ပြီးခဲ့တဲ့ ဇူလိုင် ၂၇ ရက်နေ့ ည က မြန်မာနိုင်ငံ အလယ်ပိုင်း ကျောက်ပန်းတောင်းမြို့မှာ ဆောက်လက်စ နေအိမ်တစ်လုံးကို အစ္စလာမ်ဘာသာဝင်တွေရဲ့ ဗလီ လို့ စွတ်စွဲပြီး လူအုပ်ကြီးက အကြမ်းဖက် မီးရှို့ဖြိုချဖို့ ကြိုးစားမှု တစ်ခု ဖြစ်ပွားခဲ့ပါတယ်။ အမုန်းတရား ပျံ့ပွားမှုတွေကြောင့် မူဆလင်တွေကို မုန်းတီးမှု ရှိနေတဲ့ မြန်မာနိုင်ငံမှာ လူအုပ်ကြီးရဲ့ အခုလို ကြိုးပမ်းမှုမျိုး အထူးအဆန်းလို့ မဆိုနိုင်ပါဘူး။ ဒါပေမယ့် ထူးဆန်းသွားတာ ကတော့ ပြည်သူလူထုရဲ့ အသက်အိုးအိမ် ကို ကာကွယ်ရမယ့်၊ တရားဥပဒေ စိုးမိုးရေး အကောင်အထည် ဖော်ရမယ့် အုပ်ချုပ်ရေးပိုင်း ဆိုင်ရာက ပုဂ္ဂိုလ်တွေ၊ ရဲတပ်ဖွဲ့ တာဝန်ရှိသူတွေ နဲ့ လွှတ်တော် အမတ်ပါ ပါဝင်ပြီး လူအုပ်ကြီးက အိမ်ကို မီးရှို့ဖျက်ဆီးမှာ စိုးရိမ်လို့ ဆိုပြီး သူတို့ကိုယ်တိုင် ဘက်ဟိုးနဲ့ ထိုးချဖျက်ဆီးလိုက်တဲ့ ကိစ္စပါ။ မြန်မာနိုင်ငံရဲ့ တရားဥပဒေ စိုးမိုးရေး ဘယ်အဆင့် ရောက်နေပြီလဲ၊ လူစုလူဝေး ဝါဒကပဲ အောင်ပွဲခံနေသလား ဆိုတာ ခုတစ်ပတ် ဆွေးနွေး တင်ပြသွားပါ့မယ်။
ဖြစ်စဉ် အကြမ်းဖျဉ်းကတော့ ခုလိုပါ။ ကျောက်ပန်းတောင်းမြို့နယ် သာယာအေး ရပ်ကွက်က ဆောက်လုပ်စ နှစ်ထပ်အိမ်ကြီးတစ်လုံးကို အဲဒါ ဗလီအဖြစ် အသုံးပြုဖို့ ဆောက်တာပါ၊ ဒါကို ဖြိုဖျက်ပေးပါ ဆိုပြီး လူစုလူဝေးနဲ့ တောင်းဆိုရာက အစ ပြုတယ်လို့ သိရပါတယ်။ လူစုလူဝေးနဲ့ အကြမ်းဖက်ဖို့ စုစည်းလာတဲ့အတွက် သက်ဆိုင်ရာ ရဲတပ်ဖွဲ့၊ အုပ်ချုပ်ရေး နဲ့ လွှတ်တော်အမတ်ပါ အဲဒီ နေရာကို ရောက်သွားတယ်လို့ ဆိုပါတယ်။ တစ်ဖက်မှာ လူအုပ်ကြီးက ဗလီလို့ စွတ်စွဲနေပေမယ့် ဗလီဖြစ်နိုင်တယ် ဆိုတဲ့ အထောက်အထား တခုတ လေတောင် ရှိတာ မဟုတ်ပါဘူး။ ပြသနာ ဖြစ်ပြီးနောက် သတင်းမီဒီယာတွေကို ပြန်ပြီး ဖြေကြားပေးတဲ့ ကျောက်ပန်းတောင်းက