စက်တင်ဘာလ လူထုလှုပ်ရှားမှုတွေ နောက်ပိုင်း မြန်မာပြည်ကို သုံးကြိမ်မြောက်အဖြစ် ရောက်နေတဲ့ ကုလသမဂ္ဂရဲ့ အထူး ကိုယ်စားလှယ် မစ္စတာ ဂမ်ဘာရီဟာ အမျိုးသား ဒီမိုကရေစီအဖွဲ့ချုပ် (NLD) ပါတီက ဒေါ်အောင်ဆန်းစုကြည်နဲ့ ဗဟိုကော်မတီဝင် ၅ ဦးတို့ကို အစိုးရဧည့်ဂေဟာမှာ ဒီကနေ့ သီးခြားစီ ခွဲပြီး တွေ့ဆုံခဲ့ပါတယ်။
ဘာရည်ရွယ်ချက်နဲ့ အခုလို ခွဲပြီး တွေ့ဆုံရတာလဲ။ တွေ့ဆုံတဲ့အခါ ဘာတွေ ဆွေးနွေးကြသလဲ ဆိုတာတော့ မသိရပါဘူး။ ဒီကနေ့ တွေ့ဆုံမှုမှာ ပါဝင်ခဲ့တဲ့ NLD ရဲ့ ပြောခွင့်ရပုဂ္ဂိုလ် ဦးလွင်ကို ဗွီအိုအေကနေ ဦးကျော်အောင်လွင်က ဆက်သွယ် မေးမြန်းထားပါတယ်။ဒီကနေ့ တွေ့ရတဲ့အထဲမှာ ဒေါ်အောင်ဆန်းစုကြည် ပါ ပါသလားခင်ဗျ။ -
“မပါ ပါဘူး။”
ဟုတ်ကဲ့၊ ဆရာတို့ တွေ့တာ ဘယ်နှစ်ယောက်တွေ့တာလဲ၊ ဘယ်သူတွေ ပါလဲခင်ဗျ၊-
“ဦးအောင်ရွှေ ရယ်၊ အဲန်ကယ်လ်ရယ်၊ ဦးစိုးမြင့်ရယ်၊ ဦးသန်းထွန်းရယ်၊ ဦးညွှန့်ေ၀ ရယ်။”
ဟုတ်ကဲ့ခင်ဗျ။ ဒီညနေထဲမှာ ဒေါ်အောင်ဆန်းစုကြည်နဲ့ပါ တွေ့တယ်လို့ ကျနော်တို့ ကြားနေလို့ပါ။ -
“အဲဒါဆိုရင် သီးခြားတွေ့တာ ဖြစ်မယ်။”
ဟုတ်ကဲ့၊ ဆရာတို့နဲ့ မစ္စတာဂမ်ဘာရီ တွေ့ဆုံတဲ့အခါမှာ အဓိက အကြောင်းအရာတွေ ဘာတွေများ ဆွေးနွေးဖြစ်ပါသလဲခင်ဗျ။ -
“အဓိက အကြောင်းအရာတွေကတော့ ဒါ သူ့ကို လုံခြုံရေးကောင်စီက တာဝန်ပေးချက် အရ သိချင်တာတွေ မေးတာပေါ့ခင်ဗျ၊ ဒါ သူကလည်း သိသင့်တာတွေ ပြောတာပေါ့ခင်ဗျ။”
ဟုတ်ကဲ့ပါ၊ အဓိက ဘာအကြောင်း ပြောဖြစ်ပါသလဲခင်ဗျ။ -
“အဓိကကတော့ အသေးစိတ်မေးဖို့လည်း မသင့်ဘူးလေ၊ ကျနော်တို့ကလည်း တာဝန် အရ ဖြေရတာပဲလေ၊ လုံခြုံရေးကောင်စီရဲ့ တာဝန်ပေးချက်အရ လုပ်တာ၊ အဲန်ကယ်လ်တို့က ဖိတ်လို့လာတာလည်း မဟုတ်ပါဘူး၊ သူ့တာဝန် သူလုပ်ကြတာ။”
ဟုတ်ကဲ့ပါခင်ဗျာ၊ အချိန်ဘယ်လောက်လောက်တွေ့ ဆုံခွင့်ရခဲ့ပါသလဲခင်ဗျ၊ -
“၁၀ နာရီခွဲကနေပြီးတော့ ၂ နာရီ နီးနီးပဲ။”
ဟုတ်ကဲ့ခင်ဗျ၊ မစ္စတာ ဂမ်ဘာရီ အပြင်ကို ဘယ်သူတွေများ ပါလဲခင်ဗျ၊ -
“ဝါရင့် ဝန်ထမ်းတွေလေ၊ ၂ ဦး ပါပါတယ်၊ တစ်ဦးကတော့ အမျိုးသမီးပါ။”
ဟုတ်ကဲ့၊ ဆရာတို့ အစိုးရဧည့်ဂေဟာမှာ တွေ့တယ်လို့ ကြားပါတယ်၊ ဘယ်နေရာမှာပါလဲ၊ -
