ပြီးခဲ့တဲ့နှစ်က ပြင်သစ်မှာ Bastille Day ပြင်သစ်အမျိုးသားနေ့ အခမ်းအနားကို ရှုစားခဲ့ပြီးတဲ့နောက် အဲဒီအခမ်းအနားထက် ပိုပြီးကြီးကျယ်တဲ့ စစ်ရေးပြ အခမ်းအနားကို ဝါရှင်တန်မှာ ကျင်းပလိုတဲ့အတွက် အမေရိကန်ရဲ့ စစ်အင်အားကြီးမားမှုပြသရေး အစီအစဉ်တွေ လုပ်ဖို့ ပင်တာဂွန် ကာကွယ်ရေးဌာန အကြီးအကဲတွေကို သမ္မတ Donald Trump က အမိန့်ပေးလိုက်ပါတယ်။
ကာကွယ်ရေးဝန်ကြီး Jim Mattis က စစ်ရေးပြ အခမ်းအနားနဲ့ ပတ်သက်ပြီး စီစဉ်တချို့ကို လုပ်ဆောင်ဖို့ စစ်အရာရှိတွေကို ညွှန်ကြားထားပြီး နောက်ဆုံး ရွေးချယ် ဆုံးဖြတ်ချက် ချဖို့အတွက် သမ္မတကို တင်ပြမှာ ဖြစ်ကြောင်း ဗုဒ္ဓဟူးနေ့ သတင်းစာ ရှင်လင်းပွဲမှာ ပြောကြား ခဲ့ပါတယ်။
သမ္မတရဲ့ စစ်တပ်အပေါ် ချစ်ခင်မှုနဲ့ လေးစားမှုကို သူ့အနေနဲ့ ကောင်းကောင်း သဘောပေါက်ကြောင်း ဝန်ကြီး Mattis က အိမ်ဖြူတော်မှာ သတင်းထောက်တွေကို ပြောပါတယ်။
အခမ်းအနား ကျင်းပနိုင်ချေရှိတဲ့ နေရက် ၃ ခုကတော့ မေလ ၂၈ ရက်နေ့ ကျရောက်တဲ့ Memorial day ခေါ် စစ်အတွင်း ကျဆုံးသူတွေကို ဂုဏ်ပြုတဲ့နေ့၊ ဇူလိုင်လ ၄ ရက်မှာကျရောက်တဲ့ လွတ်လပ်ရေးနေ့ ဒါမှမဟုတ် နိုဝင်ဘာ ၁၁ ရက်နေ့မှာကျရောက်တဲ့ စစ်ပြန်များနေ့တို့ဖြစ်ပါတယ်။
သမ္မတ Trump အနေနဲ့ အရင်နှစ်တုန်းက ပါရီမြိုတော်မှာ တွေ့မြင်ခဲ့ရတဲ့ ဇူလိုင် ၁၄ ရက် ပြင်သစ်အမျိုးသားနေ့ လိုပုံစံမျိုး အမေရိကန်မှာ ကျင်းပလိုကြောင်း မကြာခဏပြောကြားခဲ့သလို သူ့အနေနဲ့ ဒီအခမ်းအနားထက် ပိုပြီးကြီးကျယ်တဲ့အခမ်းအနားမျိုး ကျင်းပချင်ကြောင်း ပြင်သစ်သမ္မတ Emmaunuel Macron ကို ပြောကြားခဲ့တာပါ။
