အမေရိကန်သမ္မတ ရွေးကောက်ပွဲမှာ ရီပတ်ဘလစ်ကန် ပါတီ ကိုယ်စားပြုပြီး ဝင်ပြိုင်ခွင့်ရဖို့ ရှေ့ဆုံးက ပြေးနေတဲ့ Donald Trump ဟာ ခရစ်ယာန်ဘာသာဝင် မဟုတ်ဘူးလို့ ပုပ်ရဟန်းမင်းကြီး Francis က ကြာသပတေးနေ့ က ပြောလိုက်ပါတယ်။
Donald Trump ဟာ အမေရိကန်တောင်ပိုင်းနဲ့ မက္ကဆီကို နိုင်ငံကို ပိုင်းခြားထားတဲ့ တံတိုင်းတစ်ခု တည်ဆောက်ပြီး၊ အမေရိကန်နိုင်ငံထဲ ခိုးဝင်မယ့် သူတွေကို တားဆီးဖို့ အဆိုပြုခဲ့တဲ့အတွက် ပုပ်ရဟန်းမင်း Francis က ခုလို ပြောခဲ့တာဖြစ်ပါတယ်။
”လူတစ်ဦးဟာ ဘယ်နေရာမှာပဲ ဖြစ်ဖြစ်၊ တံတားထိုးဖို့ မစဉ်းစားပဲ၊ အုတ်တံတိုင်းဆောက်ဖို့ပဲ စဉ်းစားနေမယ်ဆိုရင် ဒီလူဟာ ခရစ်ယာန် ဘာသာဝင် မဟုတ်ဘူး။ ဒါဟာ တရားတော်နဲ့ မညီပါဘူး” လို့ ပုပ်ရဟန်းမင်း Francis က ပြောခဲ့တာပါ။
ပုပ်ရဟန်းမင်းဟာ ဒီအပတ်မှာ မက္ကဆီကို နိုင်ငံကို သွားရောက်လည်ပတ်တဲ့ ခရီးစဉ်ကနေ ရောမမြို့ကို အပြန်မှာ ဒီလိုမျိုး မှတ်ချက်ပြု ပြောကြားခဲ့တာပါ။
ဗုဒ္ဓဟူးနေ့က ပုပ်ရဟန်းမင်းဟာ မက္ကဆီကိုမှာ ရှိနေစဉ်အတွင်း အမေရိကန်နိုင်ငံကို ခိုးဝင်သူတွေ အများဆုံး သွားရောက်လေ့ရှိတဲ့ တက္ကဆပ် ပြည်နယ် နယ်စပ်ကနေ မီတာ အနည်းငယ်ပဲ ကွာဝေးတဲ့ ရင်ပြင်တစ်ခုမှာ ဝတ်ပြုဆုတောင်းပွဲ ကျင်းပခဲ့ပါသေးတယ်။
