ရိုဟင်ဂျာ မိသားစု တခု ပထမဆုံး အနေနဲ့ ဌာနေပြန်လည် ဝင်ရောက်လာကြောင်း မြန်မာ အစိုးရက မနေ့ စနေနေ့က ကြေညာလိုက်ပါတယ်။ မောင်တော ဒေသ အကြမ်းဖက်မှုတွေကြောင့် နေရပ် စွန့်ခွာထွက်ပြေးသူ မိသားစု တခု တောင်ပြိုလက်ဝဲ ပြန်လည် လက်ခံရေး စခန်းကို ဝင်ရောက်လာတာလို့ အစိုးရက သတင်းထုတ်ပြန်ခဲ့တာပါ။
ဌာနေပြန်လာမယ့် ရိုဟင်ဂျာတွေ အတွက် လုံခြုံရေး စိုးရိမ်ချက်ကို မဖြေရှင်းရသေးတာကြောင့် အခုဆောင်ရွက်ချက်က လူတွေ အာရုံစိုက်လာအောင် ဖန်တီးဆောင်ရွက်ချက်သာ ဖြစ်တယ်လို့ အခွင့်အရေး လှုပ်ရှားသူတွေက ပြောဆိုကြပါတယ်။
မြန်မာနိုင်ငံက အခြေအနေတွေက ဘေးကင်းလုံခြုံမှုရှိရှိ၊ ဂုဏ်သိက္ခာနဲ့ အညီ ဖြစ်ပြီး ရေရှည် ခံမယ့် ဌာနေပြန်ရေး အတွက် အခြေအနေမျိုး မရှိသေးဘူးလို့ ဒုက္ခသည်များဆိုင်ရာ ကုလ အဖွဲ့က ပြီးခဲ့တဲ့ သောကြာနေ့မှာ ပြောဆိုထားတာပါ။ မြန်မာ အစိုးရ ထုတ်ပြန်ချက်မှာတော့ မောင်တော အကြမ်းဖက်မှုကြောင့် နေရပ်စွန့် ထွက်ပြေးရတဲ့ မိသားစုဝင် ၅ ဦး ပြန်လည် ဝင်ရောက်လာတာ ဖြစ်ပြီး သူတို့ကိုတော့ နိုင်ငံတွင်း အမှန်တကယ် နေထိုင်ခြင်း ရှိမရှိ၊ နိုင်ငံသား ဖြစ်မှု ဥပဒေနဲ့ စစ်ဆေးခဲ့ပြီး နိုင်ငံသား စိစစ်ခံမည့်သူတွေကို ထုတ်ပေးတဲ့ NV ကတ်ပြားတွေ ထုတ်ပေးခဲ့တယ်လို့ ဖော်ပြပါတယ်။
ပြန်လည် ဝင်ရောက်လာသူ ၅ ဦးတို့ကတော့ မောင်တောမြို့က ဆွေမျိုးတွေ အိမ်မှာ ယာယီ နေရာချထားပေးထားကြောင်းလည်း သတင်းမှာ ဖော်ပြပါတယ်။ အစိုးရ ထုတ်ပြန်တဲ့ သတင်းဓာတ်ပုံမှာတော့ အမျိုးသားတဦး၊ အမျိုးသမီး ၂ ဦးနဲ့ ကလေး ၂ ဦးတို့ကို တွေ့ရပါတယ်။
Your browser doesn’t support HTML5
ပထမဆုံး ရိုဟင်ဂျာမိသားစုတစု ပြန်လည်ဝင်ရောက်