ရိုက်တာသတင်းထောက်တွေကို ထောင်ဒဏ်ချတဲ့အမှုမှာ အုပ်ချုပ်ရေးမဏ္ဍိုင်က တရားရေး မဏ္ဍိုင်ကို ဝင်ရောက်စွက်ဖက်ခဲ့ခြင်း မရှိခဲ့ဘူးလို့ နိုင်ငံတော်သမ္မတရုံးပြောခွင့်ရ ဦးဇော်ဌေးက ပြောပါတယ်။ နေပြည်တော်က သမ္မတရုံးမှာ ဒီကနေ့ပြုလုပ်တဲ့ သတင်းစာရှင်းလင်းပွဲအတွင်း ပြောသွားတာနဲ့ပတ်သက်လို့ ကိုဉာဏ်ဝင်းအောင်က တင်ပြထားပါတယ်။
နေပြည်တော်က သတင်းစာရှင်းလင်းပွဲမှာ ICC နဲ့ ပတ်သက်တဲ့ မေးခွန်းတွေအပြင် ရိုက်တာ သတင်းထောက်တွေကို ထောင်ဒဏ် ၇ နှစ် ချမှတ်လိုက်တဲ့ကိစ္စအပေါ် သတင်းထောက် အများစုက မေးခွန်းထုတ်ခဲ့ကြပါတယ်။
ရိုက်တာသတင်းထောက်တွေအမှုမှာ အစိုးရအနေနဲ့ တရားရေးကဏ္ဍကို ဝင်ရောက် စွက်ဖက်ခဲ့ ခြင်းမရှိကြောင်း သမ္မတရုံးပြောခွင့်ရ ဦးဇော်ဌေးက တုံ့ပြန်ပါတယ်။ ရိုက်တာသတင်းထောက် ကိုဝလုံးတို့ကို တရားရုံးက ထောင်ဒဏ်ချမှတ်လိုက်ပေမယ့် သမ္မတရဲ့ လွတ်ငြိမ်းချမ်းသာခွင့်အရ ပြန်လွှတ်ပေးဖို့ အစီအစဉ်ရှိမရှိဆိုတဲ့ သတင်းထောက်တဦးရဲ့ မေးခွန်းကိုတော့ ဦးဇော်ဌေးက အခုလို ဖြေကြားပါတယ်။
“အဲဒါနဲ့ပတ်သက်ပြီးတော့ ဘာလုပ်ပေးမယ်၊ ညာလုပ်ပေးမယ်ဆိုတာ ပြောလို့မရဘူး။ ကျနော် ပြောတာက ဒါသည် တရားရုံးရဲ့စီရင်ဆုံးဖြတ်ပိုင်ခွင့်၊ ကျနော်တို့က Contempt of Court တရားရုံးကို မထေမဲ့မြင်ပြုလို့မရဘူး၊ အုပ်ချုပ်ရေးအဖွဲ့အစည်း ဖြစ်တဲ့အတွက်။ အဲဒီတော့ ဒီ စီရင်ချက်အပေါ်မှာလည်း ကျနော်တို့က ဘာမှ မှတ်ချက်မပေးလိုဘူး။ အဲဒီတော့ စီရင်ချက် ချမှတ်ပြီးတဲ့နောက်ပိုင်းမှာ ဖြစ်လာတာကတော့ depend on the situation ပေါ့နော်၊ နောက်ပိုင်းမှာ သင့်လျော်သလို သူ့ဟာသူ ဖြစ်ကောင်းဖြစ်လာနိုင်တယ်ပေါ့နော်။”
ရခိုင်ပဋိပက္ခသတင်းတွေ ဖော်ထုတ် ရေးသားခဲ့တဲ့ ကိုဝလုံးတို့ကို ထောင်ဒဏ်ချမှတ်ခဲ့ပြီးတဲ့ နောက် မြန်မာအစိုးရအပေါ် နိုင်ငံတကာရဲ့ဖိအားတွေ တိုးလာနေတဲ့အတွက် ဒီသတင်း ထောက်တွေ ပြန်လွှတ်ပေးရေးကို အလေးအနက်စဉ်းစားသင့်တယ်လို့ မြန်မာ့အရေး လေ့လာ သုံးသပ်သူ ဒေါက်တာရန်မျိုးသိမ်းက ထောက်ပြပါတယ်။
“မြန်မာနိုင်ငံအပေါ်မှာ နိုင်ငံတကာရဲ့ ဖိအားပေးမှုတွေ မြင့်မားနေတဲ့အခြေအနေမျိုးမှာ
ဒီ ရိုက်တာသတင်းထောက်နှစ်ယောက်ရဲ့ကိစ္စဟာ အလေးအနက် စဉ်းစားသင့်တဲ့ ကိစ္စတခုလို့ မြင်တယ်။ သမ္မတအနေနဲ့လည်း စဉ်းစားနိုင်လိမ့်မယ်လို့ မျှော်လင့်တယ်။ ”
ဒီကနေ့ ပြုလုပ်တဲ့ နေပြည်တော်က သတင်းစာရှင်းလင်းပွဲဟာ ပထမဦးဆုံး ပုံမှန်သတင်းစာ ရှင်းလင်းပွဲဖြစ်ပြီး နောင်မှာလည်း တပတ်တကြိမ်၊ ဒါမှမဟုတ် နှစ်ပတ်တကြိမ် ပုံမှန် ပြုလုပ်သွား မှာဖြစ်တယ်လို့ ဥိးဇော်ဌေးက ပြောသွားပါတယ်။
