ဒီမိုကရေစီ စံနှုန်းတွေနဲ့ ကိုက်ညီပြီး၊ ပြည်သူလူထု ဆန္ဒနဲ့ သင့်တော်မယ့် ဖွဲ့စည်းပုံ အခြေခံဥပဒေ ပေါ်ပေါက်ရေး ဦးစားပေးဆောင်ရွက်သွားမယ်လို့ နှစ် ၅၀ ကျော်အတွင်း ပထမဆုံး အရပ်သားသမ္မတအဖြစ် ဒီကနေ့ ကျမ်းသစ္စာကျိန်ဆိုလိုက်တဲ့ သမ္မတဦးထင်ကျော်က ပြောဆိုလိုက်ပါတယ်။ ဒါ့အပြင် ငြိမ်းချမ်းရေး၊ အမျိုးသားပြန်လည်ရင်ကြားစေ့ရေးနဲ့ နိုင်ငံဖွံ့ဖြိုးတိုးတက်ရေးအတွက် ကြိုးပမ်းသွားမယ်လို့လည်း သမ္မတဦးထင်ကျော်က သူ့ရဲ့ မိန့်ခွန်းမှာ ပြောဆိုလိုက်တာပါ။ ပြည်ထောင်စုလွှတ်တော်မှာ ကျင်းပတဲ့ သမ္မတကျမ်းသစ္စာကျိန်ဆိုပွဲအခမ်းအနားကို ကိုယ်တိုင်သတင်းသွားယူခဲ့တဲ့ VOA ရန်ကုန်ရုံးတာဝန်ခံ ဒေါ်ခင်စိုးဝင်းက နေပြည်တော်ကနေ သတင်းပေးပို့ထားပါတယ်။
ဒီကနေ့ ကျင်းပတဲ့ သမ္မတ ကျမ်းသစ္စာကျိန်ဆိုပွဲမှာ ပြည်တောင်စုလွှတ်တော် နာယကရှေ့မှောက် ကျမ်းသစ္စာကျိန်ဆိုအပြီး သမ္မတဦးထင်ကျော်က ၃ မိနစ်သာ ကြာတဲ့ မိန့်ခွန်းကို အခုလိုပြောဆိုလိုက်ပါတယ်။
“ဒီနေ့ ဒီအချိန်မှာ လေးနက်စွာတင်ပြလိုတဲ့ အချက်တခုရှိပါတယ်။ ဒီအချက်ကတော့ မကြာမီကပဲ ကျနော်ဟာ နိုင်ငံတော်သမ္မအဖြစ် ကတိသစ္စာပြုခဲ့ပြီးဖြစ်ပါတယ်။ အဲဒီကတိသစ္စာကို ထိန်းသိမ်းစာင့်ရှောက်ရမယ့် တာဝန်ရှိကြောင်းကိုလည်း အစဉ်သတိချပ်နေမှာဖြစ်ပါတယ်။ ဒါ့အပြင် နိုင်ငံတော်နဲ့ သင့်တော်မယ့် ဒီမိုကရေစီစံချိန်စံညွန်းများနဲ့ကိုက်ညီတဲ့ ဖွဲ့စည်းပုံအခြေခံ ဥပဒေတရပ် ဖြစ်ပေါ်လာရေးအတွက်လည်း ဆောင်ရွက်ရမယ့် တာဝန်ရှိပါတယ်။ နှစ်ရှည်လများ ပြည်သူလူထုလိုလား တောင်းတနေတဲ့ ဒီနိုင်ငံရေးရည်မှန်းချက် အကောင်အထည် ပေါ်လာရေးအတွက် စိတ်ရှည်သီးခံပြီး ဆောင်ရွက်သွားရမယ် ဆိုတာကိုလည်း သိနားလည်ထားပါတယ်။
နိဂုံးချုပ်အားဖြင့် တင်ပြချင်တာကတော့ ယခု ပေါ်ပေါက်လာတဲ့ ပြည်ထောင်စု အစိုးရအဖွဲ့ဟာ ပြည်သူလူထုရဲ့ မျှော်လင့်ချက်များ၊ ဆန္ဒများ ပြည့်ဝစေရန် မမှိတ်မသုန် ကြိုးပမ်းဆောင်ရွက် သွားမှာဖြစ်ကြောင်း အလေးအနက် ပြောကြားလိုခြင်းဖြစ်ပါတယ်။
နိုင်ငံသူနိုင်ငံသားအားလုံး ချမ်းမြေ့သာယာစွာနဲ့ မိမိတို့ ဘဝလမ်းကြောင်းကို ဖြောင့်တန်းစွာ လျှောက်လမ်းနိုင်ကြပါစေ။”
လိုရင်းတိုရှင်းနဲ့ နိုဘယ်လ်ငြိမ်းချမ်းရေးဆုရှင် ပဲ့ကိုင်သူ ဒေါ်အောင်ဆန်းစုကြည်ရဲ့ လမ်းညွှန်မှုနဲ့ ရှေ့ဆက်လုပ်ဆောင်မယ့် လုပ်ငန်းစဉ်ကို အကြမ်းဖျဉ်းချ့ပြသွားတာဖြစ်ပါတယ်။
သမ္မတ၊ ဒုသမ္မတ ၂ ဦးအပြင် ဒေါ်အောင်ဆန်းစုကြည် အပါအဝင် ပြည်တောင်စုဝန်ကြီး ၁၈ ဦး။ ဖွဲ့စည်းပုံအခြေခံဥပဒေဆိုင်ရာခုံံရုံး ဥက္ကဋ္ဌနဲ့ အဖွဲ့ဝင်များ၊ ပြည်ထောင်စုရွေးကောက်ပွဲကော်မရှင် ဥက္ကဋ္ဌနဲ့ အဖွဲ့ဝင်တွေလည်း ဒီကနေ့ ပြည်ထောင်စုလွှတ်တော်မှာ ကတိသစ္စာပြု ကျမ်းကျိန်ခဲ့ကြပါတယ်။
