မြောက်ကိုရီးယားနိုင်ငံက နောက်ထပ် ပဲ့ထိန်းဒုံးကျည်တစင်းကို ဒီကနေ့ ထပ်ပြီး ပစ်လွှတ်လိုက်တာဟာ ကိုရီးယားကျွန်းဆွယ် ငြိမ်းချမ်းရေးနဲ့ လုံခြုံရေးကို ခြိမ်းခြောက်တဲ့လုပ်ရပ်ဖြစ်တယ်လို့ပြောပြီး တောင်ကိုရီးယား ကာကွယ်ရေးဝန်ကြီးဌာနက ပြစ်တင် ရှုတ်ချလိုက်ပါတယ်။
“မြောက်ကိုရီးယားရဲ့ မကြာသေးခင်က နျူကလီးယားဒုံးကျည် ထုတ်လုပ်ရေးဆိုင်ရာ တိုးတက်မှုအခြေအနေကို ကျနော် တို့စစ်ဘက်က သတိပြုမိပါတယ်။ အခုတကြိမ် ဒုံးကျည်ပစ်လွှတ်တာဟာ ကုလသမဂ္ဂလုံခြုံရေးကောင်စီရဲ့ ဆုံးဖြတ်ချက်တွေကို တိုက်ရိုက် တိုက်ခိုက်လိုက်တာဖြစ်ပြီး ကိုရီးယားကျွန်းဆွယ် ငြိမ်းချမ်းရေးနဲ့ ဘေးကင်းလုံခြုံရေးကို အပြင်းအထန် ခြိမ်းခြောက် လိုက်တာပါ။
ကိုရီးယားသမ္မတနိုင်ငံရဲ့ လုံခြုံရေးကို ခြိမ်းခြောက်တဲ့ မြောက်ကိုရီးယားရဲ့ ဘယ်လို ရန်စမှုမျိုးကိုမဆို ကာကွယ်ဖို့ ကျနော်တို့စစ်ဘက်ဟာ အသင့်အနေအထား အပြည့်အဝရှိနေပါတယ်။” လို့ တောင်ကိုရီးယား ကာကွယ်ရေးဌာန ပြောခွင့်ရ Moon Sang-gyun ကပြောပါတယ်။
မြောက်ကိုရီးယားအပေါ် အမေရိကန်ပြည်ထောင်စုက နောက်ထပ် ဒဏ်ခတ်အရေးယူမှုတွေ ချမှတ်လိုက်အပြီး ရက်ပိုင်းအတွင်းမှာ ပဲ မြောက်ကိုရီးယားက ဒုံးကျည် ပစ်လွှတ်တာပါ။
ဇန်နဝါရီလ ၆ ရက်နေ့မှာ မြောက်ကိုရီးယားက လေးကြိမ်မြောက် နျူကလီးယား စမ်းသပ်မှုလုပ်ခဲ့သလို နောက်တလအကြာမှာ တာဝေးပစ်ဒုံးပျံတစင်းကို ပစ်လွှတ်ခဲ့တာကြောင့် နှစ်ပိုင်းကွဲနေတဲ့ ကိုရီးယား ကျွန်းဆွယ်မှာ စစ်ရေးတင်းမာမှု မြင့်နေတာပါ။ တာဝေးပစ်ဒုံးပျံ ပစ်လွှတ်တာဟာ တာဝေးပစ် ပဲ့ထိန်းဒုံးကျည် စမ်းသပ်တာကို ဖုံးကွယ် လုပ်ဆောင်တာလို့ အများက မြင်ကြပါတယ်။
