စုပြုံမြှုပ်နှံထားတဲ့ နေရာ ၅ ခု ရခိုင်မြောက်ပိုင်းမှာတွေ့

ရခိုင်ပြည်နယ်မြောက်ပိုင်းမှာ အစုလိုက်အပြုံလိုက် မြှုပ်နှံထားတဲ့ နောက်ထပ်နေရာ ၅ ခုကို အတည်ပြုနိုင်ကြောင်း AP သတင်းဌာနရဲ့ ဖေါ်ပြချက်နဲ့ ပတ်သက်ပြီး ထိထိရောက်ရောက် စုံစမ်းစစ်ဆေးခွင့်ပြုဖို့ မြန်မာအစိုးရကို ကုလသမဂ္ဂက တိုက်တွန်းလိုက်ပါတယ်။

ဒီသတင်းနဲ့ ပတ်သက်ပြီး ကုလသမဂ္ဂက အထူးစိုးရိမ်ကြောင်းနဲ့ မြန်မာအစိုးရအနေနဲ့ ကုလသမဂ္ဂအဖွဲ့တွေကို အဲဒီဒေသကို သွားခွင့်ပြုဖို့ ကြာသပတေးနေ့ သတင်းစာ ရှင်းလင်းပွဲမှာ ကုလသမဂ္ဂအတွင်းရေးမှုးချုပ်ရုံး ပြောခွင့်ရ Stéphane Dujarric ကပြောကြားခဲ့ပါတယ်။

"ဒီသတင်းက အစုလိုက်အပြုံလိုက် မြှုပ်နှံထားပုံရတယ်လို့ ပြောတဲ့အတွက် အတော့်ကို စိတ်အနှောက်အယှက်ဖြစ်စရာပါ။ ဒီသတင်းနဲ့ ပတ်သက်ပြီး ကုလသမဂ္ဂက သိပ်စိတ်ပူ ပါတယ်။ ဒီလို ဖြစ်နေတဲ့ သတင်းမျိုး ရခိုင်ပြည်နယ်မှာ တွေ့ရတာကြောင့် ဒါဟာ ရခိုင်ပြည်နယ်ထဲကို ကုလသမဂ္ဂ သွားခွင့် ရဖို့ လိုနေပြီဆိုတာကို ပြလိုက်တာ ဖြစ်ပါတယ်။ လူသားချင်းစာနာမှုအတွက်ရော လူ့အခွင့်ရေးဆိုင်ရာ လက်ရှိအခြေနေတွေကိုပါ ကုလသမဂ္ဂက သိအောင် သွားဖို့လိုသလို လူသားချင်းစာနာမှုကူညီသူတွေ၊ သတင်း မီဒီယာတွေကိုလည်း ဖွင့်ပေးဖို့ လိုပါတယ်။ အခုသွားခွင့်မရပါဘူး။ ဒီသတင်းမျိုးတွေ မှန်မမှန် သိရဖို့ အဲဒီနေရာကို သွားနိုင်ရေးဟာ သိပ်အရေးကြီးပါတယ်။"

ဂူဒါပြင်ရွာမှာ အစုလိုက်အပြုံလိုက် မြှုပ်နှံထားတဲ့နေရာ ၅ ခုထက်မနဲတွေ့ရကြောင်း အတည်ပြုလို့ရတယ်လို့ AP သတင်းမှာ ဖေါ်ပြထားတာ ဖြစ်ပါတယ်။

လူပေါင်း ၂ ဒါဇင်ကျော်ကို တွေ့မေးမြန်းပြီး လက်ကိုင်ဖုံးနဲ့ မှတ်တမ်းတင်ထားတဲ့ အချက်အလက်တွေအရ စစ်တပ်နဲ့ ဒေသခံရွာသားတွေက သြဂုတ်လထဲမှာ သတ်ဖြတ်ခဲ့တာ ဖြစ်ကြောင်း တင်ပြထားတာပါ။

စုပြုံမြှုပ်နှံထားတဲ့ နေရာ ၅ ခု ရခိုင်မြောက်ပိုင်းမှာတွေ့