အချိန်ပိုင်း အစာရှောင်တာမှာလည်း၊ ပြန်စားချိန်မှာ ဘယ်လိုအစာမျိုးကို ဘယ်လောက်ပဲ စားသင့်ပါလဲ။ ဒီအချိန်ပိုင်းမစားဘဲနေတာအတွက်၊ ပြန်စားချိန်မှာ ဘယ်လိုအစာမျိုးကို ဘယ်လောက် စားတာကလည်း အရေးကြီးတယ်လို့ ကျန်းမာရေးပညာရှင်တွေက ထောက်ပြနေပါတယ်။
အခုလို ပြန်စားတဲ့အချိန်မှာလည်း ကယ်လိုရီများတာထက် အာဟာရများတာကိုစားမှသာ ကျန်းမာရေး ပိုအကျိုးပြုတာကို သုတေသနတွေ့ရှိထားပါတယ်။ အကြောင်းက အခုခေတ်မှာ လူတွေက အရင်တုန်းကလို သွားလာလှုပ်ရှားလုပ်ကိုင်ရတာထက်၊ ဦးနှောက်ပိုသုံးပြီး ထိုင်အလုပ်လုပ်ကြရတာကြောင့် လှုပ်ရှားစွမ်းအင် ကယ်လိုရီအများကြီး မလိုတော့ချိန်မှာ၊ ကယ်လိုရီပိုစားမိတာကနေ ကျန်းမာရေးဆိုးကျိုးတွေ ကြုံလာနေရလို့ပါ။ မြန်မာအပါအဝင် တချို. စားသောက်ပုံ ဓလေ့ထုံးစံမှာက အရင်တုန်းကလိုပဲ ကယ်လိုရီများတဲ့ ကဆီဓာတ် (ထမင်း၊ ခေါက်ဆွဲ၊ ကြာဇံ၊ အာလူး၊ ပေါင်မုန့်စတာတွေ) ကို ဆက်ပြီး ပိုစားကာ၊ အာဟာရဓာတ်များတဲ့ အသီးအရွက်ကို သိပ်မစားမိကြပါဘူး။ ဒါပေမဲ့ လူတွေအသက်ပိုရှည်လာတဲ့ ဂျပန်မှာတော့ ဒီကယ်လိုရီများတဲ့ ကဆီဓာတ်ထက် အသီးအရွက်နဲ့ ပဲမျိုးစုံ ပိုစားတာကနေ၊ အချိန်ပိုင်း အစာလျှော့စားတာအတွက်ပါ ပိုထိရောက်တာကို သုတေသနတွေ့ရှိထားပါတယ်။
ဒါ့အပြင် အစာရှောင်ပြီး ပြန်စားချိန်၊ စားတဲ့ ပမာဏကလည်း အရေးကြီးပြန်တာကို ဂျပန်လူမျိုးတွေကို သုတေသနလုပ်ရာမှာပဲ ထပ်တွေ့ရပြန်ပါတယ်။ ဂျပန်စားသောက်ပုံဓလေ့အရ ဗိုက်ကို အပြည့်ကြီးမစားဘဲ၊ တစုံတရာ လျှော့စားတာကို တွေ့ရပါတယ်။ ဂျပန်အများစုအနေနဲ့ ၈၀% လောက် ဗိုက်ပြည့်အောင်သာစားပြီး ကျန်တဲ့ ၂၀% လောက်ကို ချန်ထားကာ၊ စားတာကို ရပ်လိုက်လေ့ရှိပါတယ်။ ဒါကလည်း အချိန်ပိုင်း မစားတာအတွက် ကျန်းမာရေးပိုအကျိုးဖြစ်တာကို သုတေသန တွေ့ရှိထားပါတယ်။ အကြောင်းက တခြားနေရာတွေမှာ အဖြစ်များလာနေတဲ့ အဝလွန်တာ၊ ဆီးချို၊ သွေးတိုးဖြစ်တာက ဂျပန်လူမျိုးတွေမှာ ပိုနည်းလာကာ၊ အမျိုးသားတွေမှာ အသက် ၈၄ နှစ်ကျော်ထိ ပျမ်းမျှ အသက်ရှည်ပြီး၊ အမျိုးသမီးတွေမှာ အသက် ၉၀ ကျော်အထိ ပျမ်းမျှ အသက်ရှင်နေနိုင်တာကို တွေ့ရှိထားလို့ပါ။ ဒါ့အပြင် ကြွက်တွေနဲ့စမ်းရာမှာလည်း အလားတူအသက်ရှည်တာ တွေ့ရှိထားပါတယ်။
