟုတ်ကဲ့ ခင်ဗျ၊ ဒါပေမယ့် ကျနော်တို့ တပ်စုချင်း ကွဲတယ် ခင်ဗျ၊ ကျနော်က တပ်စု (၁) မှာ။ ဦးတင်ဦးက တပ်စု (၃) လောက်မှာ နေမှာပေါ့။
ဦးတင်ဦး။ ။ မဟုတ်ဘူး၊ မဟုတ်ဘူး ခင်ဗျ။
ဦးထွန်းစိန်။ ။ ကျနော်တို့ ကျောင်းအုပ်ကတော့ ဗိုလ်ရန်နိုင်ပဲ။ ကျနော်တို့ ကျောင်းဆင်းတဲ့အချိန် ကျနော် လေယဉ်ပစ်အမြောက်တပ်ကို ရောက်ပါတယ်။ တာဝန်ယူရပါတယ်။ တော်လှန်ရေးလုပ်တော့ အထက်ဗမာပြည်တိုင်း ဗိုလ်ဗထူးနဲ့ အတူတူပါပဲ။ နောက် သေနတ်ကိုင်တပ်ရင်း(၄) ပျဉ်းမနားကို ရောက်ပါတယ်။ ဦးနေဝင်းက တပ်ရင်းမှူးပါ။
ဦးရော်နီညိမ်း။ ။ ဟုတ်ကဲ့ ခင်ဗျ။ ကျနော်ဖြတ်ပြီး မေးချင်တာက၊ အန်ကယ် အငြိမ်းစားယူတဲ့ ၁၉၈၄ ခုနှစ်မှာ ဘယ်အဆင့် နဲ့ အငြိမ်းစား ယူခဲ့ပါသလဲ၊ အန်ကယ်။
ဦးထွန်းစိန်။ ။ ကျနော် ဗိုလ်ကြီးအဆင့်နဲ့ ယူတာပါ။
ဦးရော်နီညိမ်း။ ။ ဟုတ်ကဲ့ အဲဒီတော့ တပ်ရင်း(၄)ကို စပြီးတော့၊ ဂျပန်ခေတ်ပြီးသွားလို့ တပ်ရင်း(၄) ဝင်တဲ့အချိန်ကျတော့ အန်ကယ် ဘာအဆင့်နဲ့ ရှိပါသလဲ အဲဒီမှာကျတော့။
ဦးထွန်းစိန်။ ။ ကျနော် ဆူပဒါ ပေါ့ ခင်ဗျ။ နှစ်ပွင့်ပေါ့။
ဦးရော်နီညိမ်း။ ။ အန်ကယ် ဦးတင်ဦးလည်း နည်းနည်းပြောပြပါဦး။ အဲဒီ ဂျပန်ခေတ် စစ်တက္ကသိုလ် အကြောင်း…..
ဦးတင်ဦး။ ။ တတိယပတ်ဗိုလ်သင်တန်းမှာတော့ ထွန်းစိန်ဆိုတာ တစ်ယောက်ရှိတယ်။ သူ့ကို ခေါင်းဖြူလို့ခေါ်တယ်။ အဲဒီ ထွန်းစိန်ကတော့ အခု သူရှိသေးသလား မရှိဘူး လားဆိုတာတော့ ကျနော်မပြောတတ်ဘူး။ သို့သော် တခုရှိတာကတော့ တပ်စု(၁)ကလူတွေ တော်တောများများကတော့ ကျနော့်ကို အားလုံးသိကြပါတယ် ခင်ဗျ။ ကျနော် ပြောတဲ့ ခေါင်းဖြူထွန်းစိန် ဆိုတာကတော့ ကျနော်နဲ့ ဘေးချင်းယှဉ်ပြီး နေခဲ့တဲ့သူပါ ခင်ဗျ။ ထားပါတော့လေ။ ဟို သူ ပြောတဲ့ အထဲမှာ အဲဒီကျောင်း(ဂျပန်ခေတ် မင်္ဂလာဒုံ စစ်တက္ကသိုလ်) က ဆူပဒါတို့ ဘာတို့ မရှိဘူးပေါ့ဗျာ။ ကျနော်တို့ကို တပ်ပြန်ဖွဲ့တဲ့အခါမှာ အိန္ဒိယနိုင်ငံမှာတော့ Governor Commissioned Officer (ဗြိတိသျှတပ်မတော်၏ ပြန်တမ်းဝင်အရာရှိ မဟုတ်ပဲ၊ အိန္ဒိယနိုင်ငံမှာ ဗြိတိသျှဘုရင်ခံက လက်အောက်ခံ ကိုလိုနီနိုင်ငံသားများကို ခန့်အပ်သည့် စစ်ဘက်ဆိုင်ရာ ပြန်တမ်းဝင်အရာရှိ) ဆိုရင် ဂျမဒါတို့ ဆူပဒါတို့ ဆူပဒါမေဂျာတို့ ပေးပြီးတော့ မှ သူ့တို့အထက်က အင်္ဂလိပ်က အုပ်ချုပ်တာပါ။ ဗိုလ်ချုပ်အောင်ဆန်းက ဒါမျိုးကို မလိုလားတဲ့အတွက် ဗမာ့တပ်မတော်သား အားလုံ ဟာ သူတို့ အင်္ဂလိပ်တပ်မတော်နဲ့ တန်းတူယူရ မယ်ဆိုတဲ့ အတွက်ကြောင့်မို့လို့ ကျနော်တို့က အင်္ဂလိပ်တပ်မတော်နဲ့ တန်းတူ ရတဲ့အတွက်ကြောင့်၊ ကျနော်တို့တပ်မှာ အားလုံး commission (ပြန်တမ်းဝင်အရာရှိအဖြစ် ခန့်အပ်ခံရ ခြင်း) ရတဟာ Second Lieutenant (ဒုဗိုလ်) Lieutenant (ဗိုလ်) Captain (ဗိုလ်ကြီး) ပေါ့၊ အဲဒီလိုတော့ ကျနော် သိတယ် ခင်ဗျ။
ဦးရော်နီညိမ်း။ ။ ဟုတ်ကဲ့ပါခင်ဗျ၊ အသက်အရွယ်အရ ပေါ့နော်။ မေ့တာ လွဲတာတွေ ရှိပါလိမ့်မယ်။ ကျနော်တို့ အခုပြောတဲ့ ဒီ issue ကို ခဏထားပြီးတော့၊ ကျနော်တို့ ဆွေးနွေးမှုခေါင်းစဉ်အတိုင်း ရှေ့ဆက်ကြရအောင်ပါ။
ဦးတင်ဦး။ ။ ကျနော်ကတော့ ကျနော်မှတ်မိသလောက် ပြောပြတာပါ။
ဦးရော်နီညိမ်း။ ။ ဟုတ်ကဲ့ပါ အန်ကယ်၊ ကျေးဇူးတင်ပါတယ်။
ဦးရော်နီညိမ်း။ ။ ဗိုလ်မှူးအောင်လင်းထွဋ် ခင်ဗျာ၊ ၁၉၉၀ ရွေးကောက်ပွဲကြီးကို လွတ်လပ်ပြီးတရားမျှတစွာပဲ လုပ်ပေးခဲ့တယ်။ တပ်မတော်က ၁၉၉၀ တုန်းက သင်ခန်းစာရ ထားတယ် ဆိုတာမျိုး၊ အဲဒီလို ပြောလို့ရသလား ခင်ဗျ။
