အဖမ်းဆီးခံ Reuters သတင်းထောက် ၂ ဦးဖြစ်တဲ့ ကိုဝလုံးနဲ့ ကိုကျော်စိုးဦးတို့ရဲ့ အမှုကို ဇွန်လ ၁၈ ရက် တနင်္လာနေ့ ၂၇ ကြိမ်မြောက် ရုံးချိန်းမှာ တရားလိုဘက်က နောက်ဆုံး သက်သေကိုစစ်ဆေးခဲ့တာဖြစ်ပြီး လာမယ့် ဇူလိုင်လ ၂ ရက် မှာတော့ ၂ ဖက် ရှေ့နေတွေက စွဲချက် တင်သင့် မတင်သင့် လျှောက်လဲချက်ပေးပြီး တရားရုံးက ဆုံးဖြတ်ချက်ချတော့မှာ ဖြစ်ပါတယ်။
တနင်္လာနေ့ရုံးချိန်းမှာ လာရောက်အစစ်ခံတဲ့ တရားလိုပြသက်သေဟာ ရဲစည်းကမ်းချိုးဖေါက်မှုနဲ့ အရေးယူခံနေရသူတွေရဲ့ ထွက်ဆိုချက်တွေကို ရယူထားသူမို့ သူဟာ ယုံကြည်ရတဲ့ သက်သေမဟုတ်ဖူးလို့ သတင်းထောက် ၂ ဦးရဲ့ ရှေ့နေကပြောပါတယ်။အပြည့်အစုံကို ဒေါ်ခင်မျိုးသက်က ပြောပြပေးမှာပါ။
နိုင်ငံတော်အစိုးရ လျှို့ဝှက်ချက်အက်ဥပဒေ အမှတ် ၃ နဲ့ ပြီးခဲ့တဲ့ ဒီဇင်ဘာလက အဖမ်းခံခဲ့ရပြီး နောက် စွဲချက်တင်တာ ခံနေရတဲ့ Reuters သတင်းထောက် ကိုဝလုံးနဲ့ ကိုကျော်စိုးဦးတို့ ကို တနင်္လာနေ့မှာ ရန်ကုန်မြောက်ပိုင်းခရိုင် တရားရုံးမှာ ရုံးထုတ်ခဲ့ပြီး တရားလိုပြသက်သေ တွေထဲက နောက်ဆုံး တယောက်ဖြစ်တဲ့ မှုခင်းတပ်ဖွဲ့ (CID) ရဲမှုး တင်ဝင်းမောင်ကို စစ်ဆေးခဲ့တာ ဖြစ်ပါတယ်။
ရဲမှူးတင်မောင်ဝင်းဟာ Reuters သတင်းထောက် ၂ ဦးကို စစ်ဆေးရာမှာ ရဲဘက်က ပါဝင်နေသူတဦး ဖြစ်ပါတယ်။ တနင်္လာနေ့ တရားရုံးမှာ စစ်မေးစဉ်အတွင်း သူက တခြားသက်သေအားလုံးရဲ့ ထွက်ဆိုချက်တွေကို မိတ္တူကူးခဲ့ကြောင်းနဲ့ ဒီလိုကူးယူတာဟာ စစ်ဆေးရေး အရာရှိတဦး အနေနဲ့ အမှုအကြောင်းကို ပိုသိချင်တာကြောင့်လို့ ဖြေကြားခဲ့တာပါ။ ရဲမှုးတယောက်ရဲ့ အခုလို လုပ်ဆောင်မှုဟာ ရဲတွေ လိုက်နာဖို့ သတ်မှတ်ထားတဲ့ မြန်မာနိုင်ငံ ရဲလက်စွဲ ပါ အချက်တွေကို ချိုးဖေါက်တာဖြစ်တဲ့အတွက် ဒီသက်သေဟာ ယုံကြည်ရတဲ့ သက်သေ မဟုတ်ဖူးလို့ သတင်းထောက် ၂ ဦးရဲ့ ရှေ့နေ ဦးခင်မောင်ဇော်က ပြောပါတယ်။
