ရန်ကုန်မြို့၊ ကန်တော်ကြီး Palace ဟိုတယ်လ် ကြာသပတေးနေ့ မနက် သုံးနာရီခွဲလောက်က စတင်မီးလောင်သွားခဲ့ပြီး မနက် ၆ နာရီခွဲလောက်မှာ မီးကိုထိန်းသိမ်းနိုင်လိုက်ပြီဖြစ်ပါတယ်။ ဟိုတယ်ရဲ့ ငါးလွှာက စတင်လောင်ကျွမ်းတယ်လို့ မြေပြင်အခြေအနေအရ သိရကြောင်း ရန်ကုန်အခြေစိုက် ဗွီအိုအေသတင်းထောက်က ပြောပါတယ်။ ဟိုတယ်လ်တခုလုံး ၇၀ % လောင်ကျွမ်းသွားခဲ့ပြီး မီးသတ်သမားတချို့နဲ့ ဟိုတယ်လ်က ဧည့်သည်တချို့လည်း ဒဏ်ရာရရှိသွားပေမယ့် အသေအပျောက်မရှိဘူးလို့ ဆိုပါတယ်။ ဒီမီးကို လောင်ကျွမ်းမှုအဆင့် (၄) လို့ သတ်မှတ်ထားကြောင်း မီးသတ်ဦးစီးဌာနကို ကိုးကားပြီး ပြောပါတယ်။
မီးလောင်ကျွမ်းစဉ်အတွင်း ရန်ကုန်တိုင်းအတွင်းက မီးသတ်ကားအများအပြား လာရောက်ဝိုင်းဝန်း ငြိမ်းသတ်ခဲ့တယ်လို့ သိရပါတယ်။