ဦးအောင်လင်းထွဋ်။ ။ အဲဒီအချိန်တုန်းက ကျနော်တို့ အထက်လူကြီးတွေရဲ့ ခေါင်းထဲမှာလည်း တစညပါတီ နိုင်လိမ့်မယ်လို့ တွက်ထားပုံလည်း ပေါ်ပါတယ်။ အဲဒီ အချိန်အခါ မှာ ကျနော်တို့ သိရသလောက်ပေါ့လေ၊ ကျနော်တို့ကတော့ လူငယ်ပိုင်းပါ။ လူကြီးတွေ ပြောသံဆိုသံ ကြားတာကတော့ ဒီမဲရွေးပွဲ မတိုင်ခင်ပေ့ါဗျာ၊ ခန့်မှန်းချက်တွေကို သက်ဆိုင်ရာ ထောက်လှမ်းရေးဆိုလည်း ထောက်လှမ်းရေးတပ် နယ်မြေတွေ၊ ကျန်တဲ့ ကကကြည်းက တိုင်းတွေ တပ်မတွေက တက်တဲ့ သတင်းတွေရှိတယ်ဗျာ၊ အဲဒီ သတင်းတွေအရကလည်း တစညနိုင်မယ်၊ နောက်ဆုံး ရှုံးရင်တောင်မှ ညွှန့်ပေါင်းလောက်ပဲ ဖွဲ့လို့ရမယ့် အနေအထားရှိတယ် ဆိုပြီးတော့မှ တွက်ခဲ့ကြပါတယ်။ ၁၉၉၀ နဲ့ ၂၀၁၀ ကတော့ အများကြီး ကွာပါတယ် ခင်ဗျ။
ဦးရော်နီညိမ်း။ ။ အဲဒီအခါကျတော့၊ အခု လွတ်လပ်စွာ မဲပေးနိုင်တယ်ဆိုပြီးတော့ ၁၉၉၀ မှာ လုပ်ထားပြီးတော့၊ ၁၉၆၀ တုန်းကတော့ တပ်မတော်သားတွေက “တပ်က ဘယ်ကို ထည့်ရမယ်”လို့ ပြောတဲ့ဟာကို သူတို့ အများစုက မထည့်ခဲ့ကြဘူး။ အခု ၂၀၁၀ ကော ဗိုလ်မှူး ဘယ်လိုမြင်သလဲ။ ပြည်ခိုင်ဖြိုးကိုပဲ ထည့်ရမယ်ဆိုတာမျိုးက၊ စာနဲ့ မဟုတ် တောင်မှ အမိန့်တစ်မျိုးမျိုးနဲ့ တပ်ထဲမှာ လုပ်ထားပြီးသား ဖြစ်လိမ့်မလား မပြောတတ်ဘူး။ သို့သော် ဒီကနေ့မှ သွားပြီးတော့ အခုမှ မဲသွားထည့်မယ့် တပ်တွေလည်း ရှိမှာပဲ။ တပ်ရင်း တပ်ဖွဲ့တွေ။ အဲဒီတော့ တပ်မတော်သားတွေ ဒီ ၁၉၆၀ တို့ ၁၉၉၀ တို့ ကို ပြန်ပြီးတော့ မြင်ကြည့်ပြီးတော့ ပြန်သင်ခန်းစာယူပြီးတော့၊ ဘယ်လိုဖြစ်သင့်တယ်လို့ ဗိုလ်မှူး ထင်သလဲ ခင်ဗျ။
ဦးအောင်လင်းထွဋ်။ ။ ဒီကနေ့မှ သွားပြီးတော့မှ ထည့်ရမယ်ဆိုတဲ့ ရဲဘော်တွေဟာ လောလောလတ်လတ်ပေါ့ ဗျာ၊ သူတို့ မဲထည့်တာကို ခိုးဝှက် မကြည့်ဘဲနဲ့ ထည့်မယ် ဆို လို့ရှိရင်တော့၊ ကြံ့ဖွံ့ပါတီကိုတော့ လုံး၀ မဲထည့်လိမ့်မယ် မဟုတ်ပါဘူး။ ဒါကလည်း ဒီကနေ့ ဖြစ်နေတဲ့ အခြေအနေက အရင် ၁၉၉၀၊ ၁၉၆၀ နဲ့ အများကြီး ကွာသွားပါပြီ။ အခု တပ်တွေ ထဲမှာ စားဝတ်နေရေး လုံး၀ မကျေနပ်တာတွေ ရှိသလို၊ ဒီကြံ့ဖွံ့ပါတီရဲ့ အနိုင်ကျင့်မှု စော်ကားမှုတွေကိုလည်း တပ်မတော်သားတွေ ခံနေရပါတယ်။ ဒီရွေးကောက်ပွဲပြီးလို့ ကြံ့ဖွံ့ပါတီသာ အနိုင်ရလို့ အစိုးရ ဖွဲ့မယ်ဆိုရင်တော့ ကျနော် တို့ ရဲဘော်၊ ရဲမေတွေဟာ ဒီစစ်ကျွန်ဘ၀ နင်းပြားဘဝကို ရောက်သည်ထက် ရောက်မယ့် အနေအထားမျိုးပဲ ဖြစ်ပါတယ်။ ဒါကြောင့်မို့ ရဲဘော်တွေကော ရဲမေတွေကော ရဲဘော်မိသားစုတွေကောက၊ ကျနော့် အမြင်ပြောရရင်တော့ လွတ်လွတ်လပ်လပ်သာ လျှို့ဝှက်ပြီးတော့ မဲပေးခွင့် ပေးပါ။ သူတို့သည် ကြံ့ဖွံ့ပါတီကို လုံး၀ မဲပေးလိမ့်မယ် မဟုတ်ဘူး လို့ ကျနော် ယုံကြည်ပါတယ် ခင်ဗျ။
ဦးရော်နီညိမ်း။ ။ ဟုတ်ကဲ့ခင်ဗျ၊ တပ်မတော်သားတွေက ခုန လွတ်လွတ်လပ်လပ် မဲထည့်ခွင့်မရပဲနဲ့ ကြိုတင်မဲတွေနဲ့ ပြည်ခိုင်ဖြိုး ဆိုတာကိုပဲ အကုန်လုံး လုပ်ထားတယ် ဆို လို့ရှိရင်၊ ဒီအဖြေအပေါ်မှာ ကျေနပ်မှု ရှိနိုင်ပါ့မလား။ ဟာ ငါတို့က ပြည်ခိုင်ဖြိုးကို မထည့်ချင်ဘဲနဲ့ ထည့်လိုက်ရတယ်။ အခုဆိုရင် ကျနော်တို့ သိရတာပေါ့နော်၊ တပ်ထဲမှာ ဆိုရင် ကိုယ့် နံမည်ရှေ့က ရာထူးတောင်မှ တတ်ပြီးတော့ မဲ မထည့်ရဘူး၊ မဲဆန္ဒရှင်တွေက။ ဥပမာ ဗိုလ်မှူးအောင်လင်းထွဋ် ဆိုကြပါစို့၊ ဦးအောင်လင်းထွဋ် အနေနဲ့ပဲ သူက မဲဆန္ဒရှင်စာရင်းမှာ သွားမယ်။ မဲပေးသူသည် ဗိုလ်မှူးအောင်လင်းထွဋ် မဟုတ်ဘူး၊ ဦးအောင်လင်းထွဋ် ဆိုပြီးတော့ပဲ ပေးရမယ် ဆိုတဲ့ ညွှန်ကြားချက်ရှိနေတာတော့ ကျနော်တို့ အကြမ်းဖျဉ်း သိထားပါ တယ်။ အဲဒီတော့ ကိုယ်ထည့်ချင်သလို မထည့်ရဘဲနဲ့ ကိုယ်မထည့်ချင်တဲ့ ပါတီမျိုးကို ထည့်လိုက်ရတာမျိုး ကြုံခဲ့ရင်၊ အဲဒီရဲ့ impact အဲဒီရဲ့ အကျိုးဆက်က ဘာဖြစ်လာမယ်လို့ ဗိုလ်မှူး ထင်ပါသလဲ ခင်ဗျ။