ဒီနှစ် ဇန်နဝါရီလကတည်းက စစ်ဆေးခဲ့တဲ့ ဒီအမှုဟာ ၆ လ ကျော် လာခဲ့ပေမယ့် အခုထိ တရားလိုဘက်က သက်သေ ကောင်းကောင်း မပြနိုင်ခဲ့ဘူးလို့ ကိုဝလုံးက တနင်္လာနေ့ ရုံးချိန်းအပြီး သတင်းထောက်တွေကို ပြောပါတယ်။
"ဒီနေ့အထိအောင် သက်သေတွေနဲ့ ပတ်သက်ပြီးတော့ ဒီနေ့ အမှုစစ်ထွက်ဆိုသွားတဲ့ အထဲမှာလည်း ကျနေ်ာတို့ဒီ စာရွက်စာတန်းတွေ နဲ့ ပတ်သက်ပြီးတော့ ဘယ်လိုရရှိခဲ့တယ်ဆိုတာနဲ့ ပတ်သက်ပြီးတော့ သူတို့ သက်သေပြနိုင်ခြင်းမရှိပါဘူး။ ကျနော်တို့လက်ထဲကို ဘယ်လိုရောက်ရှိခဲ့တယ် ဆိုတာလည်း သူတို့ သက်သေမပြနိုင်ခဲ့ဘူး။"
သတင်းထောက် ၂ ဦး အဖမ်းခံရပြီး အောင်သပြေစစ်ကြောရေးစခန်းမှာ ၂ ပတ် အစစ်ဆေးခံခဲ့ရသလို သူတို့ရဲ့ လုပ်ရပ်တွေနဲ့ ပတ်သက်ပြီး နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အမှန်အတိုင်း သိစေချင်တယ်လို့လည်း ကိုဝလုံးက ပြောပါတယ်။
"ကျနော်တို့ကို အောင်သပြေစခန်းကို ထိန်းသိမ်းထားသလဲဆိုတာကို သိစေချင်တယ် ။ စစ်ကြောရေးမလုပ်ခဲ့ဘူးလို့ ပြောခဲ့တယ် ဒါကတော့ အမှန်ဆိုရင် ကျနော်တို့ကိုယ်တိုင် ၂ ပတ်တိတိ ဒီစစ်ကြောရေးစခန်းမှာ မေးခွန်းတွေအများကြီးအမေးခံခဲ့ရတယ်။ ရခိုင်ပြည်နယ် အရေးကိစ္စတွေနဲ့ ပတ်သက်ပြီးတော့ သူတို့ကို စစ်ကြောရေးစခန်းမှာ ပြောဆိုခဲ့တာတွေရှိတယ်။ ဒါတွေနဲ့ ပတ်သက်ပြီးတော့ ကျနော်တို့ကတော့ နိုင်ငံတော် အစိုးရကို အထူးသဖြင့် နိုင်ငံတော် အတိုင်ပင်ခံပုဂ္ဂိုလ် ကို သိစေချင်ပါတယ်။"
ရခိုင်ပြည်နယ် မောင်တောမြို့နယ် အင်းဒင်ကျေးရွာနားက လူသတ်မှုကို ဖေါ်ထုတ်ဖို့ ကြိုးစားခဲ့တဲ့ Reuters သတင်းထောက် ၂ ဦးဖြစ်တဲ့ အသက် ၃၂ နှစ်အရွယ် ကိုဝလုံးနဲ့ အသက် ၂၈ နှစ်အရွယ် ကိုကျော်စိုးဦးတို့ဟာ မနှစ်က ဒီဇင်ဘာလ ၁၂ ရက်ညပိုင်းမှာ ရခိုင်အရေး စာရွက်စာတမ်းတွေ လက်ဝယ်တွေ့ရှိမှုနဲ့ နိုင်ငံတော်လျှို့ဝှက်ချက် အက်ဥပဒေအရ ဖမ်းဆီးတရားစွဲဆိုတာ ခံနေရတာပါ။