“ဟုတ်ပါတယ်၊ ဟုတ်ပါတယ်၊ စိမ်းလဲ့ကန်သာ။”
ဟုတ်ပါပြီခင်ဗျ၊ ဆရာတို့ ဒီနေ့ တွေ့ဆုံဆွေးနွေးပွဲအရ ဘယ်လို မှတ်ချက်ချ ချင်ပါလဲခင်ဗျ၊ -
“မှတ်ချက်ချချင်စရာတော့ မရှိဘူးလေ၊ ဒါကတော့ စောစောကတည်းကပဲ သူနဲ့ ပြန်ကြားရေးဝန်ကြီး တွေ့ပြီး ပြန်ကြားရေးဝန်ကြီးက စောစောစီးစီး သူမေးတာတွေရော၊ သူ ထင်တာတွေရော ပြောပြီးပဲ၊ မြန်မာ့အလင်း သတင်းစာတို့၊ ဘာတို့မှာလဲ ပါပြီးသားပဲလေ။”
ဟုတ်ကဲ့ပါ၊ မစ္စတာ ဂမ်ဘာရီကတော့ အဲန်အယ်လ်ဒီကို ဘာပြောပါလဲခင်ဗျ၊ -
“ဘာမှ မပြောပါဘူး၊ သူက ဘာမှ မပြောပါဘူးဆိုတာ သူ မူလ ပြောထားတာတွေ ရှိတယ်။ ထပ်ပြီး သူမေးတာ ရှိတယ်။၊ ဒါပါပဲ၊ Routine လို ဖြစ်နေပါပြီ။”
ဟုတ်ကဲ့၊ ဆိုတော့ ကုလသမဂ္ဂရဲ့ ကူညီမှုတွေနဲ့ ပတ်သက်လို့ရော ဆရာတို့ NLD ဘက်က ဘာတွေများ ပြောချင်ပါသလဲခင်ဗျ။ -
“ဒါကတော့ မပြီးသေးဘူးလေဗျာ၊ အခုတကြိမ် လုံခြုံရေးကောင်စီက တတိယအကြိမ်ပေါ့။”
ဟုတ်ကဲ့၊ မစ္စတာဂမ်ဘာရီရဲ့ ကြိုးပမ်းမှုတွေက သိပ်ပြီးတော့ တကယ်ပဲ ထိရောက်မှု မရှိလို့လည်း ပြောကြတာကြားပါတယ်ခင်ဗျ။ အဲန်ကယ်လ်တို့အနေနဲ့ ဘယ်လို သုံးသပ်ပါလဲခင်ဗျ။ -
“ခပ်တိုတို ပြောရင်တော့ မစ္စတာဂမ်ဘာရီထက် လုံခြုံရေးကောင်စီက ပိုပြီးတာဝန် ရှိပါတယ်။”
မစ္စတာဂမ်ဘာရီရဲ့ ခရီးစဉ်နဲ့ပတ်သက်ပြီးတော့ ဆရာတို့ ဘယ်လို သဘောထားပါလဲခင်ဗျ၊ -
“ဟုတ်ကဲ့၊ သူ့ကိစ္စ မပြီးသေးဘူးလေ၊ ဆုံးအောင်လည်း နားထောင်ကြပါဦး၊ မပြီးသေးပါဘူး။”
ဆရာတို့နဲ့ နောက်တကြိမ် ထပ်တွေ့ဖို့ အစီအစဉ် ရှိသေးပါလားခင်ဗျာ၊ -
“မရှိဘူး၊ သူ ဒီညနေ ပြန်ချင်ပြန်မယ်၊ မပြန်ရင် မနက်ဖြန်မနက် ပြန်ဖို့သဘော ရှိပါတယ်၊ အဓိက ကျတဲ့ အခြေအနေကို အဲန်ကယ်လ်တို့ထက် ခင်ဗျားတို့က ပိုမသိနိုင်ပါဘူး၊ ဖြစ်နေတယ်ဆိုတာ ဒီက လူတွေသိပါတယ်။”
ဆိုတော့ ဒီ အကျပ်အတည်းတွေက လွတ်မြောက်ဖို့ ဘယ်လို မျှော်လင့်ချက်တွေ ရှိပါလဲခင်ဗျ၊ -
“မျှော်လင့်ချက်က လွယ်လွယ်နဲ့ မြန်မြန်ဖြစ်မယ်လို့ မထင်ဘူးခင်ဗျ၊”
ဟုတ်ကဲ့ခင်ဗျ၊ ကျေးဇူးအများကြီး တင်ပါတယ်ခင်ဗျာ။
အဲန်အယ်လ်ဒီ က ဦးလွင်နဲ့ မစ္စတာဂမ်ဘာရီ တွေ့ဆုံတာကို ကိုကျော်အောင်လွင်က ဆက်သွယ်မေးမြန်းခဲ့တာ ဖြစ်ပါတယ်။