ဦးအောင်လင်းထွဋ်။ ။ အဲဒီ impact က ဒီရွေးကောက်ပွဲ မဲထည့်စဉ် ကာလနဲ့ ရွေးကောက်ပွဲအပြီး ကာလမှာ ကျနော့်အမြင်တော့ ကျနော်တို့ ရဲဘော်၊ ရဲမေ၊ မိသားစုတွေက ဒီလိုတော့ ဆက်ပြီးတော့မှ အနိုင်ကျင့်ခံလိမ့်မယ်လို့ ကျနော်တို့ မထင်ပါဘူး။ ကျနော်တို့မှာ ခေါင်းဆောင်ကောင်း တစ်ယောက်လောက်ပဲ လိုပါတယ်။ ခေါင်းဆောင်ကောင်း တစ်ယောက်လောက်က ရှေ့ဆောင် ဦးဆောင်ပြလို့ ရှိရင်၊ ဒီ ဗိုလ်ချုပ်မှူးကြီးသန်းရွှေ အပါအဝင်ပေ့ါလေ၊ သူ့လူတစ်စု အတွက်က ပြေးဖို့ နေရာမရှိပါဘူး ခင်ဗျ။
ဦးရော်နီညိမ်း။ ။ ကျနော် အန်ကယ်ဦးထွန်းစိန်ကို မေးချင်ပါတယ်။ အန်ကယ်ဦးထွန်းစိန်ကတော့ အခု ရွေးကောက်ပွဲမှာ အမျိုးသားဒီမိုကရေစီအင်အားစု (National Democratic Forces) NDF ပါတီကို ကိုယ်စားပြုပြီး အရွေးခံဖို့ ရည်ရွယ်ထားတဲ့ ပုဂ္ဂိုလ်ဖြစ်တဲ့ အတွက်ကြောင့်မို့လို့၊ ရွေးကောက်ပွဲရဲ့ ရလဒ်ကနေ ဖြစ်ပေါ်လာမယ့် အကျိုးဆက် အပေါ်မှာ အန်ကယ် ဘယ်လိုများ မျှော်မှန်းထားပါသလဲ ခင်ဗျ။
ဦးထွန်းစိန်။ ။ အခုလာမယ့် ရွေးကောက်ပွဲ ရလဒ်ကတော့ သိပ်ပြီး ကောင်းဖို့တော့ မမြင်ဘူး ခင်ဗျ၊ ပိုပြီးတော့ ဆိုးသည်ထက် ဆိုးဖို့ပဲ ရှိတယ်။ လွှတ်တော် ကိုယ်စားလှယ်ဆို တာက ပြည်သူက ရွေးချယ်မှ လွှတ်တော်မှာ တက်ပိုင်ခွင့် ရမှာပါ။ ပြည်သူ မရွေးချယ်ရင် ကျနော်တို့ တက်ပိုင်ခွင့် မရပါဘူး။
ဦးရော်နီညိမ်း။ ။ အန်ကယ် အရွေးချယ်ခံလိုက်ရပြီးပြီ ဆိုကြပါစို့၊ အဲဒီတော့ အန်ကယ် လွှတ်တော်ထဲ ရောက်သွားပြီဆိုရင် အန်ကယ် လုပ်ချင်တဲ့ကိစ္စတွေ လုပ်လို့ရမယ်လို့ အန်ကယ် မျှော်မှန်းထားပါသလား ခင်ဗျ၊ အဲဒါကို ကျနော် သိချင်တာပါ။
ဦးထွန်းစိန်။ ။ ကျနော့်အထင်ကတော့ သိပ်တော့ မထင်ပါဘူး။
ဦးရော်နီညိမ်း။ ။ အန်ကယ် ဦးတင်ဦးကကော သုံးသပ်ပေးပါ ခင်ဗျ၊ ရွေးကောက်ပွဲကနေ ပေါ်ပေါက်လာမယ့် အကျိုးဆက် မြန်မာ့နိုင်ငံရေးမှာ ဘယ်လို အန်ကယ် မြင်ပါသလဲ ခင်ဗျ။
