အခု လာမယ့် တနင်္ဂနွေနေ့မှာ ကျင်းပမယ့် ဘင်္ဂလားဒေ့ရှ်နိုင်ငံရွေးကောက်ပွဲဟာ အကြမ်းဖက်မှု ကင်းစင်ပြီး စွက်ဖက်မှု မရှိတဲ့ ငြိမ်းချမ်းပြီး အားလုံးပါဝင်တဲ့ မှန်ကန်ဖြောင့်မတ်တဲ့ ရွေးကောက်ပွဲ ဖြစ်ဖို့ လိုလားကြောင်း ကုလသမဂ္ဂအတွင်းရေးမှူးချုပ် Antonio Guterres က ကြာသပတေးနေ့တုန်းက ပြောဆိုလိုက်ပါတယ်။
သီတင်းပတ်ပေါင်းများစွာ နိုင်ငံတဝှမ်းအကြမ်းဖက်မှုတွေနဲ့ ဖမ်းဆီးမှုတွေ ဖြစ်ပြီးနောက်ပိုင်း သောကြာနေ့ မှာတော့ မဲဆွယ်စည်းရုံးရေးကာလ ပြီးဆုံးသွားခဲ့ပါပြီ။ ဘင်္ဂလားဒေ့ရှ်ဝန်ကြီးချုပ် Sheikh Hasina ဦးဆောင်တဲ့ Awami League Party က တတိယမြောက်သက်တမ်း ထပ်ရဖို့ မျှော်လင့်နေပါတယ်။
အဓိက အတိုက်အခံပါတီ ဘင်္ဂလားဒေ့ရှ်အမျိုးသားပါတီ BNP ကို ဦးဆောင်တဲ့ Sheik Hasina ရဲ့ အဓိက ပြိုင်ဖက်ဖြစ်တဲ့ ဝန်ကြီးချုပ်ဟောင်း Khaleda Zia ကတော့ အကျင့်ပျက်ချစားမှုစွပ်စွဲချက်နဲ့ ထောင်ကျခံနေရ ပါတယ်။ သူဒီလို ထောင်အကျခံနေရတာက နိုင်ငံရေးပယောဂမကင်းဘူးဆိုပြီး ဝန်ကြီးချုပ်ဟောင်း Zia က ဝေဖန်ထားတာပါ။ ပြီးခဲ့တဲ့ ၂၀၁၄ ရွေးကောက်ပွဲရလာဒ်ကို BNP ပါတီက ဆန့်ကျင်ခဲ့တာပါ။
ဒီပါတီ၂ရပ်ရဲ့ မဲဆွယ်စည်းရုံးမှုတွေအတွင်း သေဆုံး ဒဏ်ရာရမှုတွေ ရှိတယ်ဆိုပြီး သတင်း မီဒီယာတွေက ပြောဆိုထားပါတယ်။ ပြီးခဲ့တဲ့လဆန်းပိုင်းကတည်းက အခုချိန်ထိ အတိုက်အခံ ခေါင်းဆောင် ၈ ထောင်ကျော် အဖမ်းခံရပြီးပြီလို့ BNP ပါတီက ပြောပါတယ်။ ဒီလိုအကြမ်းဖက်မှုတွေမှာ ပါတီ၂ ရပ်လုံးရဲ့ တာဝန်ရှိတဲ့ အကြောင်း ဘင်္ဂလားဒေ့ရှ်ဆိုင်ရာ အမေရိကန်သံအမတ်ကတော့ ပြောဆိုထားပါတယ်။
