ရုရှားနိုင်ငံနဲ့ တင်းမာမှုတွေ ကြုံနေရချိန်မှာ ယူကရိန်းနိုင်ငံ လုံခြုံရေးအတွက် Azov ပင်လယ်မှာ မြောက်အတ္တလန်တိတ်စာချုပ်အဖွဲ့ (NATO) က စစ်သင်္ဘောတွေ စေလွှတ်ဖို့ ယူကရိန်းသမ္မတက အကူအညီ တောင်းလိုက်ပါတယ်။
ယူကရိန်းသမ္မတ Petro Poroshenko ရဲ့ ပန်ကြားချက်ကိုတော့ ဒီကနေ့ထုတ် ဂျာမန်သတင်းစာ Bild မှာ ဖော်ပြခဲ့တာပါ။ ဒီနေ့မှာပဲ တူရကီသမ္မတ Recep Tayyip Erdogan ကလည်း ယူကရိန်းနဲ့ ရုရှားတို့ကြား ကြားဝင်ညှိနှိုင်းပေးဖို့ ကမ်းလှမ်းလိုက်ပါတယ်။
၂ နိုင်ငံ ခေါင်းဆောင်တွေနဲ့ တယ်လီဖုန်းက စကားပြောခဲ့ကြောင်းနဲ့ အာဂျင်တီးနားနိုင်ငံမှာ ကျင်းပမယ့် စက်မှုဖွံ့ဖြိုးတဲ့ နိုင်ငံပေါင်း ၂၀ (G-20) ထိပ်သီးအစည်းအဝေးအတွင်း ရုရှားသမ္မတ Vladimir Putin အမေရိကန်သမ္မတ Donald Trump တို့နဲ့ ဒီကိစ္စကို ဆက်လက် ဆွေးနွေးသွားမှာဖြစ်ကြောင်းလည်း တူရကီသမ္မတက ပြောဆိုခဲ့တာပါ။ ထိပ်သီးအစည်းအဝေးအတွင်း ရုရှားနဲ့ အမေရိကန်သမ္မတ ၂ ဦး စနေနေ့မှာ သီးခြားတွေ့ဆုံပြီး ၂ နိုင်ငံကြား ကိစ္စတွေအပြင်၊ ဒေသတွင်းက ပဋိပက္ခတွေ၊ လက်နက်ဖျက်သိမ်းရေး ကိစ္စတွေကို ဆွေးနွေးသွားဖို့ ရှိကြောင်းလည်း ရုရှားအစိုးရ ပြောခွင့်ရ Dmitry Peskov ကပြောပါတယ်။
Kerch ရေလက်ကြားကတဆင့် ယူကရိန်းနိုင်ငံ Mariupol ဆိပ်ကမ်းကိုသွားဖို့ ကြိုးစားခဲ့ကြတဲ့ ယူကရိန်း သင်္ဘော ၃ စင်းနဲ့ သင်္ဘောသားတွေကိုတော့ Azov ပင်လယ်မှာ ရုရှားတပ်ဖွဲ့တွေက တနင်္ဂနွေနေ့မှာပဲ ဖမ်းဆီးခဲ့တာ ဖြစ်ပါတယ်။ ယူကရိန်းကတော့ အတူခွဲေ၀ အသုံးပြုဖို့ သဘောတူထားတဲ့ Kerch ရေလက်ကြားကို ရုရှားက ရေနံတင်သင်္ဘောတစင်းနဲ့ ပိတ်ဆို့ခဲ့ကြောင်း ပြောဆိုထားတာပါ။ ရုရှားနိုင်ငံဘက်ကတော့ ယူကရိန်းသင်္ဘောတွေဟာ ရုရှားရေပိုင်နက်ထဲကို ဥပဒေမဲ့ ဝင်ရောက်လာခဲ့ကြောင်း ပြောဆိုထားပါတယ်။
