ဆီးရီးယား အပေါ် စစ်ရေးအရ အရေးယူဖို့ ဆိုတဲ့ ကိစ္စကို အမေရိကန်တို့ ပစ်ပယ်မထားဘူးလို့ အမေရိကန် ကာကွယ်ရေး ဝန်ကြီး Jim Mattis က ပြောဆိုထားပါတယ်။ အမေရိကန် သမ္မတ Donald Trump က အဆင်အခြင်မဲ့ ဓာတုလက်နက်နဲ့ တိုက်ခိုက်မှုလို့ ပြောဆိုခဲ့ပြီး တန်ဖိုးကြီးကြီး ပေးဆပ်ရမယ်လို့ တွစ်တာ လူမှုကွန်ယက်မှာ ရေးသားခဲ့ပြီးနောက်မှာ ကာကွယ်ရေး ဝန်ကြီးက အခုလို ပြောဆိုလိုက်တာ ဖြစ်ပါတယ်။
ဒီကိစ္စကို ကိုင်တွယ်ဖို့ အတွက် အမေရိကန်က NATO - မြောက်အတ္တလန္တိတ် စစ်စာချုပ်အဖွဲ့၊ ကာတာ နောက် ကမ္ဘာတလွှားက မဟာမိတ်တွေနဲ့ အတူဆောင်ရွက်နေတယ်လို့ ဝန်ကြီး Mattis က သတင်းထောက်တွေကို ပြောဆိုခဲ့ပါတယ်။
ဓာတုလက်နက်အားလုံး ရှင်းလင်းပစ်ရေး လုပ်ငန်းစဉ်မှာ ရုရှားက အာမခံထားတဲ့ ကြားကဘဲ ဓာတုလက်နက်တွေ ဘာကြောင့် ဆက်ပြီး သုံးနေလဲ ဆိုတာကို အရင်ဆုံး ကြည့်ကြရမယ်လို့ အမေရိကန် ကာကွယ်ရေး ဝန်ကြီး Mattis က ပြောဆိုခဲ့ပါတယ်။ ကာတာ စော်ဘွား Sheikh Tamim bin Hamad al-Thani နဲ့လည်း အမေရိကန် စစ်ဌာနချုပ် ပင်တဂွန်မှာ တနလာၤနေ့ တွေ့ဆုံခဲ့ပါတယ်။
ဆီးရီးယား နိုင်ငံတွင်းက ဓာတုလက်နက်နဲ့ တိုက်ခိုက်မှုတွေကို အပြင်းအထန် ရှုတ်ချကြောင်း၊ ဆီးရီးယား သမ္မတ Bashar al-Assad အစိုးရ အနေနဲ့ လူ့အခွင့်အရေး ချုးဖောက်မှုတွေကို တာဝန်ခံရမယ်ဆိုတဲ့ အပေါ် အမေရိကန် သမ္မတ Donald Trump နဲ့ ပြင်သစ် သမ္မတ Emmanuel Macron တို့ သဘောတူခဲ့ကြောင်း အမေရိကန် သမ္မတ အိမ်ဖြူတော်က မနေ့ တနင်္ဂနွေနေ့ နှောင်းပိုင်းမှာ ပြောဆိုထားပါတယ်။