တိုင်းအဆင့် လွှတ်တော်အမတ် ဦးအေးခိုင်က ကျောက်ပန်းတောင်းမှာ မူဆလင် နေအိမ် တအိမ်မှ မရှိဘူး ဆိုတာ သူတို့ သိတယ်၊ အခု နေအိမ်ကို ပိုင်ဆိုင်သူဟာလည်း ဗုဒ္ဓဘာသာဝင် ဆိုတာ သူတို့ သိတယ်၊ နောက် အဲဒီနေအိမ်ဟာ ဗလီအဖြစ် အသုံးပြုဖို့ သံသယ ဖြစ်စရာ တချက်မှ မတွေ့ရဘူးလို့လည်း ဆိုပါတယ်။ ဒါဆိုရင် အဲဒီ အိမ်ကို ဘာကြောင့် ဖျက်ရတာပါလဲပေါ့။ ဦးအေးခိုင်ပြောတာကတော့ အဲဒီနေအိမ်ဟာ မြို့နယ် စည်ပင်သာယာ ခွင့်ပြုချက်နဲ့ ဆောက်တာ မဟုတ်ဘူး၊ နောက်တချက်ကတော့ လူအုပ်ကြီးကို ဒီအတိုင်း ထားလိုက်ရင် သူတို့ဖာသာသူတို့ မီးရှို့ကြ၊ ဖျက်ကြလိမ့်မယ်၊ အဲလိုဆို အခြေအနေ ပိုဆိုးသွားလိမ့်မယ်၊ ဒါကြောင့် အဲဒီ အချက်နှစ်ချက်နဲ့ သက်ဆိုင်ရာ အုပ်ချုပ်ရေး၊ ရဲ၊ လွှတ်တော် အမတ် အားလုံး တိုင်ပင်ပြီး ဖျက်မိန့်ပေး၊ အာဏာပိုင်တွေ ကိုယ်တိုင်က ဘက်ဟိုးသုံးပြီး ဖြိုချ ဖျက်ဆီးလိုက်တာလို့ ဆိုပါတယ်။
ဒီနေရာမှာ အုပ်ချုပ်ရေး၊ ရဲ နဲ့ လွှတ်တော်အမတ် အာဏာပိုင် အားလုံးရဲ့ စဉ်းစားချက် အလွန်အံ့သြဖို့ ကောင်းတာ တွေ့နိုင်ပါတယ်။ ပြသနာကို ဥပဒေအတိုင်း ဖြေရှင်းဖို့ မစဉ်းစားခဲ့သလို၊ အမှန်အတိုင်း ဖြေရှင်းဖို့လည်း ကြိုးစားတာ မတွေ့ရပါဘူး။ လူအုပ်ကြီးက မီးရှို့ဖျက်ဆီးရင် ပိုဆိုးသွားလိမ့်မယ် ဆိုတာ တခုတည်းနဲ့ လူအုပ်ကြီး ကျေနပ်အောင် အာဏာပိုင်တွေကိုယ်တိုင် ဖြိုချ ဖျက်ဆီးပေးလိုက်တာ ဖြစ်ပါတယ်။ နောက်ထပ် အရေးကြီးတာက ခုလို လူအုပ်နဲ့ အကြမ်းဖက်ဖို့ လုပ်တာကို မတားဆီးရုံမက၊ ဘယ်သူတွေက သတင်းမှားတွေဖြန့်ပြီး အကြမ်းဖက်ဖို့ လှုံ့ဆော်သလဲ ဆိုတာကိုလည်း စုံစမ်းဖော်ထုတ်ဖို့ လုပ်တာ မတွေ့ရပါဘူး။
