မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ် Ms. YangHee Lee ရဲ့ မြန်မာခရီးစဉ် ပထမနေ့မှာတော့ လူ့အခွင့်အရေးနဲ့ အမျိုးသမီး အရေး လှုပ်ရှားဆောင်ရွက်သူတွေနဲ့ တွေ့ဆုံခဲ့ပြီးအမျိုးသမီးများအပေါ်အကြမ်းဖက်မှုတွေအကြောင်းတွေ့ဆုံဆွေးနွေးခဲ့ပါတယ်။ အပြည့်အစုံကိုတော့ VOA သတင်းထောက် မသိင်္ဂီလင်းက ဆက်သွယ်စုံစမ်းပေးထားပါတယ်။
လူ့အခွင့်အရေးနဲ့ပတ်သက်တဲ့ အမျိုးသမီးအရေး၊ လယ်ယာမြေအရေး၊ အလုပ်သမားအရေး၊ ကျောင်းသားအရေးစတဲ့ အကြောင်းအရာတွေကို လေ့လာဖို့ ရောက်နေတဲ့ မြန်မာနိုင်ငံဆိုင်ရာကုလသမဂ္ဂအထူးကိုယ်စားလှယ် Ms. YangHee Lee က ဒီကနေ့မှာတော့ အမျိုးသမီးအရေး ဆောင်ရွက်တဲ့ အရပ်ဘက်လူ့အဖွဲ့အစည်းတွေကို ရန်ကုန်မြို့ကုလသမဂ္ဂရုံးမှာတွေ့ဆုံခဲ့ပါတယ်။ အမျိုးသမီးတွေအပေါ် အကြမ်းဖက်မှုတွေအကြောင်း ဝင်ရောက်ဆွေးနွေးခဲ့တဲ့ ညီမျှခြင်းမြန်မာအဖွဲ့ကအမှုဆောင်ဒါရိုက်တာကိုအောင်မျိုးမင်းကဒီကနေ့ ဆွေးနွေးခဲ့တဲ့အကြောင်းတွေကို အခုလိုပြောပြပါတယ်။
“လွှတ်တော်မှာဆွေးနွေးပြီး၊ အတည်ပြုခဲ့ပြီးဖြစ်နေတဲ့ ဥပဒေကြမ်းလေးခုအကြောင်းနဲ့ပတ်သက်ပြီးတော့ ကျနော်တို့ရဲ့စိုးရိမ်မှုတွေ၊ ကျနော်တို့ နောက်ထပ် ကြုံတွေ့နေရတဲ့စိန်ခေါ်မှုတွေ- ဒါကို တင်ပြပါတယ်။ နောက်တခုကတော့ ကချင်ပြည်နယ်နဲ့ လက်နက်ကိုင် ပဋိပက္ခအတွင်းမှာရှိနေတဲ့ အမျိုးသမီးတွေ လုံခြုံမှုမရှိတာတွေ၊ နောက်ဆုံးတခုကတော့ လက်ရှိ မြန်မာပြည်မှာ အခုဆိုလို့ရှိရင် ရွေးကောက်ပွဲတွေ ကျင်းပတော့မယ်။ အမျိုးသမီးကိုယ်စားလှယ်တွေလည်း ရွေးချယ်တင်မြှောက်ပါတယ်။ အဲဒီတော့ အမျိုးသမီးအရေးကိုလုပ်တဲ့ အမျိုးသမီး ကိုယ်စားလှယ်လောင်းတွေကို ဒါတွေကတော့ အမျိုး၊ ဘာသာ၊ သာသနာ မစောင့်ရှောက်ဘူး၊ ဒီဟာတွေကတော့ မထောက်ခံခဲ့တဲ့ အတွက်ကြောင့်မို့လို့ မဲမပေးပါနဲ့-ဆိုတဲ့ လှုံ့ဆော်မှုတွေ ရှိလာပါပြီ။ အဲဒါတွေကို အသေးစိတ်စောင့်ကြည့်ဖို့ရယ်၊ သူတို့အပေါ်မှာ အကြမ်းဖက်မှုမဖြစ်ဖို့ ကုလသမဂ္ဂ အထူးစုံစမ်း စစ်ဆေးရေးအရာရှိများ မျက်စေ့ဒေါက်ထောက်ပြီးတော့ ဒါတွေကို စောင့်ကြည့်ပေးဖို့ တိုက်တွန်းခဲ့ပါတယ်။”
လူမှုဝန်ထမ်းဦးစီးဌာန၊ ကုလသမဂ္ဂဖွံ့ဖြိုးမှုအစီအစဉ်၊ ကုလသမဂ္ဂ လူဦးရေဆိုင်ရာရန်ပုံငွေအဖွဲ့နဲ့ ကျား၊ မရေးရာတန်းတူညီမျှရေးကွန်ယက် တို့ ဦးစီးပြီး ၂ နှစ်ကျော်ကြာရေးဆွဲထားတဲ့ အမျိုးသမီးများအပေါ် အကြမ်းဖက်မှုကာကွယ်ခြင်းဆိုင်ရာဥပဒေကိုလည်းအစိုးရပိုင်းက ပြင်ဆင်မှုတွေ ရှိခဲ့တဲ့အကြောင်းတင်ပြခဲ့တယ်လို့ အရပ်ဘက်လူ့အဖွဲ့အစည်းဖိုရမ်က မသိန္နီဦးကပြောပါတယ်။
“ဒီဟာတွေက ကျမတို့နိုင်ငံမှာ နိုင်ငံတော်ကနေ တာဝန်ယူထားလိုက်တဲ့ ….ဆိုတဲ့ဟာရယ်၊ ကုလသမဂ္ဂလုံခြုံရေးဆိုင်ရာ ဆုံးဖြတ်ချက်အမှတ် ၁၃၂၅ ရယ် ဆိုတာတွေကို တိုက်ရိုက်ဆန့်ကျင်နေတယ်၊ ဖောက်ဖျက်နေတယ်ဆိုတဲ့အကြောင်းတွေကိုလည်း တင်ပြခဲ့တယ်။”
တတိယအကြိမ် မြန်မာခရီးစဉ်မှာတော့ အမျိုးသမီးအရေး၊ လူ့အခွင့်အရေးလုပ်ဆောင်တဲ့ အရပ်ဖက်လူ့အဖွဲ့အစည်းတွေရဲ့ လွတ်လပ်မှုနဲ့ လုံခြုံရေးအကြောင်းလည်း Ms. Yanghee lee က အလေးပေးပြီးမေးမြန်းခဲ့တယ်လို့ ကိုအောင်မျိုးမင်းကပြောပါတယ်။
Ms. Yanhee lee ဟာ သြဂုတ်လ ၆ ရက်နဲ့ ၇ ရက်မှာတော့ နေပြည်တော်မှာလွှတ်တော်ဥပဒေကြမ်းကော်မတီဝင်၊ အစိုးရအဖွဲ့ဝင်အချို့ အပြင် ရွေးကောက်ပွဲကော်မရှင်နဲ့လည်းတေ့ွဆုံသွားဖို့ရှိပါတယ်။ သြဂုတ်လ ၇ ရက်ထိတွေ့ဆုံဆွေးနွေးမှုတွေ ပြုလုပ်သွားမယ့် အထူးကိုယ်စားလှယ် Ms. Yanghee lee အနေနဲ့ မြန်မာနိုင်ငံနဲ့ ပတ်သက်လို့ စုံစမ်းတွေ့ရှိသမျှကို့ အောက်တိုဘာလမှာကျင်းပမယ့် ကုလသမဂ္ဂ အထွေထွေ ညီလာခံမှာ အစီရင်ခံတင်ပြမှာ ဖြစ်ပါတယ်။
