အမေရိကန် တရုတ် ကုန်သွယ်ရေး သဘောတူညီချက်သစ်ရရှိ

အမေရိကန်ပြည်ထောင်စုနဲ့ တရုတ် နှစ်နိုင်ငံကြား ဘဏ်လုပ်ငန်းတွေကနေ အမဲသား တင်ပို့ရောင်းချမှုတွေအထိ ပါဝင်တဲ့ ကုန်သွယ်ရေး သဘောတူညီချက်တရပ် လက်မှတ်ရေးထိုးနိုင်ခဲ့တဲ့အကြောင်း အမေရိကန် ကုန်သွယ်ရေးဝန်ကြီးဌာနက ကြာသပတေးနေ့မှာ ကြေညာပါတယ်။ ဒါဟာ နှစ်နိုင်ငံကြား ထူးခြားလှတဲ့ အောင်မြင်မှုကြီးတခု၊ နှစ်နိုင်ငံကုန်သွယ်ရေး သမိုင်းမှာ အကြီးမားဆုံး အောင်မြင်မှုကြီး ပါပဲလို့ အမေရိကန် ကုန်သွယ်ရေးဝန်ကြီး Wilbur Ross က ပြောပါတယ်။

အခုသဘောတူညီချက်ဟာဆိုရင် ပြီးခဲ့တဲ့ ဧပြီလ ၆ ရက်နေ့တုန်းက အမေရိကန်သမ္မတ Donald Trump နဲ့ တရုတ်သမ္မတ ရှီကျင်းဖျင်တို့ ဖလော်ရီဒါပြည်နယ် Palm Beach မြို့က သမ္မတ Trump ပိုင် Mar-a-Lago အပန်းဖြေစခန်းမှာ တွေ့ဆုံမှုအတွင်း ရယူခဲ့တဲ့ သဘောတူညီချက်ရဲ့ ရလဒ်ပဲ ဖြစ်ပါတယ်။ သမ္မတနှစ်ဦး တွေ့ဆုံခဲ့ချိန်ကစပြီး ညှိနှိုင်း ဆွေးနွေးမှုတွေ လုပ်ဆောင်လာခဲ့တာမှာ သမ္မတ Trump ကို နေ့စဉ်နီးပါး အစီရင်ခံတာတွေ လုပ်ခဲ့တယ်လို့လည်း ဝန်ကြီး Ross က ပြောပါတယ်။

နည်းပညာပိုင်းဆိုင်ရာ အကြံဉာဏ် ရယူမှုတွေ နောက်တကြိမ် ပြီးတာနဲ့ အစားအသောက်နဲ့ သားငါးဆိုင်ရာ နိုင်ငံတကာ စံနှုန်းစံထားတွေနဲ့အညီ အမေရိကန်က အမဲသားတွေကို ဇူလိုင်လ ၁၆ ရက်နေ့ထက် နောက်မကျဘဲ တင်သွင်းခွင့် ပြုဖို့ တရုတ်အစိုးရက သဘောတူထားတဲ့အကြောင်း ဝန်ကြီး Ross က အိမ်ဖြူတော်မှာ သတင်းထောက်တွေကို ပြောပါတယ်။

တရုတ်နိုင်ငံ ဈေးကွက်ထဲ ထိုးဖောက်ခွင့် ရတာဟာ သူတို့အတွက် တကယ့်အရေးပါတဲ့ အခွင့်အလမ်းဖြစ်တယ်လို့ ဆိုပြီး အမေရိကန် နွားမွေးမြူရေးအသင်း ကလည်း အခု သဘောတူညီချက်ကို ကြိုဆိုပါတယ်။ သဘောတူညီချက်အရ အမေရိကန် ဘဏ္ဍာရေးနဲ့ စီးပွားရေးလုပ်ငန်းတွေ တရုတ်နိုင်ငံထဲမှာ တိုးချဲ့ လုပ်ကိုင်ခွင့်လည်း ရမှာဖြစ်ပါတယ်။

အမေရိကန် တရုတ် ကုန်သွယ်ရေး သဘောတူညီချက်သစ်ရရှိ