ဂါဇာဒေသ အရပ်သားသေဆုံးမှုတွေအတွက် အစ္စရေးဝန်ကြီးချုပ်ကို သမ္မတဘိုင်ဒင် သတိပေး

ဂါဇာကမ်းမြှောင်ဒေသမှာ ဟားမတ်စ်ကို အင်အားအပြင်းအထန်သုံး ချေမှုန်းနေတဲ့ အစ္စရေးဝန်ကြီးချုပ် ဘင်ဂျမင်နေတန်ယာဟု လုပ်ရပ်ဟာ အစ္စရေးနိုင်ငံအတွက် အထောက်အကူ မဖြစ်စေဘဲ ထိခိုက်နစ်နာမှုတွေသာ ဖြစ်စေကြောင်း သမ္မတ Joe Biden က ဝေဖေန်ပြောကြားလိုက်ပါတယ်။

ပြီးခဲ့တဲ့နှစ် အောက်တိုဘာလ (၇) ရက်နေ့က အစ္စရေးနိုင်ငံထဲ ဝင်ရောက် အကြမ်းဖက်တိုက်ခိုက်ခဲ့တဲ့ ဟားမတ်စ်အဖွဲ့ကို တန်ပြန်နှိမ်နင်းတဲ့ လုပ်ရပ်ကို ထောက်ခံပေမဲ့ နေတန်ယာဟုအနေနဲ့ အပြင်းအထန် လိုက်လံချေမှုန်းတဲ့ အကျိုးဆက်ကြောင့် အပြစ်မဲ့ပြည်သူတွေရဲ့ အသက်ပေါင်းများစွာ ဆုံးရှုံးနေတဲ့ အခြေအနေကို ပိုပြီးအာရုံစိုက်ရလိမ့်မယ်လို့လည်း သမ္မတ Biden က ပြောပါတယ်။

ဂါဇာမှာ အရပ်သားသေဆုံးမှု တိုးလာတဲ့အတွက် အစ္စရေးအပေါ် နိုင်ငံတကာထောက်ခံမှုတွေ ဆုံးရှုံးသွားနိုင်တယ်လို့ လပေါင်းများစွာကတည်းက သမ္မတ Biden က သတိပေးခဲ့တာပါ။ အမေရိကန် ရုပ်သံသတင်းဌာန MSNBC ရဲ့ စနေနေ့က ထုတ်လွှင်ခဲ့တဲ့ မေးမြန်းခန်းအစီအစဉ်မှာ သမ္မတ Biden ရဲ့ အစ္စရေးနဲ့ ပတ်သက်လို့ ပြောဆိုချက်တွေကို ကြည့်ခြင်းအားဖြင့် အစ္စရေးနဲ့ အမေရိကန် ခေါင်းဆောင်နှစ်ဦးကြား တင်းမာတဲ့ ဆက်ဆံရေးကို ပေါ်လွင်စေပါတယ်။

ဂါဇာမှာ အရပ်သားသေဆုံးမှုတွေဟာ အစ္စရေးရဲ့ ရပ်တည်ချက်နဲ့ ဆန့်ကျင်နေပြီး ကြီးမားတဲ့ အမှားတခုဖြစ်ကြောင်းလည်း သမ္မတ Biden ကမှတ်ချက်ပေးပြောဆိုခဲ့ပါတယ်။