ကမ္ဘောဒီးယားနိုင်ငံမှာ ကျင်းပနေတဲ့ ၃၂ ကြိမ်မြောက် အရှေ့တောင်အာရှ ဆီးဂိမ်းပြိုင်ပွဲမှာတော့ မြန်မာနိုင်ငံက ဒီနေ့မှာ ရွှေတံဆိပ် ၂ ခု နဲ့ ငွေတံဆိပ် ၂ ခု ထပ်ရခဲ့ပါတယ်။ အမျိုးသမီး အလေးမ ၄၅ ကီလိုတန်မှာတော့ မြန်မာနိုင်ငံက မဇင်မေဦးက အနိုင်ရပြီးတော့ ပထမ ရွှေတံဆိပ် ရရှိခဲ့ပါတယ်။ အဲဒီပြိုင်ပွဲမှာ ဖိလစ်ပိုင်က Angeline Colonia က ဒုတိယ၊ လာအိုက Bouakham Phongsakone က တတိယရရပါတယ်။
ဒါ့အပြင် ရိုးရာလှေလှော်ပြိုင်ပွဲ အမျိုးသား ၅ ယောက်တွဲ မှာတော့ မြန်မာနိုင်ငံ ပထမ ရပြီးတော့၊ ရွှေတံဆိပ် နောက်တခု ထပ်ရပြီး၊ အမျိုးသားအသင်းလိုက် ၁၂ ယောက်တွဲ ရိုးရာလှေပြိုင်ပွဲမှာတော့ မြန်မာနိုင်ငံက ငွေတံဆိပ်တခုထပ်ရခဲ့ပါတယ်။
ပိုက်ကျော်ခြင်းပြိုင်ပွဲမှာတော့ အမျိုးသား ၂ ယောက်တွဲ အသင်းလိုက်ပြိုင်ပွဲမှာ မြန်မာအသင်းဟာ ဖိုင်နယ်မှာ အင်ဒိုနီးရှားကို ရှုံးပြီး ဒုတိယ ငွေတံဆိပ် ရရှိခဲ့ပါတယ်။
မြန်မာအသင်းဟာ အခုအချိန်အထိတော့ ဆီးဂိမ်းပြိုင်ပွဲမှာတော့ ရွှေ ၁၇ ခု၊ ငွေ၊ ၁၆ ခု၊ ကြေး ၄၇ ခု ရရှိထားပြီး အဆင့် ၈ နေရာမှာ ရှိနေပါတယ်။ အခုလောလောဆယ်အထိတော့ ဗီယက်နမ်နိုင်ငံ ရွှေ ၈၅ ခု နဲ့ ပထမ၊ ထိုင်းနိုင်ငံက ရွှေ ၇၈ ခု နဲ့ ဒုတိယ၊ အိမ်ရှင်ကမ္ဘောဒီးယားက ရွှေ ၅၉ ခု နဲ့ တတိယနေရာမှာ ရှိနေပါတယ်။
