ထိုင်းနိုင်ငံမှာ မေလ ၁၄ ရက်နေ့က နောက်ဆုံးကျင်းပခဲ့တဲ့ အထွေထွေ ရွေးကောက်ပွဲမှာ နိုင်ငံရေးမှာ စစ်တပ်က လွှမ်းမိုးထားရာကနေ စစ်မှန်တဲ့ ဒီမိုကရေစီစနစ်ကို ကူးပြောင်းမယ့် အရေးပါတဲ့ ရွေးကောက်ပွဲအဖြစ် အများစုက ရှုမြင် သုံးသပ်ကြပါတယ်။ ဒီရွေးကောက်ပွဲမှာ မြန်မာနွယ်ဖွား ထိုင်းနိုင်ငံသား အတော်များများလည်း ဝင်ရောက် ယှဉ်ပြိုင်ခဲ့ကြပါတယ်။ Thai Seng Thai ပါတီရဲ့ ကိုယ်စားလှယ်လောင်းလည်းဖြစ်၊ ပါတီပြောခွင့်ရလည်းဖြစ်တဲ့ Tida Yingcharoen ကို ကိုဇော်ဝင်းလှိုင်က ဘန်ကောက်မြို့မှာ တွေ့ဆုံမေးမြန်းထားပါတယ်။
မေလ ၁၄ ရက်နေ့မှာ ကျင်းပခဲ့တဲ့ ထိုင်းနိုင်ငံ အထွေထွေရွေးကောက်ပွဲမှာ အတိုက်အခံ ဒီမိုကရက်တစ် ပါတီတွေက အပြတ်အသတ် အနိုင်ရလိုက်ပါတယ်။ အာဏာသိမ်းစစ်ခေါင်းဆောင်ဟောင်း လက်ရှိ ဝန်ကြီးချုပ် Prayuth Cha-o-cha နဲ့ စစ်တပ်တပိုင်း အုပ်ချုပ်ရေးကို မလိုလားဘူးဆိုတာကို ထိုင်းပြည်သူတွေက ပြတ်ပြတ်သားသား ဆန္ဒဖော်ထုတ်ပြသလိုက်တာလည်း ဖြစ်ပါတယ်။ ဒီရွေးကောက်ပွဲဟာ စစ်အုပ်ချုပ်ရေးကနေ ဒီမိုကရေစီစနစ်ကို အသွင်ကူးပြောင်းပေးမယ့် ရွေးကောက်ပွဲဖြစ်တယ်လို့ နိုင်ငံရေးပါတီတွေက မဲဆွယ် စည်းရုံးခဲ့သလို ထိုင်းမဲဆန္ဒရှင်တွေကလည်း တခဲနက် ထောက်ခံအားပေးခဲ့ကြပါတယ်။
ဒီရွေးကောက်ပွဲမှာ အတိုက်အခံပါတီတွေဘက်က လူငယ်ခေါင်းဆောင်တွေ အများအပြား ပေါ်ထွက်လာခဲ့ပါတယ်။ လွှတ်တော်အမတ် ၅၀၀ အတွက် ပါတီပေါင်း ၂၀ နီးပါးက ဝင်ရောက်ယှဉ်ပြိုင်ကြတာမှာ လူငယ်ခေါင်းဆောင် Pita Limjaroenrat ဦးဆောင်တဲ့ Move Forward ပါတီ အမတ်နေရာအများဆုံးနိုင်ပြီး တခြား ၇ ပါတီနဲ့အတူ ညွန့်ပေါင်းအစိုးရဖွဲ့ဖို့ ပြင်ဆင်နေပါတယ်။
ညွန့်ပေါင်းအစိုးရသစ်ဖွဲ့ဖို့ သဘောတူထားကြတဲ့ ရွေးကောက်ပွဲနိုင် ပါတီ ၈ ခုထဲက တခုကတော့ အမတ်နေရာ (၆) နေရာ အနိုင်ရထားတဲ့ Thai Seng Thai ပါတီဖြစ်ပါတယ်။ ပါတီရဲ့ အောက်လွှတ်တော်ကိုယ်စားလှယ်လောင်းလဲဖြစ်၊ ပါတီပြောခွင့်ရအမျိုးသမီးလည်းဖြစ်တဲ့ Tida Yingcharoen ဟာ မြန်မာနွယ်ဖွား၊ ထိုင်းနိုင်ငံသူတဦးဖြစ်ပါတယ်။ ဒီရွေးကောက်ပွဲဟာ ဒီမိုကရေစီအတွက် အောင်ပွဲတခုလို့ သူ့အနေနဲ့ ယူဆကြောင်း Tida Yingcharoen က ပြောပါတယ်။
