EUဥရောပ သမဂ္ဂ ခေါင်းဆောင်တွေက ရွှေ့ပြောင်း ဒုက္ခသည်တွေ ဥရောပကို မလာဖို့ ပြောကြားမှုအတွက် UNHCR ကုလသမဂ္ဂ ဒုက္ခသည်များ ဆိုင်ရာ မဟာမင်းကြီးရုံးက အပြစ်တင် ဝေဖန်လိုက်ပါတယ်။ ဆီးရီးယား၊ အာဖဂန်နစ္စတန် နဲ့ အီရတ်နိုင်ငံတွေကနေ ဂရိနိုင်ငံ ကို ရောက်လာကြ တဲ့ ရွှေ့ပြောင်း ဒုက္ခသည် ၉၁ ရာခိုင်နှုံးဟာ ပဋိပက္ခ ဖြစ်ပွါးနေ တဲ့ ဒေသကနေ လွတ်မြောက်အောင် ထွက်ပြေးလာကြ တာ ဖြစ်ပြီးအလုပ်အကိုင် ရှာဖွေဖို့ ရောက်လာကြ တာ မဟုတ်ဖူးလို့ UNHCR ရဲ့ ဥရောပဗျူရို အကြီးအကဲ Vincent Cochetel က ဘရပ်ဆဲလ်မှာ သောကြာနေ့က သတင်းထောက်တွေကို ပြောပါတယ်။
အခုလို တုန့်ပြန်ပြောဆိုမှုဟာ EU ဥရောပကောင်စီ ဥက္ကဋ္ဌ Donald Tusk က နောက်ထပ် ရွှေ့ပြောင်း ဒုက္ခသည်တွေ ဥရောပကို ဝင်ရောက်လာနိုင်ခြေ ရှိတယ်လို့ ကြာသပတေးနေ့ တုန်းက သတိပေး ခဲ့ပြီးတဲ့ နောက်မှာ ပြောခဲ့ တာ ဖြစ်ပါတယ်။
သူက ဥရောပနိုင်ငံတွေဆီ တရားမဝင်ရွှေ့ပြောင်း ဝင်ရောက်ဖို့ မကြိုးစားစေ ချင်ကြောင်း အသက်အိုးအိမ် အဆုံးရှုံးခဲ့ပြီး မှောင်ခိုပွဲစားတွေရဲ့ စကားကို နားမယောင်ဖို့ ပြောကြားခဲ့တာပါ။ နိုင်ငံတကာ ဥပဒေအရ ပဋိပက္ခဖြစ်ပွါးနေ တဲ့ ဒေသတွေကနေ ထွက်ပြေးလာကြသူတွေ အနေနဲ့ နိုင်ငံရေး ခိုလှုံခွင့် လျှောက်ထားနိုင်ပါတယ်။
ဥရောပ သမဂ္ဂရဲ့ Eurostat စာရင်းအင်း ရုံးက သောကြာနေ့ ထုတ်ပြန်တဲ့ အစီရင်ခံစာထဲမှာ တော့ ၂၀၁၅ ခုနှစ်ထဲမှာ ပထမဆုံး အကြိမ် နိုင်ငံရေး ခိုလှုံခွင့်တောင်းခံ လျှောက်ထားခဲ့သူပေါင်း ၁. ၂ သန်း ကျော်နဲ့ စံချိန်တင်ခဲ့တယ်လို့ ဖေါ်ပြထားပါတယ်။ ဒါဟာ လွန်ခဲ့တဲ့ နှစ်ကထက် ၂ ဆ ဖြစ်နေတာပါ။
ဆီးရီးယားက ဒုက္ခသည် အများဆုံး လာရောက်တာဖြစ်ပြီး သူ့ လောက်မများတဲ့ ဒုတိယနိုင်ငံက အာဖဂန်နစ်စတန်နဲ့ တတိယက အီရတ်နိုင်ငံလို့ ဆိုပါတယ်။ခိုလှုံခွင့် အများဆုံး တောင်းခံတဲ့ နိုင်ငံက ဂျာမဏီဖြစ်ပြီး နောက် ဟန်ဂေရီက ဒုတိယနဲ့ ဆွီဒင်က တတိယ အများဆုံး ဖြစ်တယ်လို့ ဖေါ်ပြထားပါတယ်။