ဒီကနေ့ ကျင်းပတဲ့ အခမ်းအနားကို တက်ရောက်လာသူ မြန်မာနိုင်ငံဆိုင်ရာ EU ဥရောပသမ္မဂ္ဂ သံအမတ်ကြီး Roland Kobia က မြန်မာပြည်သူတွေရဲ့ အောင်ပွဲအဖြစ် ဂုဏ်ယူဝမ်းမြောက်ကြောင်းပြောပါတယ်။
“ဒီကနေ့ပြည်ထောင်စုလွှတ်တော်ကိုရောက်နေတဲ့ ကြသူတွေအားလုံး နဲ့ ပြည်သူတွေ အားလုံးက ပျော်ရွင်နေကြမယ်လို့ ကျနော်ထင်ပါတယ်။ ဒီကနေ့ ကျမ်းသစ္စာကျိန်ဆိုတဲ့ သမ္မတသစ်နဲ့ သူ့ရဲ့အစိုးရအဖွဲ့က မြန်မာနိုင်ငံရဲ့ ဒီမိုကရေစီလမ်းကြောင်း ဖြောင့်ဖြူးအောင်လို့ လုပ်နိုင်လိမ့်မယ်လို့ ကျနော်တို့ ယုံကြည်ပါတယ်။ တခြားတည်ဆောင်စဲ နိုင်ငံတွေမှာ ကြုံရသလိုပဲ တခါတလေမှာတော့ မြန်မာနိုင်ငံမှာလည်း စိန်ခေါ်အကဲစမ်းမှုတွေနဲ့လည်း ကြုံတွေ့နိုင်ပါတယ်။”
သမ္မတဦးထင်ကျော်ရဲ့ အကိုကြီး ဦးဉာဏ်စိုးကလည်း သမ္မတဦးထင်ကျော်ပြောဆိုတဲ့ မိန့်ခွန်းအပေါ် မြန်မာပြည်သူလူထုက ထောက်ခံ ကြိုဆိုကြလိမ့်မယ်လို့ မျှော်လင့်ကြောင်းပြောပါတယ်။
“ဒီနေ့ ဦးထင်ကျော်ပြောတဲ့ မိန့်ခွန်းကိုလည်း ကျနော်တို့ ဒီထဲမှာလာပြီးတော့ လွှတ်တော်ထဲမှာ နေတဲ့လူတွေရော ၊ အပြင်က ပြည်ထောင်စုသားတွေအားလုံး ဝမ်းသာကြတဲ့ သဘောရှိပါတယ်။ လက်ခုပ်တွေလည်း တခန်းလုံး ကိုဆူညံသွားတာပဲ။ ကျနော့်အနေနဲ့လည်း တိုင်းသူပြည်သားတွေအပေါ်မှာ ဦးထင်ကျော်တို့အဖွဲ့က ဘယ်လိုသဘောထားလဲ၊ ဘာတွေဆောင်ရွက်မလဲဆိုတာ ပြောတာကို ကြားလိုက်ရတဲ့အတွက်ကြောင့် ကျနော့်အနေနဲ့ အထူးဝမ်းမြှောက်ကြောင်းပြောလိုပါတယ်။”
ဒီကနေ့ ကျင်းပတဲ့ သမ္မတကျမ်းသစ္စာကျိန်ဆိုပွဲ ချောချောမွေ့မွေ့ အထမြောက်ရေး စီစဉ်ညွှန်ကြားပေးခဲ့တဲ့ ပြည်ထောင်စူလွှတ်တော် ညွှန်ကြားရေးမှူးချုပ် ဦးကျော်စိုးကတော့ သမ္မတသစ်ဦးထင်ကျော်ရဲ့ လိုရင်းတိုရှင်းမိန့်ခွန်းအပေါ် အခုလို သုံးသပ်လိုက်ပါတယ်။
“လိုအပ်ချက်မရှိအောင်တော့ တက်နိုင်သလောက်ကြိုးစားဆောင်ရွက်ခဲ့ပါတယ်။ ဒီနေ့သမ္မတကြီးပြောကြားသွားတဲ့ မိန့်ခွန်းအနေနဲ့ကတော့ လိုအပ်တဲ့ အဓိက အနှစ်ချုပ်ကိုပဲ အဓိက ပြောကြားသွားတယ်လို့ ကျနော့အနေနဲ့ ယူဆပါတယ်။”
သမ္မတ ကျမ်းသစ္စာကျိန်ဆိုပွဲအပြီးမှာတော့ သမ္မတဦးသိန်းစိန်က သမ္မတအိမ်တော်မှာ သမ္မတဦးထင်ကျော်ကို အဆောင်အယောင်တွေနဲ့အတူ တာဝန်လွှဲပြောင်းပေးအပ်ခဲ့ပါတယ်။
ဧပြီလ ၁ ရက်နေ့မှာ စတင်တာဝန်ယူတော့မယ့်အစိုးရသစ်အနေနဲ့ ပြည်သူလူထုရဲ့ မျှော်မှန်းချက် ကြီးကြီးမားမားတွေကို ဖြည့်ဆည်းပေးနိုင်ဖို့ကတော့ စိန်ခေါ်အကဲစမ်းမှုတွေနဲ့ ရင်ဆိုင်ရဦးမှာဖြစ်ပါတယ်။
