အမေရိကန် ဘဏ္ဍာရေးဝန်ကြီး တရုတ်ဝန်ကြီးချုပ်နဲ့ ဘေဂျင်းမှာဆွေးနွေး

အမေရိကန်နဲ့ တရုတ်နိုင်ငံကြား လွန်ခဲ့တဲ့တနှစ်အတွင်း ခက်ခဲတဲ့ ဆွေးနွေးပြောဆိုမှုတွေရဲ့ ရလဒ်အဖြစ် ပိုမိုတည်ငြိမ်တဲ့ အခြေခံတွေ ရရှိခဲ့ကြောင်း အမေရိကန် ဘဏ္ဍာရေးဝန်ကြီး Janet Yellen က တရုတ်ဝန်ကြီးချုပ် Li Qiang ကို ဒီကနေ့ပဲ ပြောလိုက်ပါတယ်။

ဘေဂျင်းမြို့တော်က တွေ့ဆုံမှုအစမှာပဲ တရုတ်ဝန်ကြီးချုပ်ကလည်း ကမ္ဘာ့စီးပွားရေး အင်အားကြီး ၂ နိုင်ငံကြား အပြန်အလှန် လေးစားပြီး ရန်ဘက်တွေလို သဘောမထားဖို့ ပြောဆိုခဲ့သလို၊ အမေရိကန် ဘဏ္ဍာရေးဝန်ကြီးရဲ့ ခရီးစဉ်ကနေ အပြုသဘောဆောင်တဲ့ တိုးတက်မှုတွေ ရှိခဲ့ကြောင်း ပြောဆိုခဲ့တာပါ။ ရှုပ်ထွေးနက်နဲတဲ့ ၂ နိုင်ငံ ဆက်ဆံရေးကို တာဝန်သိသိ စီမံခန့်ခွဲဖို့ တာဝန်ရှိကြောင်း ဝန်ကြီး Yellen က ပြောခဲ့သလို၊ တရုတ်ခေါင်းဆောင်ပိုင်းနဲ့ သဘောထား ကွဲပြားမှုတွေကိုလည်း ပြောဆိုခဲ့ပါတယ်။

တရုတ်နိုင်ငံက ကုန်ထုတ်လုပ်ငန်းတွေကြောင့် အမေရိကန် လုပ်သားတွေနဲ့ ကုမ္ပဏီတွေ ထိခိုက်နစ်နာမှာကို စိုးရိမ်ကြောင်းလည်း ကြေညာချက် ထုတ်ပြန်ရာမှာ ပြောဆိုခဲ့တာပါ။ လျှပ်စစ်ကားတွေ၊ နေစွမ်းအင်သုံး ဆိုလာပြားတွေနဲ့ တခြားသန့်ရှင်းစွမ်းအင် ထုတ်ကုန်တွေကို တရုတ်နိုင်ငံက အလွန်အကျွံ ထုတ်လုပ်နေတဲ့ ကိစ္စနဲ့ ပတ်သက်လို့လည်း ၉ လအကြာ နောက်တကြိမ် ခရီးစဉ်မှာ ဆွေးနွေးမယ်လို့လည်း ဝန်ကြီး Yellen က ပြောဆိုခဲ့ပါတယ်။

တရုတ်ဝန်ကြီးချုပ်နဲ့ ဒီကနေ့ တွေ့ဆုံအပြီး အမေရိကန် ဘဏ္ဍာရေးဝန်ကြီးဟာ ဘေဂျင်းမြို့တော်ဝန် Yin Yong နဲ့လည်း တွေ့ဆုံခဲ့ပြီး၊ ပီကင်းတက္ကသိုလ်က ကျောင်းသားတွေ၊ ပါမောက္ခတွေနဲ့ တွေ့ဆုံတဲ့ အခမ်းအနားကိုလည်း တက်ရောက်ခဲ့ပါတယ်။