နယူးယောက်မြို့မှာ ကျင်းပနေတဲ့ U.S. OPEN တင်းနစ်ပြိုင်ပွဲမှာတော့ စပိန်က Rafael Nadal နဲ့ ရုရှားက Daniil Medvedev တို့ အနိုင်ရပြီး ဖိုင်နယ်တက်သွားပါတယ်။
အမျိုးသား တဦးချင်း ဆီမီးဖိုင်နယ်ပွဲတွေကို သောကြာနေ့ ကစားကြတာမှာ ပထမပွဲမှာတော့ ရုရှားနိုင်ငံက အဆင့် ၅ Daniil Medvedev က ဘူလ်ဂေးရီးယားက Grigor Dimitrov ကို ၇-၆၊ ၆-၄၊ ၆-၃ နဲ့ ၃ ပွဲပြတ် နိုင်သွားပါတယ်။ ဒုတိယ ဆီမီးဖိုင်နယ်မှာတော့ Nadal က အီတလီနိုင်ငံသား Matteo Berrettini ကို ၇-၆၊ ၆-၄၊ ၆-၁ နဲ့ ၃ ပွဲပြတ်နိုင်ပြီး ဖိုင်နယ်တက်သွားပါတယ်။
အမျိုးသားတဦးချင်း ဖိုင်နယ်ကိုတော့ တနင်္ဂနွေနေ့မှာ ကစားကြမှာဖြစ်ပြီး Rafael Nadal နဲ့ Daniil Medvedev တို့ ဗိုလ်လုကြမှာပါ။ Nadal ဟာ U.S. OPEN ကို ၂၀၁၀၊ ၂၀၁၃ နဲ့ ၂၀၁၇ ခုနှစ်တွေမှာ ၃ ကြိမ် ဗိုလ်စွဲထားပြီး ဂရန်းစလမ်းဖလား စုစုပေါင်း ၁၈ ကြိမ်နဲ့ အမျိုးသားဘက်မှာ ဒုတိယအများဆုံး ရထားပါတယ်။ တကယ်လို့သာ ဒီတကြိမ် အနိုင်ရခဲ့မယ်ဆိုရင်တော့ သူဟာ ၁၉ ကြိမ်မြောက် ဗိုလ်စွဲပြီး ရော်ဂျာဖယ်ဒရာရဲ့ စံချိန်ကိုမီဖို့ ၁ ကြိမ်ပဲ လိုတော့မှာဖြစ်ပါတယ်။
Nadal နဲ့ Medvedev တို့ ၂ ယောက်ဟာ ဒီနှစ်မှာတော့ Montreal မြို့မှာ ကျင်းပတဲ့ Rogers Cup မှာ တကြိမ်ဆုံခဲ့ပြီး အဲဒီတုန်းက Nadal က နိုင်ထားပါတယ်။
အမျိုးသမီး တဦးချင်း ဖိုင်နယ်ကိုတော့ ဒီကနေ့ စနေနေ့မှာ ကစားမှာဖြစ်ပြီး အမေရိကန်က နာမည်ကြီး ဆရီနာဝီလီယံနဲ့ ကနေဒါနိုင်ငံက အသက် ၁၉ နှစ်အရွယ် Bianca Andreescu တို့ ကစားကြမှာဖြစ်ပါတယ်။