တကယ့်တကယ် ပြန်ဆန်းစစ်ကြည့်ရင် မူဆလင် တစ်အိမ်ထောင်မှ မရှိတဲ့နေရာမှာ ဗလီဆောက်ဖို့ဆိုတာ ဘယ်လိုမှ မဖြစ်နိုင်ပါဘူး။ ဒါ့အပြင် နေအိမ်ပိုင်ရှင်ဟာ ဗုဒ္ဓဘာသာ မြန်မာ လို့ သိထားတဲ့အတွက် ဗလီဆောက်ဖို့ ဆိုတာ ပိုပြီး မဖြစ်နိုင်ပါဘူး။ ဒီ အတွက် ပြသနာကို အကြမ်းဖက်ရန် ကြံရွယ်ချက်နဲ့ မမှန်မကန် လှုံ့ဆော်မှုအဖြစ် ရဲရဲဝံ့ဝံ့ ကိုင်တွယ်ခဲ့သင့်ပါတယ်။
လက်တွေ့မှာလည်း အဲဒီ နေအိမ်ပိုင်ရှင်ဟာ ဗုဒ္ဓဘာသာ လင်မယားနှစ်ယောက်ဖြစ်ပြီး ဓာတ်ပုံ စတူရီယို တခု အတွက် အခုလို တည်ဆောက်ထားတာလို့ သိရပါတယ်။ နေအိမ်ကို ဖြိုဖျက်ဖို့ အာဏာပိုင်တွေပေးတဲ့ နောက်ထပ် အကြောင်းပြချက်တခုက စည်ပင်မှာ ခွင့်ပြုချက် တင်မထား လို့ဆိုပါတယ်။ ဒီနေရာမှာ မေးစရာ မေးခွန်းရှိလာတာက အဲဒီနေရာမှာ အဲဒီနှစ်ထပ်အိမ်ကြီး တည်ဆောက်ပြီးစီးခါနီးအထိ စည်ပင်က မသိခဲ့ဘူး ဆိုတာများလား။ အဲဒါမျိုးမဖြစ်နိုင်ဘူး ဆိုတာ အားလုံးက သိနေကြပါတယ်။
ဖြစ်နိုင်တာတွေက ခွင့်ပြုချက်နဲ့ ပတ်သက်ပြီး အိမ်ပိုင်ရှင်တွေဟာ စည်ပင်သာယာကို လာဘ်ထိုးပြီး ဆောက်နေသလား၊ နောက်ပိုင်းကျမှ စည်ပင်က သတ်မှတ်တဲ့ ဒါဏ်ငွေဆောင်ပြီး လူနေထိုင်ခွင့်ကျအောင် လုပ်မှာမျိုးလား၊ တစ်ခုခု ဖြစ်နိုင်ပါတယ်။ စည်ပင်သာယာ ဥပဒေအရ အရေးယူတယ် ဆိုရင် အရင်ကတည်းက အရေးယူဖို့ လိုပါတယ်။ အခုလို လူစုလူဝေးနဲ့ ဖျက်ဖို့ တောင်းဆိုလာရင်လည်း အာဏာပိုင်တွေဟာ ဒါကို မရရတဲ့နည်းနဲ့ တားဆီးရပါမယ်၊ နောက်ပိုင်းကျမှ တည်ဆဲ စည်ပင်သာယာ ဥပဒေအရ ပိုင်ရှင်ကို ဥပဒေအတိုင်း အရေးယူဖို့ပဲ ဖြစ်ရပါမယ်။ အခုပြသနာမှာ အာဏာပိုင်တွေဟာ တရားဥပဒေ စိုးမိုးရေးကို မျက်ကွယ်ပြုထားတာ အတော်လေး ထင်ရှားတာ တွေ့နိုင်ပါတယ်။
သိပ်မကြာသေးပါဘူး။ ပြီးခဲ့တဲ့ ဇူလိုင်လ ၄ ရက်နေ့တုန်းကပဲ ရခိုင်ပြည်နယ် စစ်တွေမြို့ ဒါးပိုင် ဒုက္ခသည် စခန်းက မူဆလင် ၇ ယောက် ရဲလုံခြုံရေး တယာက်ပါပြီး ရောင်နီဦး ဆိပ်ကမ်းကို သွားပါတယ်။ ဆိပ်ကမ်းအရောက်မှာ ဘာပြသနာမှ မဖြစ်ပါပဲနဲ့ လူအုပ်စုကြီးက ခဲတွေနဲ့ဝိုင်းထု၊ အကြမ်းဖက် ဝိုင်းတိုက်ခိုက်ကြလို့ တစ်ယောက်သေ၊ ကျန် ၆ ယောက်လုံးလည်း ဒါဏ်ရာရသွားပါတယ်။ သူတို့ စီးသွားတဲ့ ကားလည်း ပျက်စီးသွားပါတယ်။ အခုလို မင်းမဲ့တိုင်းပြည်ဆန်ဆန် လူစုလူဝေးနဲ့ အကြမ်းဖက် တိုက်ခိုက်သတ်ဖြတ်မှုကြီး ဖြစ်သွားခဲ့တာတောင် အာဏာပိုင်တွေဟာ လုံလောက်တဲ့ အရေးယူမှု လုပ်တာ မတွေ့ရပါဘူး။ လူတစ်ယောက်ကို ဖမ်းထားတယ် ဆိုတာကလွဲပြီး တခြား ဘယ်လို အရေးယူဆောင်ရွက်မှုမျိုးကိုမှ ထုတ်ပြန်တာ မတွေ့ရပါဘူး။ အလားတူ ၂၀၁၂ နောက်ပိုင်းကာလ မြန်မာနိုင်ငံတွင်း ဘာသာရေး လူမျိုးရေးဆန်တဲ့ အကြမ်းဖက်မှုတွေ ဖြစ်ပွားခဲ့စဉ် ကာလတုန်းကလည်း အခုလိုပဲ လူစုလူဝေးနဲ့ နေအိမ်တွေကို မီးရှို့ဖျက်ဆီးတာတွေ၊ လူတွေကို ဝိုင်းဝန်း သတ်ဖြတ်တာတွေ နေရာ အတော်များများမှာ ဖြစ်ပွားခဲ့ပါတယ်။ အဲဒီ ပြသနာတွေနဲ့ ပတ်သက်ရင် အာဏာပိုင်တွေအနေနဲ့ ထိထိရောက်ရောက် အရေးယူကိုင်တွယ်နိုင်တာ အလွန်ရှားပါတယ်။ ဒါကြောင့်လည်း ဒီနေ့ထက်ထိ လူစုလူဝေးနဲ့ အကြမ်းဖက်တဲ့ လုပ်ရပ် ဆက်ပြီး ရှင်သန်နေတာ ဖြစ်ပါတယ်။
ပြသနာတွေအားလုံးကို ဆန်းစစ်ကြည့်လိုက်ရင် အာဏာပိုင်တွေဟာ အကြမ်းဖက်သမားတွေကို ထိထိရောက်ရောက် အရေးယူတာ မတွေ့ကြရပါဘူး။ အလားတူ အကြမ်းဖက်ဖို့ လှုံ့ဆော်သူတွေလည်း များသောအားဖြင့် အရေးယူ မခံကြရပါဘူး။ ဒါတင်မက အမုန်းတရား ပျံ့ပွားအောင် လှုံ့ဆော်သူတွေဟာလည်း ဒီကနေ့အချိန်ထိ အရေးယူတာ မခံကြရပါဘူး။ အဲလို ပြသနာတွေကို တရားဥပဒေနဲ့အညီ ထိထိရောက်ရောက် အကောင်အထည် မဖော်နိုင်သေးသ၍ တရားဥပဒေ စိုးမိုးရေး ဆိုတာ ဖြစ်လာဦးမှာ မဟုတ်သလို နိုင်ငံတကာ အလည်မှာ မြန်မာနိုင်ငံရဲ့ ပုံရိပ်ကလည်း ဆက်ပြီး ကျဆင်းနေဦးမှာပါပဲ။ တစ်ဆက်တည်း အခုလို လူစုလူဝေးနဲ့ အကြမ်းဖက်မှု လုပ်တာမျိုးတွေလည်း ထပ်ပြီး ပေါ်ပေါက်လာဦးမှာ ဖြစ်ပါကြောင်း တင်ပြလိုက်ရပါတယ်။