ဦးတင်ဦး။ ။ အကျိုးဆက်ကတော့ဗျာ၊ ကျနော့်အတွေ့အကြုံအရတော့ ကောင်းမယ် မဟုတ်ပါဘူး။ နောက်တစ်ခုက ဒီလိုပါ၊ ၂၀၀၈ခုနှစ် ဖွဲ့စည်းပုံအခြေခံဥပဒေကြီးက ဘာကို အခြေခံထားသလဲဆိုတော့ကာ၊ “လွှတ်တော်က စစ်တပ်ကို လွှမ်းမိုးရမယ်”ဆိုတာ ဖြစ်ရမယ့်အစား စစ်တပ်အကြီးအကဲ ပုဂ္ဂိုလ်ကြီးက လွှတ်တော်ကိုလွှမ်းမိုးထားတာ ဆိုတော့ အကုန် လုံး အရာရာမှာ ဒီထက်ပိုပြီး ကောင်းလာနိုင်မယ် မဟုတ်ပါဘူး။ ရှင်းနေပြီပဲ၊ ဒီဟာက “နိုင်ရင်လည်း နိုင်ရမယ် ရှုံးရင်လည်း နိုင်ရမယ်” ဆိုတဲ့ ဖွဲ့စည်းပုံအခြေခံဥပဒေကြီးပါ။ အဲဒီတော့ ကျနော်တို့ တောင်းဆိုနေတဲ့အတိုင်းပဲ အားလုံး ညီညွှတ်ပြီး သူတို့ကရော၊ ပြည်သူလူထုကရော၊ တိုင်းရင်းသားခေါင်းဆောင်တွေ များကရော သေသေချာချာ ထိုင်ပြီးတော့ ကျကျနန လေး ပေးကြ ယူကြ၊ လျှော့ကြ တင်းကြ ဒီလိုလေးနဲ့ လုပ်သွားရင်တော့၊ အဖြေတစ်ခု ရသွားအောင် လုပ်တဲ့ဟာကပဲ နောင် အရှည်ကောင်းမွန်လာမှာ ဖြစ်ပါတယ်။ ဒီလို တဘက်သတ် ကြီး ရေးချွတ်ပြီးတော့ “ဒါပဲကွ” ဆိုပြီး လုပ်တဲ့ဟာကတော့ ဒီနေ့ ဘယ်လောက်ထိ အခြေအနေ ဖြစ်လာတယ်ဆိုတာ၊ အားလုံး သိပြီးသားပါ။ အခုလည်း သူတို့၊ အတိုင်းအတာအရ သိတန်သလောက် သိပါတယ်။ အဲဒါကို ရဲရဲဝံ့ဝံ့ ပြင်လိုက်မယ် ဆိုရင် သူတို့ဟာ ပျိုတိုင်းကြိုက်တဲ့ နှင်းဆီခိုင် ဖြစ်လာမှာပါ။ ဖြစ်ခဲ့တဲ့ အ၀၀တွေအပေါ်မှာ ကျနော်တို့ ပြန်လည်ပြီးတော့ ကာ ခုနက ပြောသလို ညှိညှိနှိုင်းနှိုင်းနဲ့ အဖြေရှာလိုက်ကြရင်တော့ဖြင့် အင်မတန် ကောင်းကြဦးမှာပါပဲလို့ အဲဒီလိုပဲ ကျနော် တွက်ပါတယ် ခင်ဗျာ။
ဦးရော်နီညိမ်း။ ။ ဟုတ်ကဲ့ အခု အန်ကယ်က ရဲရဲဝံ့ဝံ့ကြီး ပြင်စေချင်ပေမယ့်၊ သူတို့က ရဲရဲဝံ့ဝံ့ကြီးပဲ မပြင်ဘူးဆိုပြီး ဆက်သွားတဲ့ ကိစ္စကနေ ဖြစ်ပေါ်လာမယ့် အဲဒီ ရွေးကောက် ပွဲရဲ့ အကျိုးဆက်က ဘယ်လိုမှကို မြန်မာပြည်ကို ရှေ့ ဆက်ပြီးတော့ ကောင်းကျိုး ……..
