ဆီးရီယားက တပ်တွေရုပ်ဖို့ ကန် ပိုင်းဖြတ်ထားဆဲ

ဆီးရီးယားက အမေရိကန် တပ်ဖွဲ့တွေ ရုပ်သိမ်းရေး သမ္မတ Donald Trump ဘက်က ပိုင်းဖြတ်ထားဆဲ ဖြစ်တယ်လို့ အိမ်ဖြူတော်က ပြောဆိုပါတယ်။ ဆီးရီးယားမှာ အမေရိကန် တပ်တွေ ဆက်လက် ချထားဖို့ သမ္မတ Trump ကို စည်းရုံး ပြောဆို ထားတယ်ဆိုပြီး ပြင်သစ် သမ္မတ Emmanuel Macron က ပြောဆိုလိုက် အပြီးမှာ အမေရိကန် သမ္မတ အိမ်ဖြူတော်က အခုလို ပြောဆိုလိုက်တာ ဖြစ်ပါတယ်။

ဆီးရီးယားဆိုင်ရာ အမေရိကန် မစ်ရှင်မှာ အပြောင်းအလဲ မရှိကြောင်း၊ အမေရိကန်တပ်တွေ အမြန်ဆုံး ပြန်လည် ရုပ်သိမ်းလိုကြောင်း သမ္မတ အနေနဲ့ ရှင်းရှင်းလင်းလင်း ရှိထားပြီး ဖြစ်ကြောင်း အိမ်ဖြူတော် ပြောခွင့်ရ Sarah Huckabee Sanders က မနေ့ တနင်္ဂနွေနေ့ နှောင်းပိုင်း ကြေညာချက်မှာ ပြောဆိုထားပါတယ်။ အမေရိကန်တို့ အနေနဲ့ အစ္စလာမ္မစ် အစွန်းရောက် IS စစ်သွေးကြွ အဖွဲ့ကို လုံး၀ ချေမှုန်းပြီး ပြန်လည် ဦးမော့မလာရေး ကြိုတင်ကာကွယ်ဖို့ ဆောင်ရွက်လိုတာ ဖြစ်တယ်လို့လည်း သူမက ထပ်လောင်း ပြောပါတယ်။

မနေ့ တနင်္ဂနွေနေ့ အစောပိုင်းမှာ ပြင်သစ် သမ္မတ Macron က ဆီးရီးယားကနေ အမေရိကန် တပ်ဖွဲ့တွေ ပြန်ရုပ်သိမ်းမယ်ဆိုတာကို လွန်ခဲ့တဲ့ ၁၀ ရက်တုန်းက သမ္မတ Trump က ပြောဆိုခဲ့ကြောင်း၊ ဆီးရီးယားမှာ အမေရိကန်တပ်တွေ ရေရှည် ဆက်ပြီး ချထားဖို့ လိုအပ်တယ်ဆိုတာကို သမ္မတ Trump ကို စည်းရုံးပြောဆိုထားကြောင်း ပြင်သစ်နိုင်ငံ BFM ရုပ်သံကို ပြောဆိုခဲ့တာပါ။

ဆီးရီးယား နိုင်ငံက ဓာတုလက်နက်တွေနဲ့ သက်ဆိုင်တဲ့ နေရာတွေကို အမေရိကန်နဲ့ ဗြိတိန်တို့ရဲ့ လေကြောင်း တိုက်ခိုက်မှုမှာ ပြင်သစ်တို့ ပူးပေါင်းပါဝင်ခဲ့ပြီး ၂ ရက် အကြာမှာ အခုလို မှတ်ချက်ပေး ပြောဆိုမှုတွေ ထွက်ပေါ်လာတာပါ။ ဆီးရီးယား အပေါ် လေကြောင်း တိုက်ခိုက်မှုတွေကို သမ္မတ Trump က ဆက်လုပ်ချင်ခဲ့ကြောင်း ပြင်သစ် သမ္မတက ပြောဆိုပြီး သူ့အနေနဲ့ကတော့ လေကြောင်း တိုက်ခိုက်မှုကို အကန့်အသတ်နဲ့ လုပ်ဖို့ လိုအပ်တယ်ဆိုတာကို ပြောဆိုခဲ့ပါတယ်လို့လည်း ပြောဆိုသွားပါတယ်။

ဆီးရီယားက တပ်တွေရုပ်ဖို့ ကန် ပိုင်းဖြတ်ထားဆဲ