Tida Yingcharoen။ ။ အခုပြီးသွားတဲ့ ရွေးကောက်ပွဲဟာ တကယ်တော့ ဒီမိုကရေစီအတွက် အောင်ပွဲတခုအဖြစ် မြင်ကြည့်လို့ရပါတယ်။ ထိုင်းနိုင်ငံကို ကြည့်လိုက်မယ်ဆိုရင် ဒီမိုကရေစီဘက်တော်သားတွေနဲ့ စစ်တပ်တို့ တဘက်စီ ပြိုင်နေကြတာကို တွေ့ရပါမယ်။ လွန်ခဲ့တဲ့ နှစ်အနည်းငယ်ကပဲ စစ်အာဏာသိမ်းခဲ့တယ်။ ကျမအသက် ၃၀ ကျော်ရှိလာတဲ့အချိန်မှာ စစ်တပ်က အာဏာသိမ်းတာ ၃ ကြိမ် ကြုံခဲ့ရပြီးပါပြီ။ ဒါဟာ လူတယောက်ရဲ့ သက်တမ်းမှာ အတော်များပါတယ်။ ဒါကြောင့် ဒီရွေးကောက်ပွဲဟာ တကယ့်ကို ကြီးမားတဲ့ အောင်မြင်မှုပါ။ အောက်လွှတ်တော် အမတ်နေရာ အများစုအတွက် ဒီမိုကရက်တစ်ပါတီတွေက သောင်ပြို ကမ်းပြို အပြတ်အသတ် အနိုင်ရခဲ့တာကို တွေ့ရပါတယ်။ ဒီမိုကရေစီစနစ် ဆက်လက်ရှင်သန်ပြီး အောင်မြင်မှုတွေ ရရှိနေတာကို မြင်တွေ့ပြီး ကိုယ်တိုင် ဖြတ်သန်းလိုက်တာဟာ ကျမအတွက်တော့ တကယ့် ကြီးမားတဲ့ အတွေ့အကြုံကြီးတခုပါ။
Tida Yingcharoen ဟာ မြန်မာနိုင်ငံကနေ ထိုင်းနိုင်ငံဘက်ကို မိသားစုနဲ့အတူထွက်ပြေးလာတဲ့ လားဟူတိုင်းရင်းသား ဒုက္ခသည်ဖခင်နဲ့ ထိုင်းလူမျိုး မိခင်တို့က ပေါက်ဖွားလာသူဖြစ်တာကြောင့် တနည်းအားဖြင့် ထိုင်း−မြန်မာ ကပြားတဦးဖြစ်ပါတယ်။
ဇော်ဝင်းလှိုင်။ ။ Tida Yingcharoen ရဲ့ မိသားစုနောက်ကြောင်းလေး ကျနော်တို့ကို ပြောပြပါဦး။
Tida Yingcharoen။ ။ ကျမအဖေဟာ လွန်ခဲ့တဲ့ နှစ် ၆၀ လောက်က မြန်မာနိုင်ငံ၊ ရှမ်းပြည်နယ်ကနေ ထိုင်းနိုင်ငံကို ထွက်ပြေးလာတဲ့ ဒုက္ခသည်တဦးပါ။ အဲဒီအချိန်တုန်းက မြန်မာနိုင်ငံဟာလည်း စစ်အုပ်ချုပ်မှုအောက်ကို စရောက်နေတဲ့အချိန်ဖြစ်ပါတယ်။ အဲဒါကြောင့် ကျမ မိသားစုလည်း ထိုင်းနိုင်ငံဘက်ကို ထွက်လာခဲ့တာပါ။ ကျမအဖေဟာ လားဟူ တိုင်းရင်းသားပါ၊ မြန်မာမဟုတ်ပါဘူး။ လားဟူတိုင်းရင်းသားတွေဟာ မြန်မာပြည်မှာရှိကြသလိုဘဲ ထိုင်းနိုင်ငံမြောက်ပိုင်းမှာလဲ ရှိကြပါတယ်။ ကျမအဖေနဲ့ မိသားစုဟာ ထိုင်းနိုင်ငံ၊ ချင်းရိုင်ကို ရောက်လာခဲ့ကြပြီး အခုချိန်ထိလဲ ကျမအဖေက အဲဒီမှာဘဲ နေပါတယ်။ ကျမလည်း ချင်းရိုင်မှာဘဲ မွေးတာပါ။ ဘန်ကောက်ကိုတော့ နောက်ပိုင်းမှာ ကျောင်းတက်ဖို့အတွက် ရောက်လာခဲ့တာပါ။