ဦးတင်ဦး။ ။ မပေးပါဘူး။ ဘယ်လိုမှ ကောင်းကျိုး မပေးနိုင်ပါဘူး။ ကျနော်ပြောချင်တာကတော့ တပ်မတော်သားပဲဗျာ၊ သူရသတ္တိကတော့ ရှိပါတယ်။ ဒါတွေကတော့ ပြော စရာ မလိုပါဘူး။ သတ္တိရှိလို့လည်းပဲ ဒီအလုပ် လုပ်ကြတာပေါ့ဗျာ၊ သို့သော်လည်း အားနည်းနေတာက ဓမ္မသတ္တိလေး ပေါ့ဗျာ၊ ဒါလေးတော့ နည်းနည်း ကိန်းအောင်း စေချင်တယ်ပေါ့ နော်။ ဘယ်ဟာမှန်သည် ဘယ်ဟာမှားသည် ပေါ့နော်။ နောက် ပြည်သူလူထုက အင်မတန် ချစ်စရာ ကောင်းပါတယ်။ အထူးသဖြင့် တိုင်းရင်းသားတွေက အင်မတန် ချစ်စရာကောင်းပါ တယ်ဗျာ၊ သူတို့ကို ဘာပဲဖြစ်ဖြစ် ယုံကြည်အောင် handicap ပေးရမယ်ဗျ၊ အဲဒီလိုပေးပြီးတော့ ယုံကြည်လာအောင်လုပ်မှ နိုင်ငံရေးတည်ငြိမ်မှု ရမှာဗျ။ နိုင်ငံရေးတည်ငြိမ်မှုက အရေး ကြီးတယ်ဗျ။ ဒီနိုင်ငံတော် တည်ငြိမ်တာကတော့ ရပါတယ်ဗျာ။ အခုလို လက်နက်နဲ့ရော၊ ပစ္စည်းနဲ့ရော၊ ငွေနဲ့ရော ချမ်းသာသမျှ စုဝေးပြီးတော့ “ဟေ့ ဒါပဲကွ” ဆိုပြီး လုပ်ရင် ရတာပေါ့၊ ပိနေမှာပေါ့၊ ဒါဟာ ကောင်းတဲ့ ကိစ္စမှ မဟုတ်ဘဲနဲ့၊ ကိုယ့်မြန်မာပြည်သူတွေ တိုင်းရင်းသားအားလုံးက လွတ်လပ်စွာပြောရမယ်၊ ဆိုရမယ်၊ စည်းရုံးရမယ်၊ အဲဒီလိုလေးတော့ ရှိဖို့တော့ တန်ပြီပေ့ါဗျာ၊ အဲဒါတွေကို ဖွင့်ပေးလိုက်ပြီးတော့ စည်းစည်းလုံးလုံးနဲ့ တိုင်တိုင်ပင်ပင် ဆွေးနွေးလိုက်ရင် အဖြေပေါ်ပါတယ် ခင်ဗျ။ အဖြေပေါ်ပါတယ်။ အဲဒီဟာက အင်မတန်လုပ်လို့ ကောင်းတဲ့ ကိစ္စတရပ်ပါ။ ရဲရဲဝံ့ဝံ့သာလုပ်ပါ။ ပြည်သူလူထုက၊ တကယ် ရဲရဲဝံ့ဝံ့ လုပ်ပြတဲ့အတွက်၊ သူရဲကောင်းကြီးတွေ အနေနဲ့တောင်မှပဲ မြှောက်စားလာနိုင်တဲ့ အထိ ဖြစ်ပါတယ်လို့ ကျနော် မြင်ပါတယ်ခင်ဗျ။
ဦးရော်နီညိမ်း။ ။ ဟုတ်ကဲ့ ခင်ဗျ၊ ကျေးဇူးတင်ပါတယ်။ အန်ကယ် ဦးထွန်းစိန်ကော၊ အန်ကယ် ဦးတင်ဦးကော ဗိုလ်မှူးအောင်လင်းထွဋ်ကော၊ အခုလို ပါဝင်ပြီးတော့ ဆွေးနွေး ပေးတဲ့အတွက် အများကြီး ကျေးဇူးတင်ပါတယ် ခင်ဗျာ။