ဆူဒန်နိုင်ငံမှာ စစ်တပ်က အာဏာသိမ်းခဲ့တဲ့အပေါ် ဆန္ဒပြသူတွေနဲ့ နိုင်ငံတကာအသိုင်းအဝိုင်းက သတိထားစောင့်ကြည့်နေကြပြီး နိုင်ငံမှာ ဒီမိုကရေစီ ဖော်ဆောင်ရေးဆောင်ရွက်ဖို့ လိုလားနေကြပါတယ်။
နိုင်ငံကို နှစ်ပေါင်း ၃၀ ကြာ အာဏာရှင်လို အုပ်ချုပ်ခဲ့တဲ့ သမ္မတ Omar al-Bashir ရာထူးကနေ ဆင်းသွားတာကို ပျော်ရွှင် အောင်ပွဲခံခဲ့တဲ့ ဆန္ဒပြသူတွေက စစ်တပ်အာဏာသိမ်းတဲ့အပေါ် သိပ်ပြီး အယုံအကြည်မရှိကြပါဘူး။
ဆူဒန်ပြည်သူတွေကို ကိုယ်စားပြုတဲ့ အရပ်သားအစိုးရ ဖြစ်မလာဘူးဆိုရင် ဆန္ဒပြမှုတွေ ပြန်စမှာ ဖြစ်တယ်လို့ ဆန္ဒပြသူတွေက ပြောနေကြပါတယ်။ သမ္မတ al-Bashir ရဲ့အုပ်ချုပ်မှုအတွင်း လုံခြုံရေးနဲ့ စစ်ထောက်လှမ်းရေးတွေရဲ့ လုပ်ရပ်တွေကြောင့် စစ်တပ်အာဏာသိမ်းလိုက်တဲ့အပေါ် စိုးရိမ်မှုတွေလည်း ရှိနေကြပါတယ်။
ကာကွယ်ရေးဝန်ကြီး Awad Mohamed Ahmed Ibn Auf ဦးဆောင်တဲ့ အသွင်ကူးပြောင်းရေးစစ်ကောင်စီက နိုင်ငံကို ၂ နှစ် အုပ်ချုပ်မှာ ဖြစ်ပါတယ်။ နိုင်ငံဖွဲ့စည်းပုံဥပဒေကို ယာယီပယ်ဖျက်ထားသလို လွှတ်တော်ကိုလည်း ဖျက်သိမ်းထားပါတယ်။
နိုင်ငံတော် အရေးပေါ်အခြေအနေကိုလည်း ၃ လ ထုတ်ပြန်ထားပါတယ်။ အာဏာသိမ်းခံရတဲ့ သမ္မတ al-Bashir ကို နေအိမ် အကျယ်ချုပ်ချထားတယ်လို့ စစ်တပ်အသိုင်းအဝိုင်းက VOA ကိုပြောပါတယ်။
စီးပွားရေး စီမံခန့်ခွဲမှု ညံ့ဖျင်းတာ၊ စားသောက်ကုန်ဈေးတွေ ကြီးမြင့်နေတာနဲ့ လောင်စာဆီနဲ့ နိုင်ငံခြားငွေပြတ်လပ်နေမှုတို့ကြောင့် သမ္မတ Omar al-Bashir ရာထူးကနေ ဆင်းပေးဖို့ တောင်းဆိုဆန္ဒပြမှုတွေ လွန်ခဲ့တဲ့ ၄ လထဲက စတင်ခဲ့တာ ဖြစ်ပါတယ်။ လုံခြုံရေးတွေရဲ့ နှိမ်နှင်းမှုကြောင့် ဆန္ဒပြသူ ၃၀ ထက်မနည်း သေဆုံးခဲ့ပါတယ်။
