ဆီးရီယားနိုင်ငံကနေ အမေရိကန်တပ်တွေကို အလျင်အမြန် ရုပ်သိမ်းမှာ မဟုတ်ဘူးလို့ အမေရိကန်သမ္မတ Donald Trump ရဲ့ အမျိုးသားလုံခြုံရေးအကြံပေးက ပြောလိုက်ပါတယ်။
IS အကြမ်းဖက်ဝါဒစွဲအဖွဲပကို နှိမ်နင်းနိုင်တဲ့ အခြေအနေအပေါ်တည်ပြီးတော့ အမေရိကန်စစ်တပ်တွေကို ပြန်လည်ရုပ်သိမ်းသွားမှာဖြစ်တယ်လို့ အစ္စရေးနိုင်ငံကို ရောက်နေတဲ့ အမေရိကန်အမျိုးသားလုံခြုံရေးအကြံပေး John Bolton က တနင်္ဂနွေနေ့မှာ ပြောလိုက်တာပါ။ သမ္မတ Trump အနေနဲ့ ISIS ရဲ့ အာဏာသြဇာတွေကို ချေမှုန်းပစ်လိုတယ်လိုတယ်လို့ ကန် အမျိုးသားလုံခြုံရေးအကြံပေးက ပြောပါတယ်။
အမေရိကန်တပ်တွေ မရုပ်သိမ်းခင်မှာ အမေရိကန်မဟာမိတ်ဖြစ်တဲ့ ကဒ်တိုက်ခိုက်ရေးသမားတွေရဲ့ လုံခြုံရေးနဲ့ပတ်သက်လို့လည်း တူရကီနိုင်ငံဖက်က အာမခံချက် လိုချင်တယ်လို့လည်း အမေရိကန်အမျိုးသားလုံခြုံရေးအကြံပေး John Bolton က ပြောလိုက်ပါတယ်။ ဆီရီယားနိုင်ငံကနေ အမေရိကန်တပ် ရုပ်မယ်လို့ သမ္မတ Donald Trump ရဲ့ ကြေညာချက်ဟာ အတော်လေး ဝေဖန်ခံခဲ့ရတာပါ။ လာမယ့် သီတင်းပတ်အတွင်း ဒီအစီအစဉ်ဖြစ်လာလိမ့်မယ်လို့ ခန့်မှန်းရပါတယ်။ Mr.Bolton ရဲ့ အခု မှတ်ချက်ဟာ ဆီးရီယားကနေ အမေရိကန်တွေ ရုပ်သိမ်းဖို့ကိစ္စ ဖြေးဖြေးလုပ်သွားမယ်ဆိုတာကို ပထမဦးဆုံး အများပြည်သူကို အတည်ပြုပြောဆိုချက်ဖြစ်ပါတယ်။