Thai Seng Thai ပါတီရဲ့ ကိုယ်စားလှယ်လောင်းလည်းဖြစ်၊ ပါတီပြောခွင့်ရလည်းဖြစ်တဲ့ Tida Yingcharoen ကို ဗွီအိုအေမြန်မာပိုင်းမှ ကိုဇော်ဝင်းလှိုင် တွေ့ဆုံမေးမြန်းနေစဉ်
ဇော်ဝင်းလှိုင်။ ။ထိုင်းနိုင်ငံ မှာဆိုရင် အခု ၂၀၁၄ ခုနှစ်က အာဏာသိမ်းထားတဲ့ စစ်ဗိုလ်ချုပ်ကဘဲ အရပ်သားအသွင်ပြောင်းပြီး ဝန်ကြီးချုပ်အဖြစ်နဲ့ အုပ်ချုပ်နေတယ်။ အခု နောက်ဆုံးကျင်းပခဲ့တဲ့ မေလ ၁၄ ရက်နေ့ ရွေးကောက်ပွဲ စစ်အုပ်စု ကျောထောက်နောက်ခံပေးထားတဲ့ ပါတီတွေ အပြတ်အသတ် ရှုံးနိမ့်ခဲ့တယ်။ ဒါပေမယ် မြန်မာနိုင်ငံမှာတော့ အာဏာသိမ်းထားတဲ့ စစ်တပ်က အုပ်ချုပ်နေဆဲဘဲ။ ဒါကြောင့်လည်း ဒီမိုကရေစီအင်အားစုတွေနိုင်ပြီး မြန်မာ့ ဒီမိုကရေစီအရေး လှုပ်ရှားမှုအတွက်လည်း အထောက်အကူပြုမယ်ဆိုတဲ့ မျှော်လင့်ချက်တွေ မြန်မာတွေအကြားမှာ ရှိခဲ့ကြတယ်။ နိုင်ငံရေးမှာ စစ်တပ်ကဝင်ရောက် ချယ်လယ်ပြီး လက်ဝါးကြီးအုပ်ထားတဲ့အချက် အပါအဝင် ထိုင်းနဲ့ မြန်မာအကြားမှာ တူညီတဲ့ အကြောင်းအရာရှိနေတယ်လို့ မြင်မိပါသလား။
Tida Yingcharoen။ ။ နှစ်နိုင်ငံအကြားမှာ တူညီတာတွေရော မတူတာတွေရော ရှိပါတယ်။ တူညီတဲ့အချက်တွေကို ကြည့်မယ်ဆိုရင်တော့ စစ်တပ်က အကြိမ်ကြိမ်အာဏာသိမ်းတာ၊ နိုင်ငံရေးမှာ စစ်တပ်ကဘဲ လက်ဝါးကြီးအုပ်ထားတာ၊ လူထုရဲ့ ကြီးပွား တိုးတက်ရေးကို သူတို့ကဘဲ ချယ်လှယ်နေတာတွေပေါ့။ ထိုင်းနိုင်ငံဟာလည်း အခု ကျမတို့ စကားထိုင်ပြောနေတဲ့အချိန်အထိ စစ်အစိုးရအုပ်ချုပ်မှုအောက်မှာဘဲ ရှိနေပါသေးတယ်။ မတူတဲ့အချက်တွေကို ကြည့်မယ်ဆိုရင်တော့ − လူထုရဲ့ ဒီမိုကရေစီနဲ့ လွတ်လပ်မှုကို လိုလားတဲ့ဆန္ဒ၊ နိုင်ငံတခုအတွက် အခြေခံအချက်ဖြစ်တဲ့ ကိုယ့်ကို အုပ်ချုပ်တဲ့အစိုးရကို ရွေးချယ်ပိုင်ခွင့်၊ လွတ်လပ်စွာ ရွေးချယ်ပိုင်ခွင့်၊ ဒါကို ငါတို့လိုချင်တယ်ဆိုတဲ့ ရွေးချယ်ပိုင်ခွင့် စတဲ့ အခြေခံအချက်တွေမှာ ကွာခြားတာကို တွေ့ရပါတယ်။