ပြီးခဲ့တဲ့ လတုန်းကတော့ ဒီအမှုနဲ့ ပတ်သက်ပြီး ဒုရဲမှူး မိုရန်နိုင်က ကိုဝလုံးနဲ့ တွေ့ဆုံဖို့ အထက်အရာရှိ နိုင်လင်းက အမိန့်ပေးခဲ့ပြီး သတင်းထောက်တွေကို ထောင်ချောက်ဆင် ဖမ်းဖို့ လုပ်ခဲ့တာ ဖြစ်ကြောင်း ထွက်ဆိုခဲ့တာပါ။ ဒါကို ရဲအရာရှိနိုင်လင်းက မဟုတ်မှန်ကြောင်း ငြင်းဆိုခဲ့တဲ့အတွက် ဒုရဲမှူး မိုးရန်နိုင်ဟာ တရားရုံး ထွက်ဆိုအပြီးမှာပဲ ရဲစည်းကမ်းချိုးဖေါက်မှုနဲ့ ထောင်ဒဏ်တနှစ် ကျခံခဲ့ရပါတယ်။
အမှုမှာ တရားလိုပြသက်သေ ၂၅ ဦးရှိတဲ့ထဲက ဒုရဲမှုး မိုးရန်နိုင်ပြီးရင် နောက် ထွက်ဆိုရမယ့် တပ်ကြပ်ကြီး ခင်မောင်လင်း လာရောက် ထွက်ဆိုမှာကို အများက စောင့်မျှော်နေကြတာပါ။ ဒါပေမယ့် သူ့ကို ရဲတပ်ဖွဲ့ကနေ အပြီးအပိုင် ထုတ်လိုက်တယ်လို့ ရဲတပ်ဖွဲ့ရဲမှူးချုပ်က သတင်းစာရှင်းလင်းပွဲမှာ ပြောခဲ့ပါတယ်။ သက်သေထွက်ဖို့ မလာရောက်ခဲ့တဲ့ ဒုတပ်ကြပ် ခင်မောင်လင်းကို တရားလိုဘက်က သူတို့ရဲ့ သက်သေအဖြစ်ကနေ ဖယ်ရှားခဲ့တယ်လို့ သတင်းထောက် ၂ ဦးရဲ့ ရှေ့နေ ဦးသန်းဇော်အောင်က ပြောပါတယ်။
တရားလိုပြသက်သေ ၂၅ ဦးထဲက တပ်ကြပ်ကြီးခင်မောင်လင်းအပါအဝင် ၃ ဦးကို ဖယ်ရှားခဲ့တဲ့အတွက် ကျန်သက်သေ ၂၂ ဦးထဲမှာ တနင်္လာနေ့ ထွက်ဆိုတဲ့ ရဲမှူးတင်ဝင်းမောင်ဟာ နောက်ဆုံးသက်သေဖြစ်ပါတယ်။ သက်သေအားလုံးရဲ့ ထွက်ဆိုချက်တွေရပြီမို့ လာမယ့် ဇူလိုင်လ ၂ ရက်နေ့မှာတော့ အမှုကို စွဲချက် တင်သင့် မတင်သင့် ၂ ဖက် ရှေ့နေတွေလျှောက်လဲချက်ပေးပြီးရင် တရားရုံးတရားသူကြီးက ဆုံးဖြတ်ချက် ချတော့မှာ ဖြစ်ပါတယ်။
Reuters သတင်းထောက် ၂ ယောက်ဖြစ်တဲ့ကိုဝလုံးနဲ့ ကိုကျော်စိုးဦးတို့ကို ဇွန်လ ၁၈ ရက်နေ့မှာ One World Media အဖွဲ့က ၂၀၁၈ အတွက် နိုင်ငံတကာ သတင်းသမားဆု ချီးမြှင့်လိုက်သလို Society of Publishers in Asia –SOPA အဖွဲ့ကလည်း လူထုဝန်ဆောင်မှု သတင်းသမားဆု ကို ချီးမြှင့်ခဲ့ပါတယ်။
