အမေရိကန် သမိုင်းမှာ အဆိုးဝါးဆုံး သေနတ်ပြစ်ခတ်မှုကို ကျူးလွန်ခဲ့တဲ့ သေနတ်သမား Omar Mateen ဟာ လူပေါင်း ၄၉ဦးကို ပစ်သတ်နေတဲ့ အချိန်အတွင်းမှာပဲ၊ 911 အရေးပေါ် ဖုန်းလိုင်းကို ခေါ်ဆိုပြီး၊ အစပိုင်းမှာ အာရပ်ဘာသာစကားနဲ့ ပြောဆိုပြီး၊ သူ့ကိုယ်သူ အစ္စလာမ်မစ် စစ်သည်တော် တစ်ဦးဖြစ်တယ်လို့ ပြောခဲ့တယ်လို့ အမေရိကန် ဗဟို အစိုးရ ထောက်လှမ်းရေး ဗျူရို FBI အဖွဲ့က ထုတ်ပြန်လိုက် ပါတယ်။
သေနတ်သမားနဲ့ 911 အရေးဖော် ဖုန်းအော်ပရေတာတို့ အပြန်အလှန် စကားပြောကြားချက်တွေကို တနင်္လာနေ့က ထုတ်ပြန်လိုက် ရာမှာ သေနတ် သမားဟာ ဂျွန်လ ၁၂ရက်နေ့ မနက် အစောပိုင်းအချိန်မှာ Pulse နိုက်ကလပ်ကနေ 911 ဖုန်းနံပါတ်ကိုခေါ်ဆိုပြီး၊ ဖုန်းအော်ပရေတာကို ကျွန်တော် အောလန်ဒိုမြို့မှာပါ။ ကျွန်တော် ပစ်ခတ်မှုတွေ လုပ်ခဲ့ပါတယ်လို့ ပြောခဲ့တယ်လို့ ဆိုပါတယ်။
အခု ထုတ်ပြန်လိုက်တဲ့ သေနတ်သမားနဲ့ အပြန်အလှန် စကားပြောဆိုမှု စာသားတွေမှာ သေနတ်သမား က IS အဖွဲ့နဲ့ အဖွဲ့ခေါင်းဆောင် Abu Bakr al-Baghdadi တို့ကို သစ္စာခံတဲ့အကြောင်း ပြောဆိုထားတဲ့ အပိုင်းတွေ ကို ဖြတ်တောက်ထားတယ်လို့ အာဏာပိုင်တွေက ပြောပါတယ်။ အပြန်အလှန် စကားပြောဆိုနေ တဲ့ အသံဖိုင်ကို အာဏာပိုင်တွေက ထုတ်ပြန်ပေးဖို့ ငြင်းဆန် ထားပါတယ်။
နောက်ဆုံးမှာ ရဲတပ်ဖွဲ့ဝင်တွေ ပစ်ခတ် နှိမ်နှင်းတာ ခံလိုက်ရတဲ့ Mateen ဟာ စေ့စပ် ညှိနှိုင်းသူတွေနဲ့ သုံးကြိမ်တိတိ ဖုန်းပြောဆိုခဲ့ရာမှာ၊ သူက အမေရိကန် ပြည်ထောင်စုဟာ ဆီးရီးယားနဲ့ အီရတ်မှာ ဗုံးကျဲတိုက်ခိုက်ခဲ့တဲ့အတွက် အခုလို လက်တုန့်ပြန် တိုက်ခိုက်တာ ဖြစ်တယ်လို့ ပြောခဲ့ကြောင်း FBI တာဝန်ရှိသူတွေက ပြောပါတယ်။