ဇော်ဝင်းလှိုင်။ ။ထိုင်းနိုင်ငံဟာ လက်ရှိမှာ ရွေးကောက်ပွဲပြီးခါစဆိုပေမယ့် ပါတီတခုထဲက အစိုးရဖွဲ့နိုင်လောက်တဲ့ အမတ်နေရာကို အနိုင်မရတာကြောင့် ညွန့်ပေါင်းအစိုးရဖွဲ့ဖို့ ပြင်ဆင်နေတဲ့အချိန်၊ ကြားကာလလိုမျိုး ဖြစ်နေတယ်။ တကယ်လို့များ ညွန့်ပေါင်းအစိုးရသစ် ဖွဲ့လိုက်နိုင်ပြီဆိုရင် မြန်မာနိုင်ငံက ဒီမိုကရေစီအရေးလှုပ်ရှားမှုကို ထိုင်းနိုင်ငံအနေနဲ့ တနည်းနည်းနဲ့ ကူညီပေးနိုင်မယ်လို့ ယူဆပါသလား။
Tida Yingcharoen။ ။ ကျမအထင်တော့ ရှုဒေါင့်မျိုးစုံ ကြည့်ဖို့ လိုမယ်ထင်ပါတယ်။ ပထမဆုံးအနေနဲ့ ဒီရွေးကောက်ပွဲကထွက်လာတဲ့ ရလဒ်ကို ကြည့်မယ်ဆိုပါစို့၊ အခုဆိုရင် လာအိုနိုင်ငံကလူငယ်တွေကလည်း ထိုင်းလိုမျိုးဘဲ ဒီမိုကရေစီရှိတာ၊ အတွေးအခေါ်သစ်ရှိတဲ့ လူငယ်တွေကဦးဆောင်တာကို လိုလားကြောင်း ထွက်ပြီး ဆန္ဒဖော်ထုတ်ကြတယ်။ ဒေသတွင်းမှာ အဲဒီလို အကျိုးသက်ရောက်မှုတွေ ချက်ခြင်း ဖြစ်ပေါ်စေပါတယ်။ အိမ်နီးချင်းနိုင်ငံမှာ ဖြစ်နေတာကိုကြည့်ပြီး ငါတို့လည်း ဒါမျိုးလိုချင်သလား၊ ဒါဟာ ငါတို့အတွက်ကောင်းသလား ဆိုတာမျိုး မေးခွန်းထုတ်ရမှာပါဘဲ။ ဒါပေမယ့် ကြားဝင်ဆောင်ရွက်ရေးဆိုတဲ့ ကိစ္စမျိုးမှာကျတော့ နိုင်ငံတကာဥပဒေတွေ၊ တပါးနိုင်ငံရဲ့ ပြည်တွင်းရေးကို ဝင်ရောက် မစွက်ဖက်ရဘူးဆိုတဲ့ အာဆီယံ ချာတာတွေကလည်း ရှိနေပါတယ်။ ဒါပေမယ့် လူ့အခွင့်ရေးချိုးဖောက်မှုလို အကြမ်းဖက်မှုတွေနဲ့ ပတ်သက်လာရင်တော့ ထိုင်းနိုင်ငံအနေနဲ့ ပိုပြီးတော့ လုပ်ဆောင်ဖို့ လိုမယ်လို့ ကျမထင်ပါတယ်။ ဥပမာအားဖြင့် မြန်မာနိုင်ငံမှာ ဗုံးတွေကျဲ၊ လူတွေ အမြောက်အများသေနေတာတွေဟာ စစ်ရာဇဝတ်မှုကျူးလွန်တာထက်ကို ပိုလွန်နေပြီလို ကျမထင်ပါတယ်။ အဲဒီလို အခြေအနေမျိုးမှာ ထိုင်းအစိုးရအနေနဲ့ ပိုပြီးတော့ လုပ်ပေးဖို့လိုတယ်လို့ ထင်ပါတယ်။
