ရူပဗေဒဆိုင်ရာ နိုဘဲလ်ဆုရှင်တွေအဖြစ် သိပ္ပံပညာရှင်တွေ ဖြစ်ကြတဲ့ Rainer Weiss၊ Barry Barish နဲ့ Kip Thorne တို့ကို ရွေးချယ်လိုက်ပါတယ်။ Gravitational Waves ဒြပ်ဆွဲလှိုင်းတွေကို ရှာဖွေတွေ့ရှိမှုအတွက် ချီးမြှင့်လိုက်တာပါ။
အမေရိကန်ဒေါ်လာ ၁ သန်း ၁ သိန်း ချီးမြှင့်မယ့် ရူပဗေဒ နိုဘဲလ်ဆုရှင်တွေကိုတော့ ဒီကနေ့ အင်္ဂါနေ့မှာပဲ ဆွီဒင်တော်ဝင် သိပ္ပံအသင်းကြီးက ကြေညာခဲ့တာ ဖြစ်ပါတယ်။ ကမ္ဘာကျော် ရူပဗေဒပညာရှင် Albert Einstein ရဲ့ နှိုင်းရ သီအိုရီက ကြိုတင်ဟောကိန်းထုတ်ခဲ့ဖူးတဲ့ ဒြပ်ဆွဲအားလှိုင်းတွေ တည်ရှိနေကြောင်းကိုတော့ မကြာသေးခင်ကမှ သိပ္ပံပညာရှင်တွေ တွေ့ရှိခဲ့ကြတာပါ။
ဆုချီးမြှင့်ခံခဲ့ရသူ သိပ္ပံပညာရှင် ၃ ဦးဟာ ဆွဲငင်းအားလှိုင်းတွေကို စောင့်ကြည့်တိုင်းတာခဲ့တဲ့ လေဆာရောင်ခြည်သုံး ဒြပ်ဆွဲလှိုင်း စောင့်ကြည့်လေ့လာရေးဌာန ( LIGO ) ရဲ့ လေ့လာတွေ့ရှိချက်တွေမှာ အဓိကအခန်းကဏ္ဍက ပါဝင်ခဲ့ကြတာပါ။ အာကာသထဲက Black Holes လို့ခေါ်တဲ့ တွင်းနက်ကြီး ၂ ခု တိုက်မိရာက ကြီးမားတဲ့ တွင်းနက်ကြီးတခုအဖြစ် ပေါင်းစည်းမိချိန်မှာ ထွက်ပေါ်လာတဲ့ လှိုင်းတွေကို ကမ္ဘာပေါ်ကနေ ပထမဆုံးအကြိမ်အဖြစ် ၂၀၁၅ ခုနှစ်မှာ LIGO သုတေသနဌာနက စမ်းသပ် တွေ့ရှိခဲ့တာ ဖြစ်ပါတယ်။