နောက်ထပ် ကယ်လိုရီများပြီး အာဟာရနည်းတာတွေထဲ ဒီနေ့ ရေပန်းစားလာတဲ့ အသင့်စားသုံးပစ္စည်းတွေ ပါနေတာမို့ သတိပြု စားသုံးသင့်ပါတယ်။ ဥပမာ အသင့်လုပ် အချိုရည် အဖျော်ယမကာတွေ အနည်းငယ်မှာကို ကယ်လိုရီပမာဏ အများကြီး ပါနေတာကို တွေ့ရှိထားပါတယ်။ တကယ်တမ်း အစိမ်းရောင် ဟင်းသီးဟင်းရွက် (ကန်စွန်းရွက်၊ ဟင်းနုနွယ်၊ မုံညှင်းစိမ်းရွက် စတာ) တစ်ပွဲစာ အများကြီးစားတာမှာ၊ ကယ်လိုရီ တစ်ရာကျော် နှစ်ရာနီးပါးသာရှိပါတယ်။ ဒါပေမဲ့ ဒီအသင့်စားသုံးတာတွေဖြစ်တဲ့ ခရမ်းချဉ်သီးဆီ (Ketchup)၊ အနောက်တိုင်း ချိုချဉ်ဆီအဖြူ (Mayonnaise)၊ ငရုတ်ဆီ၊ ငံပြာရည်၊ ခရုဆီ တဇွန်းစာလောက်မှာတော့ ကယ်လိုရီ ၇၀၀ကနေ ၈၀၀ ကျော်အထိ အများကြီးကိုရှိနေပါတယ်။ ဒါကြောင့် ကယ်လိုရီနည်းလွန်းတဲ့ ဟင်းသီးဟင်းရွက်ကို အများကြီးပိုစားတာက ဗိုက်ပိုပြည့်စေနိုင်တာအပြင်၊ အမျှင်ဓာတ်နဲ့ ဗီတာမင်ဓာတ်စတဲ့ အာဟာရလည်း ပိုရနိုင်ပါတယ်။
ဒီအချိန်ပိုင်းမစားတာကြောင့် မကောင်းတဲ့အဆီလျှော့စေပြီး အဝလွန်တာ၊ ဆီးချို၊ သွေးတိုးနဲ့ နောက်ဆက်တွဲ နှလုံးနဲ့ဦးနှောက်အာရုံကြောရောဂါတွေကို လျော့ချပေးတာမှာ ဟော်မုန်းဆိုင်ရာ ထိရောက်မှုကိုလည်း တွေ့ရှိထားပါတယ်။ ဥပမာ မြန်မာမှာရော ကမ္ဘာမှာပါ ပိုအဖြစ်များလာနေတဲ့ ဆီးချိုရောဂါအတွက် အရေးပါတဲ့ အင်ဆူလင်ဟော်မုန်းထိရောက်မှုကျတာ (Insulin Resistance) ကို၊ အချိန်ပိုင်း မစားတာကြောင့် ပြန်အားကောင်းစေနိုင်ပါတယ်။ အကြောင်းက ထမင်းနဲ့ခေါက်ဆွဲလို ကဆီဓာတ်များတာတွေ ပိုစားမိတာကြောင့် သကြားဓာတ်ထိန်းဖို့ ပြန်ချေပေးတဲ့ အင်ဆူလင်ဟော်မုန်း ပိုထွက်လာတာနဲ့အမျှ ချေနိုင်တဲ့စွမ်းအား ကျလာလေ့ရှိတာပါ။ ဒီနေရာမှာ အချိန်ပိုင်းမစားတာကြောင့် ကဆီဓာတ် ပြန်လျော့စေပြီး အင်ဆူလင် အများကြီးထွက် ချေဖျက်စရာမလိုဘဲ၊ ထွက်လာတဲ့အနည်းငယ်ရဲ့ ထိရောက်မှု (Insulin Sensitivity) ကလည်း ပြန်ကောင်းလာတာပါ။
ဒီအကြောင်း နယူးယောက်မြို့၊ Cornell တက္ကသိုလ်က အပြည်ပြည်ဆိုင်ရာ အစာအာဟာရဆိုင်ရာ ပါမောက္ခ ဒေါက်တာ ခင်မာချိုကို ကိုဝင်းမင်းက မေးထားပါတယ်။
Your browser doesn’t support HTML5
အချိန်ပိုင်း အစာရှောင်ချိန် စားသင့်ပုံ