ဇော်ဝင်းလှိုင်။ ။တကယ်လို့များ အခုစီစဉ်ထားတဲ့အတိုင်း ညွန့်ပေါင်းအစိုးရသစ်သာ ဖွဲ့ဖြစ်ခဲ့မယ်ဆိုရင် မြန်မာရွေ့ပြောင်းအလုပ်သမားတွေအပေါ် ထိုင်းအစိုးရကထားတဲ့ သဘောထား ပျော့ပြောင်းတဲ့ဘက်ကို ပြောင်းလဲလာတာမျိုး ဖြစ်လာနိုင်မလား။ အထူးသဖြင့် ထိုင်းနိုင်ငံမှာ မွေးကြတဲ့ ရွေ့ပြောင်းအလုပ်သမားတွေရဲ့ ကလေးတွေ ဒီမှာ ပညာသင်ကြားခွင့်ရတာမျိုးပေါ့။
Tida Yingcharoen။ ။ ဒီကိစ္စက ကျမတို့ မဆွေးနွေးရသေးတဲ့ အကြောင်းအရာ ဖြစ်နေတာကြောင့် အစိုးရသစ်ကိုယ်စား ကျမအနေနဲ့ ပြောလို့မရပါဘူး။ ဒါပေမယ့် ကျမတို့ရဲ့ အခြေခံတွေးခေါ်က ဒီမိုကရေစီဝါဒအပေါ် အခြေခံထားတာဖြစ်တယ်၊ ကျမတို့ရဲ့ လူမှုအသိုင်းအဝိုင်းကို ပိုပြီး ကောင်းမွန် တိုးတက်စေချင်တယ်လို့ ပြောထားတာဖြစ်တဲ့အတွက် ဒီမှာရောက်နေကြပြီး သူတို့က အိမ်ရှင်နိုင်ငံရဲ့ လူမှုအသိုင်းအဝိုင်းကိုလည်း တဖက်တလမ်းက ကူညီ ထောက်ပံ့ပေးနေတဲ့ ရွေ့ပြောင်းအလုပ်သမားတွေ၊ ဒုက္ခသည်တွေကို ကူညီပေးဖို့ကိစ္စကို အစိုးရသစ်လက်ထက်မှာ ဆွေးနွေးလို့ရနိုင်မယ်လို့ ကျမထင်ပါတယ်။
ဇော်ဝင်းလှိုင်။ ။Tida ဟာ ကိုယ်တိုင်ကလည်း ဒုက္ခသည်မိသားစုက ဆင်းသက်လာတယ်၊ နောက် ညွန့်ပေါင်းအစိုးရသစ် ဖွဲ့မယ့်အထဲမှာ ကိုယ်တိုင် ပါဝင်ဖို့ရှိနေတယ် ဆိုတော့ ရွေ့ပြောင်းအလုပ်သမားတွေနဲ့ မြန်မာပြည်ကရောက်နေကြတဲ့ ဒုက္ခသည်တွေအတွက် အနည်းဆုံးအဆင့် ညွန့်ပေါင်းအစိုးရက တခုခုလုပ်ပေးနိုင်အောင် တိုက်တွန်း လုပ်ဆောင်သွားမယ်လို့ မျှော်လင့်လို့ရနိုင်မလား။
Tida Yingcharoen။ ။ ကျမအနေနဲ့လည်း အဲဒီကိစ္စကို လုပ်ဆောင်သွားဖို့ ရည်ရွယ်ထားပါတယ်။ ကျမ အရင်က ပါဝင်လုပ်ဆောင်ခဲ့တဲ့ နိုင်ငံခြားရေးပေါ်လစီဆိုင်ရာ ကိစ္စရပ်တွေကို လေ့လာကြည့်မယ်ဆိုရင်လည်း အဲဒီအကြောင်းအရာတွေကို တွေ့နိုင်မှာ ဖြစ်ပါတယ်။ ကျမအနေနဲ့ နောင်တက်လာမယ့် အစိုးရသစ်ကိုယ်စား အခုချိန်မှာ မပြောနိုင်သေးပေမယ့် လူမှုအသိုက်အဝန်း တိုးတက်ကောင်းမွန်အောင် လုပ်ဆောင်ကြမယ်ဆိုံ အခြေခံမူဝါဒကို သဘောတူထားပြီး ဖြစ်မယ်ဆိုရင် ဒီကိစ္စကို မလုပ်နိုင်စရာ မရှိဘူးလို့ ကျမမြင်ပါတယ်။ အထူးသဖြင့် မြန်မာနိုင်ငံအတွင်းက အခြေအနေတွေ ပိုပြီး ဆိုးလာနေတဲ့အချိန်မှာ တခုခုတော့ လုပ်ပေးရမယ့်တာဝန်ရှိပါတယ်။ ပထဝီအနေအထားအရ နီးစပ်မှုရှိနေတဲ့အတွက်လည်း ကျမတို့အနေနဲ့ ပိုပြီး လုပ်ပေးရမယ့်တာဝန်ရှိပါတယ်။ အာဆီယံ ဘုံသဘောတူညီချက် (၅) ချက်ကို အကောင်အထည်ဖော်လာအောင် ထိုင်းနိုင်ငံဘက်က ဖိအားပေး လုပ်ဆောင်တာတောင် မတွေ့ရပါဘူး။ နောက် တခြားကိစ္စရပ်တွေမှာလည်း (မြန်မာနိုင်ငံအတွက်) ကျမတို့အနေနဲ့ အများကြီး လုပ်ပေးသင့်တယ်လို့ ထင်ပါတယ်။
ဖခင်ကိုယ်တိုင်က ထိုင်းနိုင်ငံကို ဒုက္ခသည်အဖြစ်နဲ့ ရောက်ရှိလာရာခဲ့တာကြောင့် ငယ်စဉ်ကတည်းက ချို့တဲ့စွာ နေထိုင်ခဲ့ရပေမယ့် ပညာရဲ့တန်ဖိုးကို အလေးထားပြီး ကြိုးစားခဲ့တာကြောင့် Scholarships ပညာသင်ဆုတွေ အဆင့်ဆင့်ရရှိပြီး နောက်ဆုံးမှာ ကမ္ဘာကျော် ဗြိတိန်နိုင်ငံ အောက်စဖို့ဒ် တက္ကသိုလ်မှာ မဟာဘွဲ့ကို ပညာသင်ဆုနဲ့ဘဲ တက်ခွင့်ရခဲ့ပါတယ်။
သူမကိုယ်တိုင်လည်း တချိန်ကစိတ်ပျက် အားငယ်မလို ဖြစ်ခဲ့ဘူးပေမယ့် မျှော်လင့်တွေ ပျောက်မသွားဘဲ ဆက်လက် ကြိုးစား လုပ်ဆောင်ခဲ့တာကြောင့် ဒီအခြေအနေကို ရောက်လာခဲ့တာကြောင့် ထိုင်းနိုင်ငံအပါအဝင် နိုင်ငံတကာမှာ ရောက်နေကြတဲ့ မြန်မာ ရွေ့ပြောင်းအလုပ်သမားတွေနဲ့ ဒီမိုကရေစီအရေး တိုက်ပွဲဝင်နေကြသူတွေအတွက်လည်း Tida Yingcharoen က အခုလို တိုက်တွန်း ပြောကြားခဲ့ပါတယ်။
Tida Yingcharoen။ ။ ပထမဆုံးအနေနဲ့ မျှော်လင့်ချက်တွေ ပြောက်ပျက်မသွားကြပါနဲ့လို့ ကျမ ပြောချင်ပါတယ်။ ထိုင်းနိုင်ငံမှာ အခုလို ဒီမိုကရေစီစံနစ် ထွန်းကားလာတဲ့နေ့ကို မြင်ရလိမ့်မယ်လို့ ကျမလည်း အစောပိုင်းက မထင်ခဲ့မိပါဘူး။ ကျမကိုယ်တိုင်လည်း အစောပိုင်းက အတော်လေး စိတ်ပျက်မိခဲ့ဘူးပါတယ်။ ဒါကြောင့် စိတ်ဓာတ်မကျကြပါနဲ့လို့ ဦးစွာ ပြောကြားလိုပါတယ်။ ဒုတိယအချက်နေနဲ့ ကျမပြောချင်တာကတော့ − ကျမကိုယ်တိုင်လည်း အခွင့်အရေးအတွေရခဲ့တာကြောင့် အခုလို အောင်မြင်မှုတွေကို ရခဲ့တာပါ။ ဒါကြောင့် ချင်းရိုင်မှာဖြစ်ဖြစ်၊ မြန်မာနိုင်ငံထဲမှာဘဲဖြစ်ဖြစ်၊ နယ်စပ်ဒေသမှာဘဲဖြစ်ဖြစ်၊ ကမ္ဘာ့ဘယ်နေရာမှာဘဲဖြစ်ဖြစ်ပေါ့၊ နောက်မှာ ရှိနေတဲ့သူတွေကို ကူညီပေးရမယ့်တာဝန် ကျမမှာ ရှိနေပါတယ်။ အားလုံးတန်းတူညီမျှမှုရှိတဲ့၊ လူတွေအတွက် အခွင့်အလန်းတွေပိုပြီး ရှိတဲ့ လူမှုဘဝဖြစ်လာအောင် ကျမ ကြိုးစား လုပ်ဆောင်သွားဖို့ ဆုံးဖြတ်ထားပါတယ်။ အစိုးရအသစ်အနေနဲ့ မြန်မာအပါအဝင် ဒုက္ခသည်တိုင်းကို ကောင်းကောင်းမွန်မွန် သူတို့ရသင့်တဲ့ အခွင့်အရေးတွေနဲ့အညီ ဆက်ဆံတာကို မြင်တွေ့လိုပါတယ်။ အထူးသဖြင့်တော့ မျှော်လင့်ချက်တွေ ပျက်မသွားကြဖို့ ပြောလိုပါတယ်။
Tida ဟာ သူမဘဝကို အားနည်းချက် (၃) ခုနဲ့ စခဲ့ရတဲ့သူဖြစ်တယ်လို့ လူတွေကို အမြဲပြောပြလေ့ရှိတယ်လို့ ဆိုပါတယ်။ နံပတ် (၁) အချက်ကတော့ ဖခင်ဖြစ်သူဟာ ဒုက္ခသည်ဖြစ်ခဲ့တာကြောင့် လူသားတယောက်ရဲ့ အခြေခံရပိုင်ခွင့်တွေ ဆုံးရှုံးပြီး နိုင်ငံမဲ့ဘဝနဲ့ နေခဲ့ရတဲ့ မိဘကနေ ပေါက်ဖွားလာတာ၊ နံပတ် (၂) အချက်ကတော့ − အဲဒီလို ဒုက္ခသည်ဖခင်က မွေးဖွားလာတဲ့အတွက် ငွေကြေး မပြည့်စုံဘဲ ချို့တည့်တဲ့ဘဝနဲ့ ကြီးပြင်းလာခဲ့ရတာကြောင့် လူမှုအသိုင်းဝိုင်းမှာ မဝင်ဆန့်တာနဲ့ နံပတ် (၃) အချက်ကတော့ မိန်းကလေး ဖြစ်နေတာ။ အမျိုးသမီးဖြစ်တဲ့အတွက် ဘယ်လူမှုအသိုင်းမှာပဲဖြစ်ဖြစ် အရာရာမှာ အမျိုးသားတွေရဲ့နောက်မှာ ရှိနေရတဲ့ အချက်တွေဖြစ်တယ်လို့ ဆိုပါတယ်။
ပြီးခဲ့တဲ့ လွှတ်တော်သက်တမ်းကာလအတွင်း ရွေးကောက်တင်မြောက်ခံခဲ့ရတဲ့ အမျိုးသမီးအမတ်အရေအတွက်ဟာ ၁၄% ဘဲ ရှိတယ်လို့ ဆိုပါတယ်။ ဒါကြောင့်လည်း ထိုင်းနိုင်ငံရေးလောကထဲဝင်ပြီး လွှတ်တော်မှာ အမျိုးသမီးတွေရဲ့အသံကို ကိုယ်စားပြုနိုင်အောင် ရွေးကောက်ပွဲမှာ ဝင်ရောက်ယှဉ်ပြိုင်တာ ဖြစ်တယ်လို့ Tida က ပြောပါတယ်။ သူမကိုယ်တိုင်ကလည်း အမျိုးသမီး တန်းတူအခွင့်အရေးအတွက် ထိုင်းနိုင်ငံမှာ တတ်နိုင်သလောက် ကြိုးစား လုပ်ဆောင်နေသူဖြစ်ပါတယ်။
Your browser doesn’t support HTML5
ပြန်လည်သင့်မြတ်ရေး တာဝန်ခံတဲ့ပြောင်းလဲမှုလို “မေးမြန်းခန်း”